Isa ka ground breaking ceremony ang gipahigayon sa LGU Valencia City alang sa pagtukod og Multi-Purpose Building Phase 1 sa bag-ong City Agriculture Office nga adunay Training Center niadtong Enero 25, 2024

Sumala sa kasayoran sa LGU Valencia, ang proyekto nahimutang sa Purok 1, Brgy. Pinatilan.

Ang groundbreaking ceremony isa ka pagmatuod nga pagasugdan na ang maong proyekto.

Dakong kalamposan alang kang Mayor Azucena P. Huervas ingon man ni City Agriculturist Connie Dalangan nga masugdan ang pagpatukod sa maong bag-ong opisina aron mas mapalig-on ang paghatod og serbisyo alang sa mga mag-uuma.

Pasiuna usab ang pagtukod sa maong pasilidad nga nagkantidad og muabot sa P15 milyon ubos gikan sa 20 percent Local Development Fund.

Mahimutang ang proyekto sa 14 ektaryas nga luna nga puhon pagatukuran usab og Post Harvest Facilities sama sa rice mill ug sa Techno-Demo Farm, uban sa tingoha nga mahimo ang maong dapit nga agritourism destination sa dakbayan.

Gipaabot usab ni Vice Mayor Atty. Teodoro Roteo Pepito ang pagsuporta sa 9th Sangguniang Panlungsod, diin matod niya, dako usab og ikatabang ang bag-ong opisina, sanglit aduna na kiniy Training Center nga makahatag og dugang kahibalo ug kalamboan sa mga mag-uuma.

Dako usab ang pagsalig ni Mayor Huervas sa contractor sa proyekto nga mao ang Arbul Builders and Construction Supply, sa pagpanguna ni Engr. Allen Bula, nga tumanon niini ang pagtukod sa dekalidad nga pasilidad subay sa plano nga pagkumpleto niini sulod sa walo ka bulan.

Nahimong mabungahon ang pagpahigayon sa seremonya pinaagi usab sa pagsuporta ug presensya nila City Councilor Rogelio Hera, Jr., nga mao usab ang Committee Chair on Agriculture, Councilor Cecile Mabao-Caballero, Councilor Sasang Cadigal-Recla, IPMR Bae Irene Pandian, SK Federation President John Legeil Estoquia, mga Department Heads, IP Leaders, City Events Committee, ug mga personahe sa City Agriculture Office. (Omar Rashid Z. Abdullah)