Isa ka Dairy processing plant nga adunay kinatibuk-ang balor nga PhP11,224,221.10 ang gitukod sa Bukidnon

Gipahigayon ang Product Launching ug Turn-over sa Dairy Processing Plant (DPP) sa Brgy. Dalwangan, Malaybalay City niadtong Nobyembre 30, 2023.

Ang proyekto gihimo alang sa Dalwangan Malaybalay United Dairy Agrarian Reform Cooperative (DAMAUDARC).

Mitambong sa kalihokan ang gikan sa National Dairy Authority- Northern Mindanao nga gipangunahan ni Department Manager Mr. Jester John P. Jadap, DOST-X Regional Director Engr. Romela N. Ratilla, Engr. Arlene P. Almo gikan sa POC Bukidnon, ug Ms. Jacqueline Julia Lagamon, acting Provincial Agriculturist.

Diha usab si City Mayor Jay Warren R. Pabillaran ug pipila ka mga miyembro sa 9th Sanggunian, City Agriculture Office-OIC Engr. Richard B. Leono, City Nutritionist Ms. Eza
Canonigo, CAFC Chairperson Mr. Leonard O. Leyros, DAMAUDARC BODs, Punong
Barangay sa Dalwangan nga si Royville G. Pasco, department heads, mga stakeholders, ug ni
former city agriculturist Ms. Remedios R. Sarzuelo.

Si Leono mi-presentar og isa ka video presentation mahitungod sa estado sa DPP.

Nasayran nga ang DPP mibalor sa PhP11,224,221.10.

Ang PhP1,640,000.00 sa pondo gikan sa Department of Science and Technology (DOST), PhP 4,080,000.00 ang gikan sa Department of Agriculture BUB Fund, ug PhP 5,504,221.10 nga kantidad ang gikan sa Local Government Unit (LGU) sa dakbayan.

Gihagit ni Pabillaran sa iyang mensahe ang organisasyon nga lig-onon nila ang ilahang kooperasyon aron malungtaron ang maong proyekto.

Dugang niya nga importante ang pag-tinabangay sa matag-usa ug importante usab ang pinansyal nga aspeto sa grupo nga mamaayo ang pagdumala niini.

Kini, ingon ni Pabillaran, isa sa mga mamahimong hinungdan sa kalamposan sa DPP.

Ang kanhi city agriculturist nga si Sarzuelo mipaambit usab ug isa ka background kung giunsa pagsugod og mugna ang DPP.

Mihatag siya sa dakong pasigarbo nga human sa isa ka dekada nga pagproseso sa mga papeles sa maong proyekto nahuman na kini.

Ingon niya nga nabati na gyud ang kalampusan ug natukod na ang maong pasilidad uban niini ang mga makinarya ug gamit sa pagproseso sa gatas. (Chloe Jean B. Beronilla/melbmadera)