Hugtanong gisuportahan sa 27th Sangguniang Panlalawigan (SP), pinaagi sa Resolution No. 2023-1143(27th SP), ang House Bill No. 3488 nga giduso ni 3rd District Representative Jose Ma. R. Zubiri, Jr., isa ka balaod nga nagtugot sa paghatag og retirement benefits ngadto sa tanang elective or appointive barangay officials nga nagserbisyo sulod sa siyam ka sunod-sunod nga tuig o tulo ka termino

Ang mga barangay officials mao ang sukaranang haligi sa pagdumala sa publiko, sanglit sila man ang diha-diha nga naghatag sa mga panginahanglanon sa ilang ginsakupan sa mas dali nga panahon. Bisan niana, kini nga mga barangay officials wala mahatagan sa igong benepisyo, hinungdan nga wala usab sila’y kapasidad nga makatipig alang sa ilang mga pangilanahanglanon.

Tungod niini nga realidad, daghan sa mga barangay officials ang nanlimbasug nga mabuhi human sa ilang serbisyo nga walay social security ug napugos sa pagpangita og mga alternatibong panginabuhian alang sa ilang inadlaw-adlaw nga galastuhan, imbes nga magtagamtam sa benepisyo nga ilang makuha sa pila ka tuig nga pagserbisyo sa publiko.

Ang House Bill No. 3488 o gitawag nga Barangay Officials Retirement Benefits Act of 2022 gipasaka niadtong Agosto 10, 2022 sa House of Representatives (19th Congress) ug gi-refer ngadto sa Committee on Local Government niadtong Agosto 15, 2022, diin mao usab kini ang panglantaw ni Senate President Juan Miguel F. Zubiri, kinsa nagpalabang ug Senate Bill No. 306 (18th Congress) alang sa susamang katuyuan. Busa, ang barangay official nga adunay katungod ubos niini nga lakang, makakuha ug monthly pension nga dili mo-ubos sa 65% sa iyang monthly average nga honoraria, allowances, ug ubang klase sa benepisyo nga gitugot sa balaod o ordinansa sa syudad, lungsod o sa barangay.

Sa higayon nga socialy secure ug stable na kining mga barangay officials, mas mapalig-on pa ang ilang pagpanerbisyo sa publiko, sa ingon nga ang gobyerno makahimo na usab sa pagdasig sa mas epektibo nga pagpangatungdanan diha sa 42,046 ka mga barangay sa tibuok nasud sa Pilipinas. (PR)