Sunday, May 28, 2023

Panid Bisaya

Social services sa Valencia gipalig-on pinaagi sa programang Enhanced Hatod Serbisyo sa mga Valencianos

0

Central Mindanao Newswatch - local newspaper

Share this post?

Mas gipalig-on nga paghatod serbisyo sa katawhan, mao kana ang patugbaw sa Enhanced Hatod Serbisyo sa mga Valencianos nga programa sa lokal nga pangagamhanan sa Valencia sa pagpangulo ni Mayor Azucena P. Huervas

Gipasabot ni Abe Gillaco, Department Head sa Human Resource and Management Office, ang tumong ug tingoha sa maong programa atol sa kalihokan nga gipahigayon niadtong Abril 17, 2023 sa City Hall covered court.

Sa maong programa, ang mga serbisyo nga ginapatuman ubos sa Ordinance No. 34-2011 ug Resolution No. 264 series of 2017 nga mao ang medical, educational, ug burial assistance ingon man ang Assistance to Families in Crisis Situation (AICS) karon mas gipadali ang pagproseso ug gipaduol sa katawhan.

Lakip sa gipatuman ang pag-organisa sa mga point person, nga gilangkoban sa mga personahe sa LGU, nga gitahasan nga maoy magtabang sa pagmonitor sa ilang komunidad ug magreport sa Hatod Serbisyo Team kung adunay mga hingtungdan nga kinahanglan tabangan.

“Kung adunay pasyente nga gusto magpadala sa ospital, ang point person na ang mutabang og tawag sa headquarters aron adunay masakyan ang pasyente,” segun ni Gillaco diin dugang usab niya nga ang pag-organisa sa mga point person pamaagi usab nga madugangan ang mga personahe nga magaserbisyo sa komunidad.

Dako usab ang papel sa Hatod Serbisyo Team sanglit sila na dayon ang mutabang sa mga hingtungdan sa pagproseso sa pagkuha sa ilahang pinansyal nga ayuda gikan sa lokal nga pangagamhanan.

Alang usab sa burial assistance, kaniadto maghatag lang sa maong ayuda ug materiales apan karon, mismo ang team na ang maghatod sa maong mga gamit nga kinahanglan.

“Gikan sa balay padulong hospital hangtod sa pag uli sa balay sa pasyente alagaran sa hatod serbisyo team. Gikan usab sa balay sa pasyente hangtod sa katapusan niyang pahulayan alagaran gihapon sa hatod serbisyo team,” matod ni Gillaco diin dugang pa niya nga konsepto sa programang Enhanced Hatod Serbisyo sa mga Valencianos ang “Silingan ko panggaon ko ug tabangan ko.”

Base usab sa impormasyon sugod Pebrero ning tuig, mikabat na sa 598 ang natabangan sa maong programa.

Suportado usab ni Retired DILG Bukidnon Provincial Director Ronelo Alvarez ang maong lakang nga gihimo sa lokal nga pangagamhanan alang sa paghatag sa labing maayo nga mga serbisyo alang sa kaayohan sa Valencianos.

Dako usab ang pasalamat ni Mayor Huervas diin iyang gipasalig ang padayon nga paghatag og serbisyo ug tabang sa katawhan.

Gisuportahan usab kini ni Atty. Genaro C. Cadigal Jr., City Administrator, diin iyang gipatugbaw ang kamahinungdanon sa kooperasyon sa tanan aron padayon ang paglambo sa mga programa sa lokal nga pangagamhanan. (LGU Valencia)

 

Related Post

Nasikop sa hiniusang pwersa sa kapolisan ang Bukidnon Top 1 ug Top 5 most wanted person sa managlahing lugar ug higayon Ang mga suspek giila nga si William Lamadrid y Tagolao ug Rachel Pizarro y Casas. Kini base sa report nga nahipos sa Bukidnon Police Provincial Office. Si Lamadrid, 48, minyo, driver, ug residente sa...
Nikabat sa Php60,000.00 nga kantidad sa gidudahang droga ang nasakmit sa hiniusang pwersa sa kapolisan sa Purok 2, Barangay 9, Malaybalay City, Bukidnon Base sa report nga nahipos sa Bukidnon Police Provincial Office (PPO), ang suspek giila nga si Jabar Pazaulan y Umpar, PNP/PDEA Regional Level High Value Individual (HVI) Top Priority List no. 10),...
Nagmalamposon nga napahigayon ang Capacity Building ug Institutional Development alang sa mga miyembro sa Information and Communications Technology (ICT) Council sa Lokal nga Pangagamhanan sa Dakbayan sa Valencia Nagmalapuson kining napahigayon niadtong Mayo 15-16, 2023, base sa pahibalo sa City Government of Valencia. Ang aktibidad gipangunahan sa Information Technology Service Division (ITSD) sa pakigtambayayong sa...