Sunday, December 15, 2024

Tag: Nalumos

Lalaki nalumos sa Pangantucan

Posted on by Diego M. Hidalgo

Isa ka 25-anyos nga lalaki ang gikatahong nalumos sa eight feet deep pool sa Ambrocia Waters Resort, Sitio Lumagwas, Adtuyon, Pangantucan, Bukidnon

Sumala sa taho sa kapolisan, isa ka babaye ang mireport sa buhatan sa Pangantucan Municipal Police Station (PMPS) kabahin sa hitabo pasado alas 7:00 ang takna sa gabii niadtong Disyembre 25.

Gisaysay niini nga ang iyang igsoon nga lalaki nalumos sa swimming pool sa maong dapit.

Giingong mga alas 4:30 sa hapon sa samang petsa, ang biktima kinsa ubos sa impluwensya sa ilimnong makahubog, ang mibiya sa grupo nga nag-inusara aron maligo.

Sumala pa, mga alas 5:00 sa hapon ang biktima nakit-an ni alyas nga naglutaw sa walo ka tiil ang gilawmon nga pool.

Ang biktima daling gidala sa Pangantucan Medical Hospital apan gideklarar sa nag-atiman nga doktor nga dead on arrival. (Diego M. Hidalgo)

3 residente sa Talakag nalumos sa outing sa Opol

Posted on by cmn

Nalumos ang isa ka inahan, iyang anak ug batang babaye nilang kadugo human nangaligo sa
dagat

Sumala sa report sa Philstar dot com kagahapon, ang mga biktima nalumos sa Beachfront Resort
sa Brgy. Barra, Opol, Misamis Oriental kaniadtong Disyembre 17.

Ang mga biktima nailang si Charlene Delante, iyang 19 anyos nga anak nga babaye nga si
Nica, ug ilang paryenteng babaye nga menor de edad.

Ang mga kauban sa mga biktima miingon sa mga kapolisan nga si Delante ang posibli nga
unang nalumos.

Giingon nga sunod nga nalumos ang iyang anak nga babaye ug kauban sa dihang gisulayan nila
pagluwas si Delante bisan pa nga wala sila kahibalo sa paglangoy.

Ang mga emergency responder gikan sa local government unit sa Opol ug mga pulis, misuway
apan napakyas sa pag-revive sa mga biktima pinaagi sa first aid resuscitation procedures.

Ang Opol MPS miingon nga gipangita ang mga biktima human nila nadawat ang report nga wala sa gi-rentahan nga cottage ang mga biktima ug nadiskubri nila sa ulahi nga nangalumos na ang tulo. (melbmadera)

2 menor de edad, nalumos sa Maramag

Posted on by cmn

Duha ka menor de edad ang patay human malumos kini sa P-9A, North Poblacion, Maramag, Bukidnon

Gitaho ni Police Maj. Erwin R. Naelga, OIC sa Maramag Municipal Police Station nga ang insidente nahitabo sa alas 7:00 sa gabie niadtong Agosto 13, 2023.

Ang amahan sa mga biktima nga si Alberto Manalondog y Hilasyo, 52, laborer, minyo – matod niya, gisugtan niya ang iyang mga anak nga maligo sa gripo tapad sa ilang panimalay.

Apan, human sa pipila ka minuto, namatikdan sa amahan nga wala na ang iyang mga anak ug nakita niya kini sa duol sa lawom nga nakubkoban nga bahin sa dalan nga nahimutang mga 150 metros ang gilay-on sa ilang balay.

Si Alberto nagtuo nga ang iyang mga anak miambak ug milangoy sa giingon nga gikubkob nga lugar.

Ang mga biktima gidala sa Bukidnon Provincial Hospital – Maramag apan gideklara kini nga dead on arrival. (MG Mayumi B. Madera)