Kaniadtong Setyembre 1, 2025, gisaulog sa katawhan sa Bukidnon ang ika-111 ka tuig nga katukoran sa probinsya

Isa ka socio-civic parade ang gipahigayon sa national highway sugod ubos sa Pine Hills Hotel sa Barangay Sumpong, liko sa Riza Street, padulong sa Capitol kon Kaamulan Grounds.

Didto gipahigayon ang hoisting of colors ug gisundan sa isa ka programa nga gipangunahan ni Gobernador Rogelio Neil P. Roque.

“Tuohi nga ang labing maayo alang sa Bukidnon anaa pa sa unahan. Kung ang miaging 111 ka tuig gipahinungod sa kaluwasan ug pagtubo, ang mosunod nga mga tuig unta mahimong bahin sa kadak-an ug kausaban. Magkahiusa, ipakita nato sa kalibutan nga ang Bukidnon dili lamang isa ka lugar sa mapa, kondili isa ka nagdan-ag nga ehemplo sa makab-ot pinaagi sa panaghiusa, pagtuo, ug pagpaningkamot,” mensahe ni Roque.

Ang kasaulogan ning tuig nagdala sa tema nga “Bukidnon at 111 years: Empowering generations, sustaining our legacy.”

Nunot sa kasaulogan, una nang natigayon ang mga kalihokan sama sa fun run, 4×4 off-road challenge, shooting competition, night café, volleyball, ug uban pa.

Non-working holiday sab sa Bukidnon sa maong adlaw.

Ang Bukidnon, isip kanhi munisipyo sa Misamis, opisyal nga nahimong isa ka probinsya niadtong September 1, 1914, pinasikad sa Act No. 2408. (melbmadera)