Gipahigayon niadtong Abril 21–22, 2026, ang Northern Mindanao Regional Innovation Program and Exhibit (NorMinRIPE) 2026 sa Robinsons Place Valencia sa Valencia City, diin nagkatigum ang mga stakeholders gikan sa tibuok Northern Mindanao aron palig-onon ang innovation ug kalihokang ekonomiya sa rehiyon

Usa sa mga highlight sa kalihokan mao ang pagpirma sa Memorandum of Understanding ubos sa Smart and Sustainable Communities Program tali sa Department of Science and Technology Region 10, LGU Valencia, ug Municipality of Maramag, nga nagtumong sa pagpatuman sa innovation-driven solutions alang sa mas episyente ug data-driven nga mga komunidad.

Ubos sa kasabutan, maghatag ang DOST-10 og technical ug financial assistance, samtang mipasalig ang mga partner LGUs sa paghatag og datos, focal persons, ug counterpart funding aron masiguro ang epektibong implementasyon sa mga programa.

Gipasiugda usab sa kalihokan ang mga session, panel discussions, ug technology exhibits nga naghatag og luna sa kolaborasyon tali sa gobyerno, academe, ug industriya, ilabi na sa pagpalig-on sa partnerships, pagsuporta sa startups ug MSMEs, ug pagpalambo sa paggamit sa teknolohiya alang sa malungtarong kalamboan sa rehiyon.

Sa press conference, si Mylah Faye Aurora Carino, regional director sa Department of Economy, Planning, and Development Region 10, mipahayag nga ang NorMinRIPE usa ka tinuyo ug kolektibong paningkamot sa paghubad sa siyensya, teknolohiya, ug kabag-ohan ngadto sa inklusibo ug tinuod nga pag-uswag sa ekonomiya.

Ang kalihokan gipangulohan sa Regional Research, Development and Innovation Council 10, diin ang DEPDev-10 ang nanguna nga convenor, kuyog ang Department of Information and Communications Technology Region 10, Department of Trade and Industry Region 10, Oro Chamber, ug LGU Valencia isip mga ka-convenor. (melbmadera)