Patay ang isa ka 46-anyos nga lalaki human giingong gitigbasan sa sundang sa isa ka 68-anyos
nga suspek human sa panaglalis atol sa ilang pag-inom sa Barangay Basak, Talakag, Bukidnon,
sa gabii sa Oktubre 7, 2026.

Gibase sa inisyal nga imbestigasyon sa Talakag Municipal Police Station, ang biktima ug ang
suspek nag-inom sulod sa isa ka uma sa Purok 1 sa maong barangay dihang misamot ang ilang
panaglalis ug nauwi sa suntukan.
Matod sa live-in partner sa biktima, miadto sa iyang kuwarto ang suspek human sa ilang
panaglalis, apan gisumbag o gihampak sa biktima gamit ang botelya nga miigo sa iyang agtang.
Human niini, mikuha ang suspek og sundang ug balik-balik nga gitigbas ang biktima.
Miabot ang mga personahe sa Talakag Municipal Police Station sa lugar human makadawat og
tawag alang sa tabang sa kapulisan. Nakaplagan nila ang biktima nga naghigda sa yuta ug
adunay mga samad sa tuo nga bahin sa liog, ulo ug wala nga kamot.

Gidala ang biktima sa Bukidnon Provincial Hospital sa Talakag alang sa medikal nga pagtabang,
apan gideklarar siyang patay sa doktor alas 11:54 sa gabii sa maong petsa.
Gidakop ang suspek ug narekober sa mga pulis ang sundang nga giingong gigamit sa krimen.
Anaa na siya sa kustodiya sa Talakag Municipal Police Station samtang nagpadayon ang
imbestigasyon.
Gimando ni Bukidnon Police Provincial Director PCOL Oliver Sotto Navales ang hingpit nga
pag-usisa sa insidente aron matino ang tanang sirkumstansiya nga mitultol sa kamatayon sa
biktima. (melbmadera)