Hugtanon nga gihimakak sa isa ka barangay kapitan sa munisipyo sa Impasug-ong ang paghupot sa armas

Ang kapitan sa Barngay Sayawan nga si Ornico Balutic Sumente, sa isa ka press conference niadtong Hunyo 27, 2023, niingon nga wala siyay armas sa iyang panimalay.

Ang presscon nahigayon sa Provincial Planning and Development Office (PPDO) pasado alas dos ang takna sa hapon, mga siyam ka oras human sa raid.

Ang iyang pamahayag nahigayon human sa raid nga gihimo sa Criminal Investigation and Detection Group (CIDG) – Bukidnon.

Nasayran nga gi-raid sa CIDG ang panimalay sa kapitan niadtong Hunyo 27 sa alas singko ang takna sa buntag.

Ang raid napatuman pinasubay sa search and seizure warrant order nga gimando sa Presiding Judge sa RTC 10, Branch 10, Malaybalay City, nga si Huwes Isobel Barroso, pinetsahan Hunyo 19, 2023.

Sumala pa, si Barangay Kapitan Sumente naghupot og shotgun, .45 nga pistola, ug kalibre .38 nga revolver nga nahimong basehan sa nahigayon nga raid.

Apan, ang CIDG walay nakita bisan isa ka armas sa panimalay sa kapitan.

Dugang sa pamahayag ni Sumente nga wala siyay naka-away ug politika ang iyang gitumbok nga posibleng hinungdan sa raid kay lage nahimo man siyang kapitan sa barangay duol na sa isa ka dekada. (MG Mayumi B. Madera)