Wednesday, April 09, 2025

Author: Omar Rashid Z. Abdullah

Oplan Paglilinis sa Pulangui Riverside Boulevard sa Valencia, nagmalampuson

Posted on by Omar Rashid Z. Abdullah

Malampuson nga napahigayon sa dakbayan sa Valencia ang Oplan Paglilinis sa Pulangui Riverside Boulevard

Base sa pahibalo sa City Government of Valencia, ang maong kalihokan gipahigayon niadtong Mayo 26, 2023.

Ang Valencia City Government Employees Union (VCGEU) aktibo nga mipartisipar sa napahigayon nga clean-up drive.

Pagahimoon matag katapusang biyernes sa bulan ang maong kalihokan sa katuyoan nga mapadayon ang pagtabang sa paglimpyo sa palibot ug pagpreserbar sa kinaiyahan.

Nahimo usab nga malamposon ang aktibidad pinaagi sa pakigtambayayong sa nagkalain-laing buhatan ug ahensiya sa gobyerno. (Omar Rashid Z. Abdullah)

Php60k kantidad sa droga, nasakmit sa Malaybalay

Posted on by Omar Rashid Z. Abdullah

Nikabat sa Php60,000.00 nga kantidad sa gidudahang droga ang nasakmit sa hiniusang pwersa sa kapolisan sa Purok 2, Barangay 9, Malaybalay City, Bukidnon

Base sa report nga nahipos sa Bukidnon Police Provincial Office (PPO), ang suspek giila nga si Jabar Pazaulan y Umpar, PNP/PDEA Regional Level High Value Individual (HVI) Top Priority List no. 10), 47, ug minyo.

Siya nakorner sa iyang panimalay kaniadtong Mayo 18, 2023.

Nakorner siya sa gipahigayon nga search and seizure warrant sa kapolisan.

Nasakmit gikan sa suspek ang upat ka peket sa gidudahang shabu nga adunay gibana-bana nga kabug-aton nga 10 gramos.

Ang suspek gidala sa Malaybalay City Police Station alang sa hustong disposasyon.

Kasong paglapas sa article II, section 11 & 12 of RA 9165, ug RA 10591 ang giandam batok kaniya. (Omar Rashid Z. Abdullah)

Ordinansa sa pag implementar sa komunal garden sa kabarangayan, gi-aprobahan sa SP Malaybalay

Posted on by Omar Rashid Z. Abdullah

Gi-aprobahan na sa Sangguniang Panlungsod ang Ordinance No. 1016 S 2023

Base sa pahibalo sa City Government of Malaybalay, ang Ordinansa kabahin sa pag implementar sa komunal garden sa kabarangayan dinhi sa siyudad.

Kaniadtong Marso 14, 2023, unang giduso ni Hon. Councilor Alan Ryann O. Legaspi, Chairman on the Committee on Agriculture ang mahitungod sa maong ordinansa.

Pinasubay kini sa Department of Interior and Local Government (DILG) Memorandum Circular No. 2023-001 nga mao ang implementasyon sa Halina’t Magtanim ng Gulay at Prutas sa Barangay Project.

Ang tumong ug tinguha sa nasangpit nga Memorandum Circular nga ma giyahan ang kabarangayan sa pagtukod sa maong komunal garden aron matabangan ang katawhan labi na sa panginahanglanon sa pagkaon. (Omar Rashid Z. Abdullah)

2 buhatan sa LGU Valencia, gipasidunggan

Posted on by Omar Rashid Z. Abdullah

Gipasigarbo sa buhatan sa City Assessor ug City Treasurer ang mga pasidungog nga nadawat niini atol sa monthly convocation program sa lokal nga kagamhanan niadtong Mayo 8, 2023

Lakip sa nadawat ang pasidungog nga nahimong Top 4 ang Valencia City sa tibuok siyudad sa Rehiyon 10 mahitungod sa maayong perpormans sa City Assessor’s Office, sa pagpangulo ni Arnold Azucena, sa pagpasilitar sa real property appraisal ug assessment operation alang sa tuig 2022 atol sa Gawad Tagatasa nga programa sa Bureau of Local Government Finance (BLGF) Region 10.

Dakong kalamposan usab nga nahimong Top 3 sa Highest Nominal Locally-Sourced Revenue Collection alang sa tuig 2022 ang City Treasurer’s Office (CTO), sa pagpangulo ni Carlos Caro Jr., atol sa Gawad Ingat-Yaman sa BLGF Region 10.

Laing pasidungog usab gikan sa Provincial Government sa Bukidnon ang nadawat sa CTO human kini nga nakakuha og 120% Real Property Tax Collection efficiency sa tuig 2022. (Omar Rashid Z. Abdullah)

Matag tuig nga panaw sa “Panalawahig” sa Tribung Bukidnon, padayon nga gihuptan

Posted on by Omar Rashid Z. Abdullah

Padayon nga gihuptan sa katawhan sa “kaulo ta Tagoloan” sa tribu sa Bukidnon ang “Panalawahig”

Base sa pahibalo sa lokal nga panggamhanan sa Bukidnon, ang Panalawahig isa ka tinuig nga panaw alang sa tradisyonal nga pag-ampo nga gihimo sukad pa sa karaang panahon.

Kini walay hunong nga gipahigayon sa Bukidnon-Tagoloanon didto sa Sabangan, Barangay Can-ayan, Malaybalay City, Bukidnon, sugod Abril 30 hangtud Mayo 1.

Si Atty. Burt M. Estrada nga naila usab nga “Datu Manhan-ayan”, ang tribal elder sa Bukidnon-Tagoloanon, nibutyag nga ang “tulondanon” o sagradong lugar nahimong sentro alang sa “panundan” o pilgrimage matag tuig sa tribu.

Sa mga gasa ug grasya gikan kang Magbabaya angayan lamang pasalamatan pinaagi sa maong kalihukan nga nagdala sa tema: “Bungkatol ha Bulawan Dugaan hu Kalandagan daw Kaohangan”, kung aha gitamud sa tribu ang pagkinabuhi gayud sa mapadayonong “pagkinahura” o respituhanay ug pagsinabtanay sa usa’g-usa. (Omar Rashid Z. Abdullah)

Php41k kantidad sa shabu, nasakmit sa Don Carlos

Posted on by Omar Rashid Z. Abdullah

Mukabat sa Php41,300.00. nga kantidad sa gidudahang shabu ang nasakmit sa mga kapolisan sa gipahigayon nga drug buy-bust operation niadtong Abril 28, 2023 sa P-6a, Poblacion Sur, Don Carlos, Bukidnon

Ang suspek naila nga si Marjun Ayunar Y Igcalinos alyas “Papo Ayunar”, watch listed, 31, adunay kapuyo, painter, ug residente sa maong dapit.

Si Police Maj. Patrick D. Castro, OIC sa Don Carlos Municipal Police Station, nisulti sa iyang report nga nasakmit gikan sa suspek ang 3 pakete sa gidudahang shabu.

Ang droga gibana-bana nga mutimbang og 6.0735 gramos.

Ang suspek gidala sa Don Carlos MPS alang sa hustong disposasyon.

Kasong paglapas sa R.A.9165 ang giandam na batok sa suspek. (Omar Rashid Z. Abdullah)

Pag-ebalwar sa mga barangay sa Valencia, gisugdan na

Posted on by Omar Rashid Z. Abdullah

Gisugdan na ang pag-ebalwar sa mga kabarangayan sa dakbayan sa Valencia alang sa Seal of Good Local Governance for Barangays (SGLGB) niadtong Mayo 2, 2023

Ang City Government of Valencia nipahibalo nga napahigayon kini sa Barangay Tugaya ug Barobo, sa pagpanguna sa DILG Valencia kauban ang SGLGB Team nga gilangkoban sa nagkalain-laing opisina ning lokal nga pangagamhanan.

Ang SGLGB isa ka award ug incentive program ug progresibong sistema sa pag-ebalwar sa perpormans sa pagdumala sa mga kabarangayan sa siyudad.

Mahimong maangkon sa barangay ang maong award kung mapasar niini ang tulo ka Core Areas nga mao ang Safety, Peace, and Order, Financial Administration and Sustainability, ug Disaster Preparedness ug isa sa Essential Areas nga mao ang Social Protection and Sensitivity, Business-friendliness and Competitiveness, ug Environmental Management. (Omar Rashid Z. Abdullah)

1st Gov. Rogelio Neil P. Roque Cup gipahigayon sa Bukidnon

Posted on by Omar Rashid Z. Abdullah

Malampusong napahigayon sa Probinsya sa Bukidnon ang 1st Shooting Competition Governor Rogelio Neil P. Roque Cup, nga gipasiugdahan sa kagamhanang probinsyal ug Jaguar Alpha Ten Gun Club INC. (JAGCI), Abril 15-16, 2023, sa Poblacion, Pangantucan, Bukidnon

Sa pagpahigayon sa pagpadula nitambong si Governor Roque, Vice Governor Clive D. Quiño ug Board Member Armando S. Evangelista nga maoy committee chair sa maong dula. Kini base sa kasayuran nga nakuha gikan sa Provincial Government sa Bukidnon.

Ang mga partisipante misalmot sa pipila ka category.

Ang IPSC Division Open category sa maong competition gilangkuban sa, Standard, Production, Classic, Production Optics, PCC Top 3, ug Mini Rifle Top 2.

Samtang ang IPSC Categories Senior Category gilangkuban sa Classic, Open, Production, ug Standard.

Sa Super Senior Category, adunay Open ug Standard.

Sa Junior Category, adunay Classic, Production, ug Standard.

Ang Lady Category, gilangkuban usab sa Classic, Open, Production, ug Standard.

Sa Special Categories, adunay Executive PCC.

Aduna usab Lawman Classic, Lawman Production, Lawman Standard, RO Classic, RO Production, RO Standard, ug Classic .45 (8 rounder). (Omar Rashid Z. Abdullah)

 

2 ka Watch listed nakuhaag droga sa Don Carlos

Posted on by Omar Rashid Z. Abdullah

Duha ka watch listed ang nakuhaag droga sa kapolisan sa gipahhigayon nga drug buy-bust operation sa P-2, Brgy. Sinangguyan, Don Carlos, Bukidnon, kaniadtong Abril 7, 2023

Ang mga nasikop giila nga si Amer Obligado y Balangitao, 27, minyo, mag-uuma ug si Angel Obligado y Sumalinog, 22, minyo ug parehong residente sa P-6, Brgy Kili-kili, Wao, Lanao Del Sur.

Nasakmit gikan sa mga arestado ang tulo ka pakete sa gidudahang shabu nga adunay gibug-aton nga 15.147gramo ug gibana-bana nga nagkantidad og Php103,000.00.

Gisulti ni Police Major Patrick D. Castro, OIC sa Don Carlos Municipal Police Station nga ang mga nasikop gidala sa buhatan alang sa hustong disposasyon.

Kasong paglapas sa RA 9165 ang giandam batok sa mga suspek. (Omar Rashid Z. Abdullah)

Oplan alis galis gipahigayon sa Valencia

Posted on by Omar Rashid Z. Abdullah

Gipahingusgan ang kampanya batok scabies sa dakbayan sa Valencia pinaagi sa Scabies Treatment and Response kaniadtong Abril 3, 2023 sa pipila ka mga barangay niini

Base sa pahibalo sa lokal nga panggamhanan, ang maong operasyon gipangunahan sa City Health Office – Epidemiology Disease Surveillance and Research Division ug Disease Surveillance Team sa dakbayan.

Adunay libreng checkup ug alis-galis kits ang nadawat sa mga residente nga nataptan sa maong sakit sa panit.

Ang CHO nanguna usab sa paghisgot ug pagpanghatag og Information, Education, and Communication (IEC) materials ngadto sa mga residente kalabot sa paglikay sa maong sakit.

Gipangunahan usab sa Environmental Sanitation and Occupational Health Services Division ang pag-disinfect sa pipila ka mga tunghaan sa kabarangayan aron masiguro ang pagpuo sa mga parasite nga hinungdan sa maong sakit. (Omar Rashid Z. Abdullah)