Friday, March 31, 2023

Dole North Skyland manager napalgang patay sa Malaybalay

Ang Dole North Skyland Manager sa Bukidnon Provincial Cluster napalgang patay didto sa P-14, Gabunan, Barangay Casisang, Malaybalay City niadtong Marso 18, 2023

Sa taho ni Police Col. Julius Clar Prisco M. Macariola IV, OIC sa Malaybalay City Police Station, ang biktima naila nga si Roger Bergas Balista, 46, minyo, ug residente sa Tagum, Davao del Norte.

Gikataho nga ang patayng lawas ni Balista nakita sa kalsada nga naka posisyon atubang sa isa ka Toyota Hilux.

Siya naka angkon og samad pinusilan sa iyang ulo.

Sa wala pa mahitabo ang krimen, ang biktima giktaho nga nibiya sa staff house sa P-1, Kalasungay ug niadto sa ilang processing plant sa Sitio Gabunan sa Casisang sakay sa Toyota Hilux.

Ang Malaybalay CPS nagpahigayon pa ug mas lawom nga imbestigasyon uban sa lateral coordination gikan sa Provincial Forensic Unit.

Wala pa matino ang motibo sa krimen. (MG Mayumi B. Madera)

Top 10 Bukidnon Priority Target nakorner sa drug buy-bust sa Malaybalay

Nakorner ang Top 10 Bukidnon Priority Target (HVI) sa drug buy-bust operation nga gipahigayon sa hinusang pwersa sa kapolisan niadtong Marso 11, 2023 sa CM Recto St. Purok 5, Barangay Sumpong, Malaybalay City, Bukidnon

Si Police Col. Ritchie A. Salva, OIC sa Malaybalay City Police Station, nibutyag sa iyang taho nga ang arestado giila nga si Rey Salga y Aligarbes, 44, adunay kapuyo, ug residente sa Purok
8, Sumpong, Malaybalay City, Bukidnon.
Gitaho nga nakuha gikan sa iyang posesyon ang 5.15 gramo sa gidudahang shabu nga adunay estimated market value nga Php34,976.00.
Ang suspek uban sa mga nasakmit nga ebidensya gidala ngadto sa buhatan sa kapolisan sa Malaybalay aron sa tukmang disposasyon.
Kasong paglapas sa R.A. 9165 ang giandam batok sa suspek. (MG Mayumi B. Madera)

Turnover, Assumption of Office Ceremony para sa hepe sa kapulisan sa Malaybalay CPS gipahigayon

Isa ka Turnover of Command ug Assumption of Office Ceremony alang sa buhatan sa Hepe sa Kapolisan sa Malaybalay ang gipahigayon niadtong Marso 14, 2023

Si Police Lt. Col. Ritchie A. Salva gihulipan ni Police Col. Julius Clark Prisco Macariola, IV isip Officer-In-Charge sa Malaybalay City Police Station.
Sumala sa kasayuran nga nakuha sa official facebook page ni City Mayor Jay Warren R.
Pabillaran, ang maong seremonya gipangulohan ni Police Col. Reynante Reyes, Provincial Director sa Bukidnon Police Provincial Office.
Ang kalihukan gitambungan ni Atty. Mitchell Talatala – Executive IV isip representante ni Malaybalay City Mayor Pabillaran. Nitambong sab si Konsehal Royland M Orquia, Chairman sa Peace and Order Council sa Sangguniang Panlungsod sa Malaybalay City ug uban pang mga
bisita. (MG Mayumi B. Madera)

3 gidunggab sa kainom sa Malaybalay

Tulo ka tawo ang gidunggab sa ilang kainom sa Purok-6, Barangay Magsaysay, Malaybalay City

Duha ang patay ug isa ang samdan sa insidente nga nahitabo kaniadtong Marso 04, 2023 pasado alas 9:05 sa gabie.

Ang namatay mao sila Julie Cabonada Maraasin, 58, minyo, laborer; ug Danilo Cabonada Maraasin, 52, minyo, laborer.

Samtang samdan si Sofronio Ojano Tina-an, 59, ulitawo, laborer.

Ang suspek giila nga si Paquito Cabonada Maraasin, 55, minyo, laborer.

Gitaho nga ang mga biktima ug ang suspetsado nagkainom sa panimalay ni Sofronio Tina-an, sa dihang nagkalalis kini gumikan sa hisgutanan kabahin sa gold mining.

Giingon nga giibot sa suspek ang iyang kutsilyo nga naa sa iyang hawak ug dayong dayong gidunggab ang mga biktima.

Si Police Lt. Col. Ritchie A. Salva, OIC sa Malaybalay City Police Station, sa iyang taho, niingon nga ang mga biktima gidala sa Bukidnon Provincial Medical Center apan gideklara nga patay na sa wala pa nahiabot sila Julie ug Danilo Maraasin, samtang si Sofronio Tina-an ubos pa sa obserbasyon gumikan sa mga samad dinunggaban nga naangkon niini.

Sa kasamtangan, ang suspek anaa ubos sa kustodiya sa kapolisan sa dakbayan sa Malaybalay. (Diego M. Hidalgo)

Pastor gisikop sa kasong murder sa Malaybalay

Isa ka pastor ang gisikop sa hiniusang pwersa sa kapolisan kaniadtong Pebrero 5, 2023 sa Purok 6B, Barangay Aglayan, Malaybalay City, Bukidnon

Si Police Lt. Col. Ritchie A. Salva, oic sa Malaybalay City Police Station, nisaysay sa iyang report nga ang suspek giila nga si Oliver Sugue y Pasco alyas “Oliver Sauge” ug “Dodong”, 42, minyo, ug residente sa maong dapit.

Siya gisikop pinasubay sa warrant of arrest sa kasong murder nga gi-issue niadtong Abril 4, 2006.

Nasikop siya human sa halos 17 ka tuig nga pagtago-tago.

Ang arestado anaa na ubos sa kustodiya sa Malaybalay CPS alang sa hustong disposasyon. (Diego M. Hidalgo)

Top 2, Top 3 PNP, PDEA Regional Level nakorner

Gisikop sa hiniusang pwersa sa kapolisan ang Top 2 ug Top 3 PNP/PDEA Regional Level most wanted person sa managlahing lugar ug higayon

Sa nahipos nga report gikan sa Bukidnon Police Provincial Office, ang duha ka suspek giila nga si Ronald Ariel Gaguan y Torremocha aka “Otik” ug Eliakim Destor y Anglao.

Si Gaguan, top 2 sa Regional PNP/PDEA List, 41, minyo, driver, former PNP member ug residente sa Purok-1, Sitio Kilabong, Barangay Vista Villa, Sumilao, Bukidnon. Siya nasikop sa maong lugar kaniadtong Enero 27, 2023.

Nakuha gikan sa posesyon ni Gaguan ang 15 garmo sa gidudahang shabu nga adunay estimated market value nga Php102,000.00.

Si Destor, sa laing bahin, Top 3 sa Regional PNP/PDEA List, 31, minyo, mag-uuma ug residente sa residente sa Butong, Quezon, Bukidnon. Siya naikop sa Everlasting Village, Poblacion, Pangantucan, Bukidnon kaniadtong Enero 30, 2023.

Si Gaguan anaa ubos sa kustodiya sa Malaybalay City Police Station samtang si Destor gidala sa Pangantucan Municipal Police Station alang sa hustong disposasyon. (Diego M. Hidalgo)

Negosyante sa Malaybalay nakuhaan og armas, droga

Isa ka negosyante ang nakuhaan og armas ug droga sa hiniusang pwersa sa kapolisan sa Purok 2, Barangay Casisang, Malaybalay City, Bukidnon niadtong Enero 13, 2023 sa alas 12:32 sa buntag.

Ang arestado giila nga si Oliver Salga y Lagubis III, 36, minyo, negosyante/painter, ug residente sa Purok-17, Barangay Casisang, Malaybalay City, Bukidnon.

Sa report ni Police Lt. Col. Ritchie A. Salva, OIC sa Malaybalay City Police Station, gibutyag nga ang nakuha nga gidudahang shabu gikan sa suspek mokantidad og Php36,244.00.

Nakuha sab gikan sa suspek ang .45 pistol, duha ka steel magazines ug mga bala.

Kasong paglapas sa Article II, Sections 05 ug 11 of R.A. 9165 and R.A 10591 ang gi andam batok sa suspek. (Diego M. Hidalgo)