Thursday, April 18, 2024

Author: Omar Rashid Z. Abdullah

2 gipamusil sa Malaybalay

Posted on by Omar Rashid Z. Abdullah

Duha ka managlahing insidente sa pagpamusil ang nahitabo sa dakbayan sa Malaybalay

Sumala sa report sa kapolisan, ang mga lalaking biktima nag-edad sa 45-anyos ug 43-anyos.

Ang unang gipusil patay mao 45-anyos nga minyong lalaki.

Siya gipusil sa Fortich St., National Highway, Purok 4, Brgy. San Jose, Malaybalay City gabii sa Enero 21, 2024.

Nakaangkon siya sa grabing samad pinusilan sa iyang wala nga dunggan diin ang bala migawas sa tuo nga templo gamit ang wala matinong kalibre sa armas.

Napalgan siya nga nagbuy-od sa abaga sa dalan paingon sa norte kilid sa iyang single nga motorsiklo nga nagkadugo ang nawong.

Gidala pa ang biktima sa Bukidnon Provincial Medical Center apan gideklarar sa nag-atiman nga doktor nga dead on arrival.

Sa laing bahin, ang ikaduhang pagpamusil patay nahitabo gabii sa Enero 23, 2024 sa Purok 4, Barangay 7, Malaybalay City, Bukidnon.

Ang 43-anyos nga biktima nakaangkon sa grabing mga samad pinusilan sa lawas.

Gidala pa siya sa mireponding MERU personnel ngadto sa BPMC apan gideklarar sa nag-atiman nga doktor nga dead on arrival.

Sa imbestigasyon nasayran nga niabot ang suspek sa pinuy-anan sa biktima nga nagpakaron-ingnon nga mangabang.

Pipila ka gutlo ang milabay, sa walay igong rason gipusil ang biktima sa makadaghang higayon ug milayas ang suspek padulong sa wala mahibal-i nga direksyon.

Sa pagsuwat ning balita, padayon pa ang imbestigasyon sa kapolisan sa Malaybalay aron pagtino sa motibo ug pag-ila sa mga suspek. (Omar Rashid Z. Abdullah)

Lalaki gipusil sa Kitaotao

Posted on by Omar Rashid Z. Abdullah

Isa ka 23-anyos nga lalaki ang gipusil patay sa Purok 10, Sityo Pamulaan, Sinuda, Kitaotao, Bukidnon gabii sa Enero 12, 2024

Ang biktima nakaangkon og upat ka samad pinusilan – duha sa iyang dughan, ug duha sa wala ug tuo nga bahin sa iyang lawas.

Sumala kini sa report ni Police Captain Christopher P. Tuzara II, OIC sa Kitaotao Municipal Police Station (KMPS).

Sa inisyal nga imbestigasyon, nasayran nga sa samang petsa mga alas 7:40 sa gabii, nagbarog daplin sa dalan ang nahisgutang biktima dihang niabot ang duha ka wa mailhing tawo sakay sa kolor itom nga Kawasaki Bajaj nga motorsiklo, nga walay plaka.

Gipusil sa mga mamumuno ang lalaki sa makadaghang higayon gamit ang Cal .45 nga pistola.

Matod sa magulang sa biktima, ang gunman nagsul-ob og itom nga jacket, itom nga bonnet, ug itom nga short.

Human sa pagpamusil, misibat ang mga suspek paingon sa amihanang direksyon.

Ang biktima gihatod dayon sa iyang igsuon sakay sa motorsiklo paingon sa Buda Medical Center. Ikasubo, ang biktima gideklarar nga dead on arrival sa nag-atiman nga mananambal.

Narekober sa mga mirespondeng pulis nga nadestino sa Border Control Point (BCP) sa Lorega, Kitaotao, Bukidnon ang unom (6) ka kabhang sa bala sa Cal. 45 pistola sa lugar nga nahitaboan sa pagpamusil.

Kini nga mga piraso sa ebidensya lagmit adunay mahinungdanon nga papel sa nagpadayon nga imbestigasyon aron mailhan ang mga sad-an ug mahibal-an ang mga kahimtang nga naglibot sa insidente.

Wala pa matino ang motibo sa pagpamusil.

Ang padayon nga imbestigasyon nakatutok sa pagtigom og dugang impormasyon aron mahibaw-an ang mga rason luyo sa pag-atake sa biktima. (Omar Rashid Z. Abdullah)

Livelihood turnover gipahigayon sa Valencia

Posted on by Omar Rashid Z. Abdullah

Isa ka livelihood turnover ang gipahigayon sa Department of Labor and Employment (DOLE) X – Bukidnon Provincial Field Office (BukPFO) sa Valencia City, Bukidnon kaniadtong Enero 10, 2024

Nahigayon kini pinaagi sa Provincial Director sa ahensya nga si Raul Valmores ug DOLE Integrated Livelihood Program (DILP) personnel uban sa Valencia Rural Improvement Multi-Purpose Cooperative isip accredited co-partner.

Ang DOLE Bukidnon miingon nga duha (2) ka asosasyon sa mga mamumuo ang nakadawat sa livelihood.

Kini mao ang Young Social Innovators nakadawat og livelihood project nga mibalor og P150,000.00 alang sa ilang Snack Bar Project; ug ang Small Vendor Progressive Association – nga nakadawat og panginabuhian nga nagkantidad og P250,000.00 alang sa ilang Frozen Food Marketing Store Project.

Gawas niana, laing 33 ka indibidwal usab ang nakadawat og livelihood grant alang sa ilang Sari-sari Store, Rice Trading, Goat Raising, Agri-vet ug Corn Production Projects ubos sa DILP.

Kini nahimong posible pinaagi sa pakigtambayayong sa Local Government Unit (LGU) sa
Valencia City pinaagi sa Public Employment Services Office (PESO).

Dugang sa DOLE Bukidnon nga ang livelihood project nagtumong sa pagdugang ug/o pagsuporta sa kita sa mga benepisyaryo ug sa pagpalambo sa kaugalingong trabaho. (Omar Rashid Z. Abdullah)

Liog sa hubog gihiwa sa Maramag

Posted on by Omar Rashid Z. Abdullah

Gikatahong gihiwa ang liog sa isa ka tawong ubos sa impluwensya sa ilimnong makahubog sa sa terasa sa isa ka balay sa Purok 5, Brgy. San Miguel, Maramag, Bukidnon niadtong Enero 6, 2024

Sumala sa report sa kapolisan sa Maramag Municipal Police Station (MMPS), ang biktima isa ka 36-anyos nga lalaki kinsa residente sa dapit.

Base sa pamahayag sa tag-iya sa balay, hubog nga niabot ang maong biktima, ug nilingkod sa terrace sa ilang balay.

Matod nila, naandan na kini nga ginabuhat sa biktima matag mahubog.

Pipila ka oras ang milabay, dihang ang tag-iya sa balay nagkuha og mga personal nga panginahanglanon, milili siya sa bintana gikan sa sulod sa iyang gamay nga tindahan. Didto iyang nakita ang biktima nga nagbuy-od sa yuta nga naligo sa iyang dugo.

Human niadto, ang tag-iya sa balay mitawag sa atensyon sa iyang asawa, dayon nipahibawo sa mga opisyal sa barangay ug Maramag MPS bahin sa hitabo.

Ang biktima gidala sa Maramag rescue personnel sa Bukidnon Provincial Hospital (BPH), Maramag, Bukidnon alang sa post mortem examination.

Ang mga sakop sa Maramag MPS padayon pa nga nagpahigayon og follow up nga imbestigasyon aron mailhan ang suspek. (Omar Rashid Z. Abdullah)

Tindahan gikatahong gikawatan sa San Fernando

Posted on by Omar Rashid Z. Abdullah

Gikatahong gikawatan sa duha ka saleslady ang isa ka tindahan sa Purok 3, Brgy. Mabuhay, San Fernando, Bukidnon

Sumala sa report, ang tag-iya mismo ang mitaho sa hitabo ngadto sa buhatan sa San Fernando Municipal Police Station (SFMPS) niadtong Enero 7, 2024.

Nasayran nga niadtong Disyembre 27, 2023 pa sa gabii nibiya sa tindahan ang duha ka mga suspek nga saleslady nga walay pananghid.

Giingon nga gidala sa mga suspek ang ₱35,599.00 cash sa tindahan ug GCash cash nga mibalor sa ₱18,400.00.

Dugang pa sa biktima nga niadtong Enero 3, 2024, nakig-estorya siya sa isa sa mga suspek, pinaagi sa cellphone.

Sumpay niya nga misaad ang suspek nga iuli ang maong kantidad niadtong Enero 4, 2024, apan pakyas kini.

Ang San Fernando MPS mihimo na sa makuting imbestigasyon sa maong insidente. (Omar Rashid Z. Abdullah)

2 flock men patay sa road mishap sa Impasug-ong

Posted on by Omar Rashid Z. Abdullah

Patay ang duha ka flock men human nadasmagan sa Trailer Truck ang motorsiklong ilang gisakyan sa Sayre Highway, Zone 1, Brgy. Impalutao, Impasugong, Bukidnon hapon sa Disyembre 29, 2023

Sumala sa report sa Impasug-ong Municipal Police Station, ang mga biktima parehong hingkod ug flock men sa GAMA Farm Corp.

Sa ocular inspection nasayran nga nagbiyahe ang motorsiklo nga nagsubay sa kurbada nga dalan gikan sa Brgy. Impalutao samtang ang Trailer Truck nagsubay sa tungason nga dalan gikan sa amihanang direksyon.

Matod pa, sa pag-abot sa nasangpit nga lugar, nisubay ang motorsiklo sa lane of travel sa Trailer Truck nga niresulta sa pagkabangga.

Ang mga biktima gidala pa sa Impasugong Rescue Team sa Bukidnon Provincial Medical Center aron matambalan.

Apan ang duha gideklarar nga dead on arrival sa attending physician.

Ang drayber sa Trailer Truck uban sa nalambigit nga mga sakyanan ang gidala sa Impasug-ong MPS alang sa tukmang disposasyon. (Omar Rashid Z. Abdullah)

Tawo gipusil patay sa Tulogan sa Talakag

Posted on by Omar Rashid Z. Abdullah

Isa ka 24 anyos nga lalaki ang gipusil patay sa Tulogan sa Tribu sa Purok 1, Brgy. Miarayon, Talakag, Bukidnon

Sumala sa report sa kapolisan sa Talakag, nahitabo ang krimen pasado alas 8:45 ang takna sa gabii niadtong Disyembre 31, 2023.

Ang biktima nakaangkon sa grabing samad pinusilan sa walang dughan.

Gidala pa siya sa Bukidnon Provincial Hospital sa Talakag apan gideklara na siyang patay sa
wala pa mahiabot.

Sumala sa imbestigasyon sa kapolisan, ang biktima nitambong sa ritual sa tribu sa dihang kalit
gipusil sa wala mailang suspek.

Sa pagkutlo ning balita padayon pa ang imbestigasyon sa kapolisan sa Talakag aron pag-ila sa
suspek ug pagsuta sa motibo sa krimen. (Omar Rashid Z. Abdullah)

Samaron nga NPA nasikop sa Quezon

Posted on by Omar Rashid Z. Abdullah

Nasikop sa militar ang isa ka samaron nga myembro sa New People’s Army (NPA) human gibiyaan sa iyang mga kauban sa Sitio Mahayahay, Brgy. Linabo, Quezon, Bukidnon kaniadtong Disyembre 30, 2023

Sumala sa kasayoran, ang rebelled nasikop sa mga myembro sa 48th Infantry Battalion sa 1003rd Infantry Brigade nga naglihok sa dapit.

Ang nasikop nailang si Alyas Martin/Ligaw, myembro sa Sub-Regional Sentro De Grabidad Peddler, North Central Mindanao Regional Committee (SRSDG Peddler, NCMRC) sa Communist Terrorist Group.

Si Alias Martin nakaangkon sa samad pinusilan sa walang tiil ug tuong hita hinungdan gibiyaan siya sa iyang mga kauban sa battlefield sa panagsangka batok militar niadtong Disyembre 27, 2023.

Ang militar mihatag og first aid sa sinikop ug pagkahuman gidala nila kini sa hospital sa Munisipyo sa Quezon.

Nakig-alayon sab ang militar sa Local Government Unit sa Quezon alang sa medical support kay alyas Martin. (Omar Rashid Z. Abdullah)

Tawo gipatay sa pinyahan sa Sumilao

Posted on by Omar Rashid Z. Abdullah

Isa ka tawo ang napalgang patay sa Pineapple Plantation sa Field 70, Section Charlie 2, Zone 4, Sitio Kilabong, Vista Villa, Sumilao, Bukidnon niadtong Disyembre 15, 2023

Sumala sa report ni Police Major Larry Enciso, acting chief of police sa Sumilao Municipal
Police Station (MPS), ang biktima isa ka 59 anyos nga lalaki.

Ang biktima nakaangkon sa daghang samad dinunggaban sa dughan, tiyan, bukton, ug mga
samad tinigbasan sa tiil ug liog.

Sa inisyal nga imbestigasyon, nasayran nga sa wala pa ang insidente, nakig-inom ang biktima
uban sa mga higala sa maong adlaw.

Ang Sumilao MPS nagpahigayon og imbestigasyon aron matigom ang mga pamahayag sa saksi
ug mangolekta og dugang ebidensiya nga mahimong mahinungdanon sa pagpasaka og kaso
batok sa (mga) suspek. (Omar Rashid Z. Abdullah)

Tawo gipatay sa pinyahan sa Sumilao

Posted on by Omar Rashid Z. Abdullah

Isa ka tawo ang napalgang patay sa Pineapple Plantation sa Field 70, Section Charlie 2, Zone 4, Sitio Kilabong, Vista Villa, Sumilao, Bukidnon niadtong Disyembre 15, 2023

Sumala sa report ni Police Major Larry Enciso, acting chief of police sa Sumilao Municipal Police Station (MPS), ang biktima isa ka 59 anyos nga lalaki.

Ang biktima nakaangkon sa daghang samad dinunggaban sa dughan, tiyan, bukton, ug mga samad tinigbasan sa tiil ug liog.

Sa inisyal nga imbestigasyon, nasayran nga sa wala pa ang insidente, nakig-inom ang biktima uban sa mga higala sa maong adlaw.

Ang Sumilao MPS nagpahigayon og imbestigasyon aron matigom ang mga pamahayag sa saksi ug mangolekta og dugang ebidensiya nga mahimong mahinungdanon sa pagpasaka og kaso batok sa (mga) suspek. (Omar Rashid Z. Abdullah)