Saturday, April 27, 2024

Author: Omar Rashid Z. Abdullah

Kanhi OFW napalgang patay sa isa ka apartment sa Maramag

Posted on by Omar Rashid Z. Abdullah

Napalgan ang patay’ng lawas sa isa ka kanhi OFW sulod sa isa ka apartment sa Munisipyo sa Maramag

Si Police Major Erwin Naelga, OIC sa Maramag Municipal Police Station (MMPS) miingon sa iyang report nga nadiskubri ang patay’ng lawas pasado alas 10:00 sa gabii sa Disyembre 6, 2023.

Partikularminte nga napalgan ang biktima sa Khrista M. Jaca Apartment sa Purok 1, Tuban Village, North Poblacion.

Ang lawas sa hingkod nga lalaki kinsa giingon nga bulag sa asawa nakit-an nga nagbuy-od sa sawog nga adunay gisuka.

Base sa inisyal nga ocular inspection sa patay’ng lawas sa biktima, nasuta nga walay timailhan sa physical injuries, walay samad pinusilan, walay samad dinunggaban, ug walay timailhan sa foul play.

Ang anak nga babaye sa biktima mitug-an atol sa pakighinabi sa kapolisan nga ang biktima isa ka kanhi OFW, ug isa sa rason sa iyang pagbalik sa Pilipinas ang iyang health issues (high blood).

Ang biktima gidala pa sa BPH Maramag alang sa physical examination.

Ang attending Physician nga si Dr. Reina mi-classify niini nga natural nga kamatayon ang nasinati sa lalaki. (Omar Rashid Z. Abdullah)

Armas, gidudahang shabu nasakmit sa buy bust sa Kalilangan

Posted on by Omar Rashid Z. Abdullah

Isa ka revolver ug gidudahang shabu ang nasakmit sa hiniusang puwersa sa kapolisan sa buy bust operation nga nahigayon sa Purok 3, Macatol, Macaopao, Kalilangan, Bukidnon hapon sa Disyembre 3

Sumala sa report ni Police Major Christian D. Serdeña, hepe sa Kalilangan Municipal Police Station, nasikop sab nila ang duha ka mga lalaking suspek nga nag-edad 30 ug 31 anyos.
Lakip sa mga nasakmit sa kapolisan gikan sa mga suspek ang isa ka Smith and Wesson Cal .38 revolver without serial number nga kargado sa tulo ka mga bala, ug gidudahang shabu nga mitimbang sa 51.5 gramos nga adunay street value nga Php 350,200.
Ang nga nasikop ug mga ebidensya ang gidala ngadto sa Kalilangan MPS. Samtang ang mga drug pieces ang itugyan ngadto sa Bukidnon Forensic Unit alang sa qualitative ug quantitative
examinations.
Sa pagkutlo ning balita, gihikay na sa kapolisan ang kasong violation sa Sections 5 ug 11 sa Article II sa R.A. 9165 kon Comprehensive Dangerous Drug Act of 2002 ug violation sa R.A. 10591 kon “Comprehensive Firearms and Ammunition Regulation Act”.
Kauban sa buy bust operation sa Kalilangan MPS ang Bukidnon Provincial Intelligence Unit (BUK PIU). (Omar Rashid Z. Abdullah)

3 suspek sa pagpangawat nakorner

Posted on by Omar Rashid Z. Abdullah

Tingkagol sa selda sa kapolisan sa dakbayan sa Malaybalay ang tulo ka mga suspek sa pagpangawat sa Bides residence sa San Isidro St. Ext., Purok 2, Brgy. 9, Malaybalay City, Bukidnon

Sila giingon nga nasapon sa biktima uban sa mga silingan pasado alas 8:00 sa gabii niadtong Nobyembre 16.

Sumala sa report sa kapolisan, ang mga nasikop tanan mga lalaki. Sila kasamtangan ubos sa kustodya sa kapolisan sa Malaybalay.

Apan ang duha ka mga kauban sa nasikop ang hingpit nga nakasibat ug gipangita pa sila sa kapolisan.

Nasayran nga namatikdan sa mga silingan nga milayat ang mga suspek sa sementong kural sa Bides Residence. Gumikan niini, nirespondi ang biktima kinsa nagpuyo kilid lang sa ilang ancestral house uban sa pipila ka mga silingan ug nasikop ang tulo ka mga suspek. (Omar Rashid Z. Abdullah)

5 balay nasunog sa Valencia

Posted on by Omar Rashid Z. Abdullah

Naugdaw ang lima ka mga balay sa nahitabong sunog sa Purok 3A, Brgy. San Isidro, Valencia City, Bukidnon gabii sa Nobyembre 17

sa sunog ang Valencia City Bureau Fire Protection ug napalong nila ang kalayo. Giingon nga ang kalayo nagsugod sa panimalay sa isa ka Romeo Tongal.

Walay natalang namatay o nasamdan sa hitabo apan ang damyos gibanabanang muabot sa P280,000.00.

Sa pagkutlo ning balita padayon pa ang imbestigasyon sa BFP Valencia aron pagsuta sa hinungdan sa sunog. (Omar Rashid Z. Abdullah)

25 migradwar sa CBDRP sa Valencia

Posted on by Omar Rashid Z. Abdullah

Migradwar ang 25 ka mga plea bargain drug responders sa Valencia City human nila makompleto ang unom ka bulan nga Community-Based Drug Rehabilitation Program (CBDRP) sa lokal nga pangagamhanan

Ang City government miingon nga nahigayon ang programa pinaagi sa City Anti-Drug Abuse Council (CADAC) Nobyembre 21, 2023.

Sa gipahigayon nga Commencement Exercises, emosyonal nga gipadangat sa maong ikatulong batch nga mga CBDRP completers ang ilang dakong pasalamat sa mga tigpasiugda ug gapaluyo sa nasangpit nga programa nga gipangunahan ni Acting CADAC Coordinator Giovanni Asis.

Lakip sab nila nga gipasalamatan ang ilang tagsa-tagsa ka mga pamilya nga kanunay gaabag kanila nga makalingkawas sa pagkaulipon sa ilegal nga droga.

Mitambong usab si Assistant City Administrator Rembert Bautista sa seremonya. Iyang gipaabot ang suporta ug pagdasig ni Mayor Azucena Huervas ngadto sa mga migradwar.

Gihagit sab niya ang mga hingtungdan nga mga ahensya sa gobyerno nga padayon makighiusa sa mga inisyatiba ug programa sa lokal nga pangagamhanan alang sa aktibo nga kampanya batok ilegal nga droga.

Namulong usab sa maong aktibidad sila Pastora Joyce Ebisa, Eklessia Bukidnon Spiritual Support Group; Dr. Crysthia Lorcyl Sistoso, RN, MD; Fiscal Melanie Gasendo, City Prosecutor; ug PMAJ Patrick Castro, deputy chief of police. (Omar Rashid Z. Abdullah)

Amahan gidunggab sa Damulog

Posted on by Omar Rashid Z. Abdullah

Isa ka amahan ang gidunggab sa iyang kaugalingong anak sa Barangay Maican, Damulog, Bukidnon

Base sa report sa pulisya, ang insidente nahitabo niadtong Oktubre 29, 2023 sa ala 1:30 sa buntag.

Ang biktima isa ka 48-anyos nga mag-uuma nga residente sa P-4 Maican, Damulog, Bukidnon.

Samtang ang suspek, kinsa anak sa biktima, giila nga isa ka 24-anyos nga watchman sa RNN Construction ug residente sa maong dapit.

Matod sa taho, ang suspek nakig-inom sa mga higala niini sa dihang gipahunong sa pag-inom ug gipapauli kini sa iyang amahan.

Tungod niini, ang suspek nasuko sa iyang amahan ug gisaksak kini gamit ang isa ka 12-inch nga kutsilyo.

Ang suspek naka-angkon og grabe nga samad ug dali kining gidala sa balay tambalanan apan nakabsan na kini sa iyang kinabuhi. (Omar Rashid Z. Abdullah)

PGB mihatod og relief goods sa Valencia

Posted on by Omar Rashid Z. Abdullah

Ang Provincial Government of Bukidnon (PGB) mihatod og relief goods ngadto sa local government unit sa Valencia City

Base sa pahibalo sa PGB, ang relief goods gilangkuban sa 150 ka sako sa bugas, 500 nga karton sa beef loaf, ug 30 ka karton sa sardinas.

Ang relief good gitunol ngadto kang City Social Welfare and Development (CSWD) Officer Yvonne Sapanta niadtong Oktubre 21.

Gipakisayud ni CSWD Officer Sapanta nga walo ka mga barangay sa dakbayan ang naapektuhan human masinati ang kalit nga flash flood niadtong Oktubre 19 sa gabie.

Ang mga barangay nga apektado mao ang Poblacion, San Carlos, Lurugan, Lumbo, Sugod, Batangan, Bagontaas, ug Pinatilan.

Gibutyag nga mikabat sa 2,286 ka mga pamilya ang apektado ug duha ang natala nga casualty. (Omar Rashid Z. Abdullah)

Livelihood gitunol sa Kadingilan, Bukidnon

Posted on by Omar Rashid Z. Abdullah

Isa ka livelihood turnover ceremony ang nahigayon sa Kadingilan, Bukidnon niadtong Setyembre 29, 2023

Ang turnover gipahigayon sa Department of Labor and Employment (DOLE) X – Bukidnon Provincial Field Office (BukPFO) pinaagi sa DOLE Integrated Livelihood Program (DILP).

Sumala sa pahibalo sa DOLE-X BukPFO, adunay 47 ka ginikanan sa child laborers ang nakadawat sa working capital nga mikabat sa Php15,000.00.

Ang livelihood project nagtumong sa pagdugang ug pagsuporta sa kita sa mga benepisyaryo, sa pagpasiugda sa self-employment, ug sa pagpagaan sa negatibong epekto sa nagpadayong pandemya. (Omar Rashid Z. Abdullah)

28 ka mag-uuma sa mais, mi-gradwar sa FFS sa Manolo

Posted on by Omar Rashid Z. Abdullah

Mi-gradwar ang 28 ka mga mag-uuma sa mais ubos Farmers’ Field School (FFS) niadtong Oktubre 4, 2023 sa Manolo Fortich, Bukidnon

Base sa pahibalo sa LGU Manolo Fortich, ang maong programa gipasiugdahan sa Lokal nga Pangagamhanan sa lungsod agi sa Municipal Agriculture Office (MAO) kaabag ang Department of Agriculture Region 10.

Ang Graduation Ceremony gipahigayon sulod sa covered court sa Barangay Minsuro, sa Manolo Fortich.

Tinguha sa maong programa nga madungagan ang kahibalo ug kahanas sa mga mag-uuma sa barangay aron mas mapalambo ang ilang panginabuhian agi sa corn farming. (Omar Rashid Z. Abdullah)

Php50K gidawat sa centenarian sa Valencia

Posted on by Omar Rashid Z. Abdullah

Isa ka babae nga centenarian ang gitunolan sa LGU Valencia og Php50,000.00 niadtong Setyembre 25, 2023

Ang centenarian giila nga si Lola Patricia Pedroza Sanjurjo kinsa residente sa Purok-9, Barangay Batangan, Valencia City.

Sumala sa pahibalo sa LGU Valencia, si Lola Patricia bag-o lamang nagselebrar sa iyang ika-100 nga panuigon niadtong bulan sa Agosto.

Nasayran nga isa sa programa sa LGU Valencia ang paghatag sa nasangpit nga benepisyo alang sa mga centenarian.

Ginapaabot pa usab ang dugang nga benepisyo nga Php100,000.00 nga mahatag gikan sa national government pinaagi sa Department of Social Welfare and Development (DSWD).

Ang Republic Act 10868 o Centenarians Act of 2016 naghatag og pasidungog sa tanang Pilipino nga moabot og 100 anyos, nagpuyo man sa Pilipinas o sa gawas sa nasud isip pag-ila sa ilang taas nga kinabuhi. (Omar Rashid Z. Abdullah)