Tuesday, January 21, 2025

Tag: Patay

Babaye gipusil sa Maramag

Posted on by Diego M. Hidalgo

Dideklarang patay na sa wala pa makaabot sa Bukidnon Provincial Hospital (BPH) Maramag ang 46-anyos nga babaye human gipusil sa Purok 8, Brgy. San Miguel, Maramag, Bukidnon hapon sa Enero 10, 2025

Ang babayeng biktima usa ka minyo, mag-uuma, ug residente sa Purok 4, Brgy. San Carlos, Maramag, Bukidnon.


Sumala sa kasayoran sa kapolisan sa Maramag, ang biktima sakay sa multicab pickup-type nga gimaneho sa usa ka lalaki ug uban sa laing babaye.


Ang sakyanan nagdagan gikan sa BUSCO, Quezon, Bukidnon padulong sa Purok 4, Brgy. San Carlos, Maramag, Bukidnon.


Sa ilang pag-abot sa dapit sa nahitaboan, giingong gipusil ang biktima sa duha ka wala mailhing lalaki nga suspek.


Ang biktima nakaangkon og grabing samad tungod sa pinusil sa likod ug gidala kini sa ospital apan patay na sa wala pa makaabot.


Ang mga suspek giingong niikyas human sa krimen sa wala masayri nga direksyon.


Narekober sa lugar sa nahitaboan ang duha ka fired cartridge cases sa kalibre .45 ug sulod sa sakyanan nakaplagan usab ang duha ka bala nga wa pa matinong kalibre.


Ang Maramag MPS nagpadayon sa imbestigasyon aron mailhan ang mga suspek ug masuta ang motibo sa maong insidente. (Diego M. Hidalgo)

Reward gitanyag sa makatudlo sa lain pang responsable sa paglugos-patay sa 5-anyos nga batang babaye sa Valencia

Posted on by Melchor Madera

Ang Bukidnon Police Provincial Office (BPPO) nagtanyag og P50,000.00 nga reward sa makatudlo sa lain pang person-of-interest sa paglugos-patay sa 5-anyos nga batang babaye sa Valencia City

Ang kasayoran gipaskil sa Facebook page sa Valencia City Police Station (VCPS).


Ang patay’ng lawas sa biktima nakaplagan sa katubhan likod sa Robinson Place Valencia nga nahimutang sa Purok 17, Barangay Bagontaas, Valencia City, Bukidnon niadtong Enero 11, 2025.


Isa ka 30-anyos nga person-of-interest sa kaso, si Marlon Pantonial, taga Barangay Banlag, Valencia City, ang nasikop sa kapolisan.


Gikatahong nangilog kini og armas sa pulis sa Valencia ug nagpusil sa liog sulod sa VCPS.


Ang suspek dali nga gidala sa Polymedic Hospital apan gideklara kining dead on arrival sa doktor nga niatiman kaniya.


Taliwala niini, ang pamunoan sa kapolisan nagtuo nga dili nag-inusara ang namatay nga suspek sa krimen, hinungdan gitanyag ang cash reward.


Kung kinsa man ang adunay kasayuran o impormasyon, mamahimong magtext o mutawag sa VCPS sa ilang Hotline #s: 09171180210 / 09177189191. (melbmadera)

Laborer gipatay sa Lantapan

Posted on by Melchor Madera

Gitigbas-patay ang usa ka laborer sa Sityo Rimlos, Purok 3, Brgy. Bantuanon, Lantapan, Bukidnon kaniadtong Enero 2, 2025

Ang biktima nailhan nga usa ka 50-anyos nga ulitawo ug residente sa Purok 2, Brgy. Capitan Juan, Lantapan, Bukidnon.


Sumala sa report sa kapolisan, ang biktima napalgang nagbuy-od ug patay na sa terrace, adunay samad sa liog nga tinigbasan ug nabuling sa dugo.


Ang suspek giila nga usa ka 23-anyos nga ulitawo, laborer, ug residente sa Sitio Katiguman, Purok 5, Brgy. Capitan Juan, Lantapan, Bukidnon.


Sa imbestigasyon, nasayran nga nag-inom ang biktima, suspek, ug ilang mga higala sa isa ka payag sa Sitio Rimlos.


Human mabiya ang ilang mga higala, nagkalalis ang biktima ug ang suspek tungod sa wala pa masulbad nga personal nga pagdumot.


Nasayran nga nangayo og pasaylo ang suspek, apan nibalibad ang biktima, hinungdan sa panaglalis.
Dihang nawad-an og panimuot ang biktima ug nahulog sa sawog sa terrace, gitigbas sa liog sa suspek ang iyang liog.


Gidala sa pamilya sa biktima ang iyang patay’ng lawas sa Purok 3, Capitan Juan, Lantapan, Bukidnon.
Ang suspek boluntaryong nitahan ug gidala sa Lantapan MPS alang sa dokumentasyon ug dugang legal nga aksyon.


Gituohan nga ang motibo sa insidente kay personal nga grudge. (melbmadera)

Wanted person patay sa engkuwentro sa Don Carlos

Posted on by Omar Rashid Z. Abdullah

Isa ka wanted person ang napatay human lakip sa nakigpinusilay batok sa law enforcers didto sa Purok 7B, Barangay Embayao, Don Carlos, Bukidnon

Sumala sa kasayoran gikan sa Bukidnon Police Provincial Office, nahitabo ang pinusilay buntag sa Agosto 26, 2024.

Ang kapolisan nag-serve sa warrant of arrest sa dapit batok sa siyam ka mga tawo nga wanted sa pagpatay.

Apan gipamusil sila sa wala mailhing mga armado nga miresulta sa 30-minutos nga pinusilay.

Patay sa hitabo ang isa sa siyam ka mga wanted samtang nasikop sab ang laing isa pa.

Narekober gikan sa engkwentro ang isa ka M1 Garand rifle, isa ka improvised sniper rifle, isa ka 12-gauge shotgun, ug lain-laing mga bala. (Omar Rashid Z. Abdullah)

Lalaking naghasi gitigbas sa uyoan

Posted on by Omar Rashid Z. Abdullah

Isa ka 45-anyos nga lalaki kinsa naghasi ang gikatahong gidunggab patay sa iyang 79-anyos nga uyoan sa Flores Village, Purok 2, Brgy. Linabo, Malaybalay City gabii sa Agosto 16, 2024

Ang biktima kinsa ubos sa impluwensya sa ilimnong makahubog, naglasong samtang nagbitbit og sundang ug giguba ang koral sa suspek, sumala sa report ni Police Lt. Col. Virgilio Cruz, OIC sa Malaybalay City Police Station.

Gisuwayan pa unta sa pagpakalma sa suspek ang iyang pag-umangkon apan niresulta kini sa init nga panaglalis.

Dugang pa, ang suspek nibalik sa iyang balay ug mikuha og kutsilyo ug gidunggab ang biktima makaduha ka higayon nga naigo sa walang bahin sa liog ug walang gusok nga nakaingon sa iyang hinanaling kamatayon.

Ang nirespondeng Barangay Public Safety Officer (BPSO) sa Linabo nakasaksi sa hitabo ug nasikop ang suspek.

Gibira sa suspek ang kutsilyo sa liog sa biktima ug boluntaryong gi-turn over kini ngadto sa BPSO. (Omar Rashid Z. Abdullah)

Lalaki nakuryetihan-patay sa Valencia

Posted on by Omar Rashid Z. Abdullah

Isa ka 50-anyos nga lalaki ang nakuryentihan-patay sa Purok 1, Patag, Brgy. Bagontaas, Valencia City, Bukidnon.

Nahitabo ang trahedya udto sa Agusto 19, 2024, sumala sa report sa report ni Police Lt. Col. Mitchel Clemencio, OIC sa Valencia City Police Station.

Ang biktima gidala sa Adventist Medical Center, Valencia City sa rescue team apan gideklarar sa nag-atiman nga doktor nga patay na sa wala pa nahiabot.

Nasayran sa imbestigasyon nga ang biktima nikatkat ug nagputol sa sanga sa punoan sa cotton fruit kon santol.

Ang sanga nakasangit sa three phase primary line sa FIBECO hinungdan nga nakuryentihan siya ug nahulog sa yuta. (Omar Rashid Z. Abdullah)

Template.

Babayeng septuagenarian gipusil sa Kalilangan

Posted on by Diego M. Hidalgo

Isa ka 72-anyos nga babaye ang gipusil patay buntag sa Hulyo 13, 2024 sa Brgy. Forchacu III, Kalilangan, Bukidnon

Ang biktima nakaangkon sa grabeng samad pinusilan sa agtang hinungdan sa hinanaling kamatayon niini.

Matod sa bana sa biktima, samtang sila nangatulog sulod sa ilang kuwarto, isa ka wala mailhing lalaki ang nipusil sa iyang asawa gikan sa gawas sa ilang bintana gamit ang wala matinong kalibre sa armas.

Human sa hitabo, misibat ang suspek paingon sa wala matinong direksyon.

Ang Kalilangan MPS padayon pa nga nagpahigayon og makuting imbestigasyon alang sa pagtino sa motibo sa krimen ug posibleng pag-ila ug pagkasikop sa suspek. (Diego M. Hidalgo)

Mag live-in gipamusil sa Quezon

Posted on by Diego M. Hidalgo

Patay ang isa ka lalaki samtang samdan ang kapuyo niini human sila gipamusil sa Purok 6, Brgy. Magsaysay, Quezon, Bukidnon gabii sa Marso 29, 2024

Sumala sa report ni Police Lt. Col Noel F. Cano, OIC sa Quezon Municipal Police Station, nadala pa sa Quezon Health Center Infirmary ang mga biktima.

Apan ang lalaki kinsa nakaangkon sa grabing mga samad pinusilan sa lawas ang gideklarang patay na sa wala pa mahiabot.

Samtang ang iyang kapuyo kinsa nakaangkon sa samad pinusilan sa tuong tiil ug tiyan ang gibalhin sa Bukidnon Provincial Hospital sa Maramag, Bukidnon.

Nasayran sa imbestigasyon sa kapolisan sa Quezon nga ang mga biktima nag-atiman sa ilang food stall alang sa selebrasyon sa Araw ng Barangay sa dihang gipusil sa suspek gamit ang wala masayring kalibre sa armas.

Ang suspek nisibat padulong sa Arakan, North Cotabato ug padayon pa kining gipangita.

Nakuha sa dapit sa krimen ang unom ka kapsola sa bala sa armas.

Padayon pa sab ang imbestigayon sa kapolisan aron pag-ila sa suspek ug pagsuta sa motibo sa krimen. (Diego M. Hidalgo)

Tawo giduggab sa igsoon sa Kibawe

Posted on by Diego M. Hidalgo

Isa ka lalaki ang gidunggab patay sa iyang manghod didto sa Purok 9, Romagook, Kibawe, Bukidnon

Ang insidente nahitabo gabii sa Marso 26, 2024, sumala kini sa report ni Police
Major Jayvee G. Babaan, OIC sa Kibawe Municipal Police Station.

Ang 31-anyos nga biktima nakaangkon sa grabing samad dinunggaban sa tuong dughan ug tiyan.

Gidala siya sa Bukidnon Provincial Hospital (BPH) sa Kibawe, Bukidnon apan gideklarar siyang patay sa niatiman nga doktor.

Sumala pa, sayong gabii sa maong petsa, samtang tua sa Barangay Pay-as, Kadingilan, Bukidnon, ang duha samtang nagka-inom sa ilimnong makahubog ang nagkalalis nga niresulta sa pagsinumbagay.

Pagkahuman, ang suspek niadto sa panimalay sa ilang ginikanan sa Romagook aron magkuha sa iyang mga sinina.

Ang duha nagkakita didto pag-usab diin gihapak sa biktima ang walang bukton sa suspek gamit ang palwa sa lubi.

Gumikan niini gihublot sa 26-anyos nga suspek ang iyang dalang kutsilyo ug gidunggab ang iyang magulang makaduha ka higayon.

Ang suspek nasikop sa niresponding kapolisan.

Walay pagsinabtanay sa managsoon ang nakitang motibo sa krimen. (Diego M. Hidalgo)

1 patay, 1 angol human nakuryentihan sa Maramag

Posted on by Omar Rashid Z. Abdullah

Gidala sila sa Saint Joseph Southern Bukidnon Hospital. Patay ang isa ka lalaki samtang angol ang kauban niining trabahante human nakuryentihan sa ilang gitrabahoan sa Purok 8, Brgy. San Miguel, Maramag, Bukidnon

Sumala sa report nahitabo kini niadtong Marso 27, 2024 samtang nagtabaho sa Universal Harvester Dairy Farm Inc. sa dapit.

Gidala sila sa Saint Joseph Southern Bukidnon Hospital.

Apan ang 35-anyos gideklarar nga dead on arrival samtang luwas ang kauban niini.

Sa imbestigasyon, nasayran nga ang mga biktima nagpahigayon og
maintenance repair sa supply sa water pump sa motor pool area sa maong
kompanya.

Samtang ang isa kanila naunlod sa water storage pool, nakuryentihan siya
ug nisinggit og tabang.

Niambak sa pool ang kauban nga trabahante apang nakuryentehan sab
siya.

Nakuha sila sa ilang duha ka mga kauban ug gidala sa hospital human
napalong ang breaker switch. (Omar Rashid Z. Abdullah)