Gipahigayon sa Lokal nga Pangagamhanan sa Valencia City, Bukidnon ang usa ka seremonya alang sa padayon nga konstruksyon sa Dialysis Services Center kaniadtong Nobyembre 20, 2025

Sumala sa Facebook post sa City Government of Valencia, ang pasilidad mahimutang tapad sa CHO Annex Building nga anaa sa Daang German Doctors Building sa Barangay Poblacion.

Si Mayor Amie Galario ang nanguna sa kalihokan kauban ang 10th Sangguniang Panlungsod ubos sa pagpangulo ni Vice Mayor Greizl Galario-Fernandez.

Anaa usab ang mga medical professionals kauban si City Health Officer Dr. Michael Escalante ug Dra. Karen Solidor, nga nagpaabot sa kahinungdanon sa maong pasilidad alang sa mga pasyente nga nagkinahanglan og regular nga dialysis treatment.

Diha usab ang mga representante sa Aguanta Medical, Ajora Via Medical, ug American Dialysis Group, nga mga partner stakeholders sa lokal nga pangagamhanan, nga motabang sa pagpadayon ug paghuman sa konstruksyon sa pasilidad ug sa pagdumala sa Dialysis Services Center.

Gilauman nga ang pagtapos sa proyekto maghatag og dako nga kaayohan sa komunidad, pinaagi sa paghatag og mas accessible, duol, ug episyenteng serbisyo medikal alang sa mga pasyenteng nanginahanglan og dialysis. (melbmadera)