Nagmalampuson ang groundbreaking ceremony nga gipahigayon kaniadtong Hulyo 23, 2025, didto sa Sitio San Roque, Pigtauranan, Pangantucan, Bukidnon

Matud sa Facebook post sa Local Government Unit sa Pangantucan, ang seremonya alang sa P33-million Farm-to-Market Infrastructure (MFI) Project nga adunay title nga “Improvement of Farm-to-Market Road Project at Sitio San Roque – Sitio Lantawan, Pigtauranan, Pangantucan, Bukidnon.”

Ang pondo sa maong proyekto adunay kinatibuk-ang budget nga mokabat sa kapin ₱33 milyon nga gipondohan gikan sa RAPID Growth Project, pinaagi sa panagtambayayong sa LGU Pangantucan ug sa Department of Trade and Industry (DTI).

Gilauman nga pinaagi niini nga programa, makongkreto na ang dalan nga nagkonekta sa Sitio San Roque ug Sitio Lantawan sa Barangay Pigtauranan.

Giablihan ang maong seremonya pinaagi sa usa ka ritual nga gipangunahan sa mga Tribal Elders sa Lumadnong Komunidad sa Pigtauranan. Human niini, nisunod gilayon ang groundbreaking ceremony isip timaan sa pormal nga pagsugod sa pagpatuman sa maong proyekto.

Nitambong sa kalihokan ang mga representante ug kadagkuan sa DTI Regional Office 10 ug DTI Bukidnon Provincial Office; mga representante sa DILG Regional ug Provincial Office; mga opisyales sa Barangay Pigtauranan; mga personahe sa project contractor; mga kaigsuonang lumad ug katawhan sa Pigtauranan; mga opisyales sa Pangantucan nga gipangunahan ni Municipal Mayor Manolito G. Garces, kauban ang mga myembro sa Sangguniang Bayan nga pinangulohan ni Municipal Vice Mayor Edward E. Hernandez; ug ang mga kawani sa LGU Engineering Office nga gipangulohan ni Municipal Engineer Julie M. Florita. (melbmadera)