Gipasidunggan sa 27th Sangguniang Panlalawigan (SP) si Ralph Rian “Apollo” Batican gikan sa lungsod sa Libona, Bukidnon, kinsa nahimong kampiyon sa Asian Junior Masters – Class D Golf Tournament nga gipahigayon sa Blue Canyon Country Club, Phuket, Thailand niadtong Pebrero 3-5, 2023
Isa ka congratulatory resolution ug tseke nga nagkantidad sa ₱100,000.00 ang gitunol nila ni Provincial Governor Rogelio Neil P. Roque ug Vice-Governor Clive D. Quiño, kauban ang miyembro sa 27th SP ngadto kang Batican, atol sa gipahigayon nga Monthly Convocation sa Pangagamahanang Probinsyal niadtong Marso 6, 2023.
Ang kadaogan ni Batican isa ka testamento sa iyang determinasyon ug dedikasyon uban ang dakong pagsalig sa Diyos, kakugi ug disiplina, kinsa magsilbi nga sumbanan sa tanang aspiring athletes, ilabi na sa mga kabataan nga nagtinguha sa pagkab-ot sa ilang gipili nga natad sa dula.
Gipanghinaot usab nga ang kalampusan ni Batican isip kampiyon sa gipahigayon nga Junior Golf Foundation Philippines niadtong Enero 27-29, 2023 sa Pueblo de Oro Golf Club, magbukas og daghang oportunidad sa mga aspiring golfers ug sa uban pang mahiligon sa dula, nga magpabiling lig-on taliwala sa mga hagit sa isa ka atleta.
Nakighiusa usab ang SP sa pagpangayo sa Diyosnong kaluoy aron padayon siyang giyahan ug protektahan sa tanan gimbuhaton, sa ingon, makaangkon ug daghan pang kadaugan sa umaabot. (PR)
