Friday, May 03, 2024

Tag: Malaybalay City Police Station

2 drug suspek tingkagol sa selda

Posted on by cmn

Duha ka mga tawo ang kasamtangan nga anaa sa selda sa kapolisan sa Don Carlos ug Malaybalay human nakorner sa nahigayon nga drug buy-bust operation sa managlahi nga higayon

Sumala sa report ni Police Lt. Col. Julius Clark Prisco Macariola, OIC sa Malaybalay City Police Station.

Nasikop si Rexon Rudas y Rabanal, isa ka newly identified drug

personality, 26, ulitawo, Job Order sa LGU Malaybalay, ug residente sa Purok 21, Barangay Casisang, Malaybalay City, Bukidnon.

Siya nasikop niadtong Hunyo 13, 2023.

Nasakmit gikan niya ang 4 gramo sa gidudahang shabu nga mokabat sa Php27,200.00.

Samtang ang isa giila nga si Erlinger Sasutil y Arabis, alyas “Minggoy”, watch listed, 31, adunay kapuyo, ug residente sa P-2, Brgy. Pualas, Don Carlos, Bukidnon.

Base sa report ni Police Major Patrick D. Castro, OIC sa Don Carlos Municipal Police Station, ang suspetsado nasikop niadtong Hunyo 11, 2023 sa lugar sa iyang pinuy-anan.

Ingon ni Major Castro, mikabat sa 15.3675 gramo sa gidudahang shabu ang nasakmit gikan kaniya ug kini mibalor sa Php104,500.00.

Ang mga suspek anaa na ubos sa kustodiya sa kapolisan ug kasong paglapas sa R.A. 9165 ang giandam na batok kanila. (MG Mayumi B. Madera)

Php60k kantidad sa droga, nasakmit sa Malaybalay

Posted on by Omar Rashid Z. Abdullah

Nikabat sa Php60,000.00 nga kantidad sa gidudahang droga ang nasakmit sa hiniusang pwersa sa kapolisan sa Purok 2, Barangay 9, Malaybalay City, Bukidnon

Base sa report nga nahipos sa Bukidnon Police Provincial Office (PPO), ang suspek giila nga si Jabar Pazaulan y Umpar, PNP/PDEA Regional Level High Value Individual (HVI) Top Priority List no. 10), 47, ug minyo.

Siya nakorner sa iyang panimalay kaniadtong Mayo 18, 2023.

Nakorner siya sa gipahigayon nga search and seizure warrant sa kapolisan.

Nasakmit gikan sa suspek ang upat ka peket sa gidudahang shabu nga adunay gibana-bana nga kabug-aton nga 10 gramos.

Ang suspek gidala sa Malaybalay City Police Station alang sa hustong disposasyon.

Kasong paglapas sa article II, section 11 & 12 of RA 9165, ug RA 10591 ang giandam batok kaniya. (Omar Rashid Z. Abdullah)

Bukidnon Top 8 MWP, nakorner

Posted on by cmn

Nakorner sa hiniusang pwersa sa kapolisan ang Top 8 most wanted person sa Bukidnon niadtong Mayo 16, 2023, sa alas 11:30 sa buntag

Ang suspek nakorner sa Purok 4, Brgy. Sumpong, Malaybalay City, Bukidnon.
Si Police Lt. Col. Kaddafy P. Bitor, OIC sa 2nd BUK PMFC ntaho sa iyang report nga ang suspek giila nga si Stephen Mercader y Sarento, 36, ulitawo, security guard ug residente sa Purok-3 Marangan, Casisang, Malaybalay City, Bukidnon.
Siya gisikop pinasubay sa gahum sa warrant of arrest sa tulo ka ihap sa kasong paglapas sa R.A. 7610 o ang “Special Protection of Children Against Abuse, Exploitation and Discrimination Act.”
Ang suspek temporaryong gidala sa Malaybalay City Police Station alang sa hustong disposasyon. (MG Mayumi B. Madera)

Top 1 Region-10, Top 10 Bukidnon MWP, nakorner

Posted on by Diego M. Hidalgo

Nasikop sa mga kapolisan ang CIDG Top 1 (Region 10) ug Top 10 (Bukidnon) most wanted persons sa managlahing lugar ug higayon

Ang Top 1 Region-10 MWP giila nga si Junel Ricarte y Lumista, 35, minyo, driver, ug residente sa P-6, Brgy. Bangcud, Malaybalay City, Bukidnon.

Siya nasikop sa hiniusang pwersa sa kapolisan kaniadtong Mayo 2, 2023.

Siya gisikop pinasubay sa warrant of arrest sa kasong Frustrated Murder ug kasamtangang gidala sa Malaybalay City Police Station alang sa hustong disposasyon.

Samtang ang Top 10 MWP sa Bukidnon giila nga si Michael Juban y Emboy, 18, ulitawo, ug residente sa P-5, Zigzag, Maluko, Manolo Fortich, Bukidnon.

Siya nasikop sa hiniusang pwersa sa kapolisan niadtong Abril 28, 2023.

Siya gisikop pinasubay sa warrant of arrest sa kasong Rape.

Si Juban anaa ubos sa kustodiya sa Manolo Fortich Municipal Police Station alang sa hustong disposasyon.

Kini nga kasayuran nakuha gikan sa report nga nahipos sa Bukidnon Police Provincial Office. (Diego M. Hidalgo)

PNP/PDEA Regional Priority List nakorner sa drug buy-bust sa Malaybalay

Posted on by cmn

Nakorner sa kapolisan ang isa ka PNP/PDEA Regional Priority List sa gipahigayon nga drug buy-bust kaniadtong Abril 20, 2023 sa Purok-3, Bangcud, Malaybalay City, Bukidnon

Ang suspek giila nga si Jee Vankerwin Almoite y Llanita alyas “Kirit”, “Jee Ban Kerwin”, 36, ulitawo, habal-habal driver, ug residente sa maong dapit.

Ang Bukidnon Police Provincial Office nitaho nga nasakmit gikan sa suspek ang gibana-bana nga 10gramo sa gidudahang shabu nga adunay estimated market value nga Php 68,000.00.

Sa laing bahin, nasikop usab sa kapolisan ang HVI – Rank No. 3 of Top-10 PNP-PDEA Provincial Target kaniadtong Abril 20, 2023.

Ang suspek giila nga si Wilbert Casas y Caño alyas “Wilbert Casas Cañoneo”, 36, adunay kapuyo, is aka Electronic Technician ug residente sa Purok-9, Barangay Casisang, Malaybalay City, Bukidnon.

Base sa pahibalo sa Malaybalay City Police Station, ang suspek gisikop pinasubay sa Search and Seizure Warrant Order.

Nakuha gikan sa suspek ang 12 pakete sa gidudahang shabu nga adunay gibug-aton nga 5.1 gramo nga gibana-bana nga magkantidad og P34, 680.00.

Kasong paglapas sa R.A. 9165 ang giandam batok sa mga suspek. (MG Mayumi B. Madera)

Suspetsado sa pagpandunggab sa Capitol grounds nasikop

Posted on by cmn

Ang suspetsado sa pagpandunggab nga nahitabo niadtong Marso 26, 2023 sa Capitol Ground, Brgy. 6, Malaybalay City, nasikop na sa kapolisan

Si Police Lt. Col. Julius Clark Prisco M. Macariola IV, OIC sa Malaybalay City Police Station, sa iyang report, niila sa suspek nga si Junel Boyan Villacera, 20, ulitawo, ug residente sa P-1B, Magsaysay, Malaybalay City.

Ang unang biktima ni Villacera, isa ka menor de edad nga naka angkon og isa ka samad dinunggaban sa iyang tiyan. Ang biktima dali-daling gidala sa Bukidnon Provincial Medical Center alang sa pagpatambal.

Human na aresto ang suspek, ang iyang ika duhang biktima nga giila nga si Ricky Taghoy Belancueva, 24, ulitawo, ug residente sa Beshiba, Kitaotao, Bukidnon niadto ug nangayog tabang sa mga kapolisan.

Si Belancueva, kinsa naka angkon og isa ka samad dinunggaban sa iyang likod, niila ug nikompirma sa maong suspek. Siya gidala usab sa BPMC aron matambalan.

Ang Malaybalay CPS nag andam na sa kinahanglanong mga dukomento alang sa pagpasaka og kaso batok sa suspek. (MG Mayumi B. Madera)

Dole North Skyland manager napalgang patay sa Malaybalay

Posted on by cmn

Ang Dole North Skyland Manager sa Bukidnon Provincial Cluster napalgang patay didto sa P-14, Gabunan, Barangay Casisang, Malaybalay City niadtong Marso 18, 2023

Sa taho ni Police Col. Julius Clar Prisco M. Macariola IV, OIC sa Malaybalay City Police Station, ang biktima naila nga si Roger Bergas Balista, 46, minyo, ug residente sa Tagum, Davao del Norte.

Gikataho nga ang patayng lawas ni Balista nakita sa kalsada nga naka posisyon atubang sa isa ka Toyota Hilux.

Siya naka angkon og samad pinusilan sa iyang ulo.

Sa wala pa mahitabo ang krimen, ang biktima giktaho nga nibiya sa staff house sa P-1, Kalasungay ug niadto sa ilang processing plant sa Sitio Gabunan sa Casisang sakay sa Toyota Hilux.

Ang Malaybalay CPS nagpahigayon pa ug mas lawom nga imbestigasyon uban sa lateral coordination gikan sa Provincial Forensic Unit.

Wala pa matino ang motibo sa krimen. (MG Mayumi B. Madera)

Top 10 Bukidnon Priority Target nakorner sa drug buy-bust sa Malaybalay

Posted on by cmn

Nakorner ang Top 10 Bukidnon Priority Target (HVI) sa drug buy-bust operation nga gipahigayon sa hinusang pwersa sa kapolisan niadtong Marso 11, 2023 sa CM Recto St. Purok 5, Barangay Sumpong, Malaybalay City, Bukidnon

Si Police Col. Ritchie A. Salva, OIC sa Malaybalay City Police Station, nibutyag sa iyang taho nga ang arestado giila nga si Rey Salga y Aligarbes, 44, adunay kapuyo, ug residente sa Purok
8, Sumpong, Malaybalay City, Bukidnon.
Gitaho nga nakuha gikan sa iyang posesyon ang 5.15 gramo sa gidudahang shabu nga adunay estimated market value nga Php34,976.00.
Ang suspek uban sa mga nasakmit nga ebidensya gidala ngadto sa buhatan sa kapolisan sa Malaybalay aron sa tukmang disposasyon.
Kasong paglapas sa R.A. 9165 ang giandam batok sa suspek. (MG Mayumi B. Madera)

Turnover, Assumption of Office Ceremony para sa hepe sa kapulisan sa Malaybalay CPS gipahigayon

Posted on by cmn

Isa ka Turnover of Command ug Assumption of Office Ceremony alang sa buhatan sa Hepe sa Kapolisan sa Malaybalay ang gipahigayon niadtong Marso 14, 2023

Si Police Lt. Col. Ritchie A. Salva gihulipan ni Police Col. Julius Clark Prisco Macariola, IV isip Officer-In-Charge sa Malaybalay City Police Station.
Sumala sa kasayuran nga nakuha sa official facebook page ni City Mayor Jay Warren R.
Pabillaran, ang maong seremonya gipangulohan ni Police Col. Reynante Reyes, Provincial Director sa Bukidnon Police Provincial Office.
Ang kalihukan gitambungan ni Atty. Mitchell Talatala – Executive IV isip representante ni Malaybalay City Mayor Pabillaran. Nitambong sab si Konsehal Royland M Orquia, Chairman sa Peace and Order Council sa Sangguniang Panlungsod sa Malaybalay City ug uban pang mga
bisita. (MG Mayumi B. Madera)

3 gidunggab sa kainom sa Malaybalay

Posted on by Diego M. Hidalgo

Tulo ka tawo ang gidunggab sa ilang kainom sa Purok-6, Barangay Magsaysay, Malaybalay City

Duha ang patay ug isa ang samdan sa insidente nga nahitabo kaniadtong Marso 04, 2023 pasado alas 9:05 sa gabie.

Ang namatay mao sila Julie Cabonada Maraasin, 58, minyo, laborer; ug Danilo Cabonada Maraasin, 52, minyo, laborer.

Samtang samdan si Sofronio Ojano Tina-an, 59, ulitawo, laborer.

Ang suspek giila nga si Paquito Cabonada Maraasin, 55, minyo, laborer.

Gitaho nga ang mga biktima ug ang suspetsado nagkainom sa panimalay ni Sofronio Tina-an, sa dihang nagkalalis kini gumikan sa hisgutanan kabahin sa gold mining.

Giingon nga giibot sa suspek ang iyang kutsilyo nga naa sa iyang hawak ug dayong dayong gidunggab ang mga biktima.

Si Police Lt. Col. Ritchie A. Salva, OIC sa Malaybalay City Police Station, sa iyang taho, niingon nga ang mga biktima gidala sa Bukidnon Provincial Medical Center apan gideklara nga patay na sa wala pa nahiabot sila Julie ug Danilo Maraasin, samtang si Sofronio Tina-an ubos pa sa obserbasyon gumikan sa mga samad dinunggaban nga naangkon niini.

Sa kasamtangan, ang suspek anaa ubos sa kustodiya sa kapolisan sa dakbayan sa Malaybalay. (Diego M. Hidalgo)