Nagkatapok ang kababayen-an sa probinsya sa Bukidnon alang sa gipasiugdahan nga parada sa Provincial Women’s Summit ning tuig 2023, subay sa Women’s Month Celebration sa tibuok nasud nga nagdala sa tema “WE for gender equality and inclusive society”, Marso 9, 2023 sa
syudad sa Malaybalay, Bukidnon.

Gisaulog ang Women’s Month isip panahon nga pahinungdan ang mga babaye ug pag-ila sa ilang mahinungdanong kontribusyon sa kasaysayan ug sa talagsaong mga hagit nga ilang giatubang.
Sa maong okasyon, gipadangat ni Provincial Governor Rogelio Neil P. Roque ang iyang pagsaludo sa kababayen-an, sa kaniadto ug sa kasamtangang panahon. Gani, gipadayag niini ang iyang bersyon sa panultihon nga “Behind the success of every great woman, are men who failed to put her down”.
Karong tuig, nahimong dinapit nga bisita sa maong selebrasyon si Senator Cynthia Villar kinsa mipadangat sa iyang pagsuporta sa kababayen-an alang sa kalihukang pang-agrikultura.
Human sa pakigpolong ni Senator Villar sa maong tigum, midiritso ang senadora ngadto sa Luyungan Indigenous People High School ug nakighimamat sa mga magtutudlo ug kabataang IP.
Nagkadaiyang mga programa ug mga kalihokan sa tibuok bulan sa Marso ang gihan-ay alang sa mga babae, sama sa mga webinar and forum, arts and cultural exhibit, ug mga tigum alang sa maayong panglawas ug kahimsog.
Ang pagsaulog sa Women’s Month sa Pilipinas nagsugod niadtong 1988 pinaagi sa Proclamation No. 224 nga nagproklamar sa unang semana sa Marso isip Women’s Week. Kini sa ulahi gipalapdan sa tibuok bulan aron ipasiugda ang paghatag-gahum sa kababayen-an ug gender equality. (PR)