Gihisgutan ang pagprotekta, pagpreserba ug pagpanalipod sa interes og katungod sa Indigenous Cultural Communities (ICCs)/Indigenous Peoples (IP) sulod sa probinsya sa Bukidnon, pinaagi sa kalihukan sa Kaamulan nga Pag-amol-amol daw Pagdaowa hu mga Tumindok (Kaamulan) niadtong Abril 4, 2023, sa Kaamulan Open Theater, Malaybalay City, Bukidnon

Uban sa tema nga “Bunsuda daw Bigula hu Kagdapeta” (Kaamulan Indigenous Peoples Assembly), gisiguro sa maong panagtigum nga mapasabot sa mga hingtungdan ahensya sa gobyerno ngadto sa lumadnong komunidad ang ilang mga katungod ug obligasyon ilabi na sa pagpreserba sa ilang kultura sanglit ang Bukidnon puy-anan sa pito ka tribu nga mao ang Higaonon, Bukidnon, Umayamnon, Manobo, Matigsalug, Tigwahanon ug Talaandig.

Sa maong tigum sa pitu ka tribu, gipalawom ang hisgutanan sa Indigenous People’s Rights Act (IPRA) ug ang implikasyon niini sa kinabuhi sa IP, polisiya ug disposiyon sa pagdumala sa mga ancestral domain, ingon man ang pahisgot sa gipasalig nga programa ug serbisyo alang sa ICCs/IPs aron mahimo silang lig-on, aktibo, ug manginlabot gayud sa mga butang may kalabutan sa ilang komunidad o katilingban.

Mitambong niini sila si NCIP Commissioner Northern and Western Mindanao Atty. Pinky Grace Pareja, NCIP Regional Director Atty. Leslie Mae F. Plaza, kauban ang Provincial/City/Municipal ug Barangay IPMRs nga gipangulohan ni Provincial IPMR Arbie Saway Llesis, ancestral domain (AD) representative ug IPs, ug PGO-IAD nga gipangulohan ni Stephanie Melendez, kinsa nagrepresenta usab kang Provincial Governor Rogelio Neil P. Roque. (LGU Bukidnon)