Sa dili madugay ipatuman sa Dakbayan sa Malaybalay ang programa nga giilang “Go Urban Gardening: Making Food Available (GUGMA).”

Nahitabo kini human gi-aprobahan na sa Sangguniang Panlungsod (SP) ang Resolution No. 2024-0585, isa ka Memorandum of Agreement (MOA) tali sa City Government of Malaybalay (CGM) ug sa Department of Agriculture (DA) pinaagi sa Agricultural Training Institute-Regional Training Center 10 kabahin sa pagpatuman sa GUGMA program.

Human sa masusing pagtuon, atol sa ika-74 nga regular session niadtong Enero 9, 2024, giduso ni Konsehal Alan Ryann O. Legaspi ug hiniusang giuyonan sa Konseho nga pagahatagan og pagtugot ang Mayor sa pagsulod sa nasangpit nga MOA.

Si City Mayor Jay Warren R. Pabillaran ang nag-endorso ngadto sa SP uban sa paghangyo nga pagatugutan siya sa pagsulod sa isa ka kasabutan aron mapatuman ang maong programa.

Ubos sa administrasyon ni Mayor Pabillaran, siya nag-aghat ug nag-promote sa urban agriculture aron matabangan ang panginahanglanon sa pagkaon, molambo ug maprotektahan ang kinaiyahan pinaagi sa paglatag sa eco-friendly nga pamaagi sa pag-garden.

Ang DA makipagtimbayayong sa CGM sa pag-implementar sa nasangpit nga programa nga mahatagan og kapasidad ang komunidad labi na dinhi sa urban area nga makahimo og isa ka healthy garden. (SP-NADA/melbmadera)