Gipahigayon ang site validation ug verification sa PatPat VIGO Cluster Livestock Farmers Association

Tumong aron masuta nga mamahimong benepisyaryo sa Carabao Project ubos sa Livestock Economic Enterprise Development Program nga nagkantidad og ₱2.6 milyon kaniadtong Setyembre 3, 2025, sa Barangay Patpat, Malaybalay City, Bukidnon.

Ang kalihokan gitambungan ni Mr. Johnson C. Petalcurin gikan sa Department of Agriculture – Field Operations Division ubos sa National Livestock Program ug ni Dr. Omar T. Cahanap sa City Veterinary Office – Livestock Program.

Aktibo usab nga nisalmot ang mga miyembro sa asosasyon nga gipangulohan ni President Gary D. Campomanes.

Lakip sa gihisgutan atol sa validation ang mga responsibilidad nga ipapanday sa umaabot nga Memorandum of Agreement (MOA) tali sa asosasyon ug sa nagdumala nga ahensya.

Gipahigayon ang maong kalihukan aron masiguro nga ang asosasyon nakatuman sa mga rekisitos aron mahimong kwalipikadong benepisyaryo sa proyekto.

Ang Carabao Project nagtinguha sa pagpalig-on sa produksiyon sa kahayupan, paghatag dugang panginabuhian sa mga mag-uuma, ug pagpalambo sa lokal nga ekonomiya pinaagi sa suporta sa gobyerno.

Kini nga inisyatiba nagpakita sa lig-on nga paningkamot sa Department of Agriculture ug sa City Government of Malaybalay sa pagpahigayon og mga programa nga makapahimulos sa sektor sa panguma ug maghatag dugang oportunidad sa mga komunidad. (pr)