Nakuha ang P795,600.00 nga kantidad sa gidudahang shabu sa buy-bust operation sa Purok 2, Brgy. Bang-bang, Kalilangan, Bukidnon, gabii sa Setyembre 3, 2025

Si Police Captain Romeo M. Arcilla, OIC sa Kalilangan Municipal Police Station (KMPS), sa iyang report, niila sa lalaking 37-anyos nga suspek nga si alyas “Pong-Pong,” kinsa giilang isa ka high value individual.

Gawas sa nasakmit nga illegal nga droga, nasakmit sab sa Kalilangan MPS gikan sa suspek ang isa ka selpon, isa ka pouch, P1,220.00 cash, pitaka, driver’s license, ug motorsiklo lakip ang ignition key niini.

Ang nadakpan nga personalidad anaa sa kustodiya sa Kalilangan MPS alang sa dokumentasyon ug husto nga disposisyon.

Mga kaso sa paglapas sa Article II, Sections 5 ug 11 sa R.A. No. 9165 ang giandam na batok sa nadakpan nga suspetsado.

Ang mga nakumpiskang droga gidala sa Provincial Forensic Unit sa Malaybalay City alang sa qualitative ug quantitative nga eksaminasyon.

Si Police Col. Jovit L. Culaway, provincial director sa Bukidnon Police Provincial Office, nagpahayag sa iyang pagdayeg sa kalamposan sa personnel sa Kalilangan MPS. (Diego M. Hidalgo)