Sunday, May 12, 2024

Tag: suspek

Gidudahang shabu nasakmit gikan sa minor de edad sa Kalilangan

Posted on by Diego M. Hidalgo

Nasakmit sa hiniusang puwersa sa kapolisan ang mga pakete sa gidudahang shabu gikan sa posisyon sa isa ka menor de edad sa buy bust operation sa Munisipyo sa Kalilangan

Nasayran kini gikan sa report sa hepe sa Kalilangan Municipal Police Station nga si Police Major
Christian Serdeña.

Matod pa, ang nasakmit nga gidudahang shabu mitimbang sa 58 gramos.

Kini adunay estimated standard drug price nga P394,400.

Nakuha kini sa hiniusang puwersa sa kapolisan sa buy bust operation nga gipahigayon sa Purok
1, Brgy. West Poblacion, Kalilangan, Bukidnon udto sa Disyembre 13, 2023.

Gihikay na sa kapolisan ang kaso batok sa suspek. Kini kalabot sa kalapasan sa Section 5 ug 11,
Article II sa RA 9165 kon Comprehensive Dangerous Drugs Act of 2002. (Diego M. Hidalgo)

Pamilya gipamusil sa Maramag

Posted on by Diego M. Hidalgo

Samdan ang isa ka amahan ug ang iyang anak samtang walay tatsa ang asawa niini human gipamusil samtang sakay sa ilang motorsiklo sa Sayre highway, Km. 6, Base Camp, Maramag, Bukidnon

Si Police Major Erwin Naelga, OIC sa Maramag Municipal Police Station (MMPS), miingon sa iyang report nga ang insidente nahitabo pasado 8:30 sa gabii sa Disyembre 13, 2023.

Ang 52-anyos nga amahan nakaangkon sa samad pinusilan sa ubos nga bahin sa likod ug walang abaga.

Samtang ang 30 anyos nga anak niini ang samdan sa walang bukton ug walang abaga.

Ang duha ka samarong biktima nagpaalim na karon sa Bukidnon Provincial Hospital (BPH), Maramag, Bukidnon.

Sa imbestigasyon nasayran nga gikan sa ilang pinuy-anan ang mga biktima paingon sa Maramag sakay sa ilang motorsiklo nga gimaneho sa anak.

Ang inahan naglingkod sa tunga, samtang ang amahan naglingkod sa luyo nga bahin sa motorsiklo.

Sa pag-abot sa nahisgutang lugar, gipusil sila sa luyo sa makadaghang higayon sa wala mailhing suspek nga sakay sa motorsiklo nga nagbiyahe sa samang direksyon.

Ang mga biktima nangabangga sa daplin sa dalan. Ang mga suspetsado mihunong ug nangita sa mga biktima, apan nakatago kini sa kasagbutan nga bahin. Ug sa dihang wala na sila makit-i sa mga suspek dali silang miikyas palayo sa dapit.

Ang kapolisan sa Maramag padayon pa sa ilang imbestigasyon aron masayran ang motibo ug maila ang mga suspek sa krimen. (Diego M. Hidalgo)

Top 3 R-10 priority target sa illegal drug personalities nakorner

Posted on by cmn

Nasikop sa hiniusang puwersa sa kapolisan ang Top 3 Regional Priority Target sa illegal drug personalities

Sumala sa report sa Bukidnon Provincial Police Office, ang suspek nasikop resulta sa gipatuman nga search and seizure warrant order hapon sa Disyembre 9, 2023.

Ang 43 anyos nga lalaki nga lakip sa drugs wathclist ang nasikop sa Purok 10, South Poblacion, Maramag, Bukidnon.

Nakuha sa reyd ang mga pakite sa gidudahang shabu lakip ang drug paraphernalia ug pipila ka mga bala sa armas.

Mokabat sa 8.0 gramos ang gibanabanang kinatibuk-ang gibug-aton sa mga nasakmit nga ebidensiya nga gituohang shabu nga adunay gibanabanang kantidad nga Php54,400.00.

Ang search ug physical inventory sa mga nasakmit nga ebidensiya gihimo sa dapit sa pagdakop sa presensya sa suspek ug sa duha ka barangay kagawad ug isa ka miyembro sa media.

Ang dinakpan nga suspek uban sa mga nasakmit nga ebidensiya gidala sa Maramag MPS alang sa dokumentasyon ug saktong disposisyon, samtang ang mga ebidensiya sa droga ug mga bala i-turn-over sa Bukidnon Provincial Forensic Unit sa Malaybalay City, Bukidnon alang sa qualitative ug quantitative examination, ug ballistic examination.

Kasong Paglapas sa Section 11, Article II sa RA 9165 kon Comprehensive Dangerous Drugs Act of 2002 ug Paglapas sa RA 10591 kon “Comprehensive Firearms and Ammunition Regulation Act” ang giandam na alang sa inquest proceedings.

Uban sa pagronda sa Maramag MPS ang mga personahe BUKPDEU ug BukPIU-Tracker Team. (melbmadera)

Pagpangawat natala sa Valencia

Posted on by cmn

Ang Happy Feet Shoes and Apparel nga nahimutang sa atubangan sa Valencia City Gym,
Sa Aguilar St., Purok 16, Poblacion, Valencia City ang gikatahong giransak sa wala mailing suspek

Sumala sa report ni Police Lt. Col. Mitchel Clemencio, OIC sa Valencia City Police Station (VCPS), ang insidente nahitabo niadtong Disyembre 12, 2023.

Giingon nga nalimas sa suspek ang Php400,000.00 cash lakip ang transparent cellophane bag nga sulod ang mga sinsilyo nga mobalor sa PhP4,000.00 nga gibutang sa cashier’s table.

Sa inisyal nga imbestigasyon nagpakita nga ang suspek nakasaka sa ilang konkretong firewall nga koral nga nahimutang sa luyo nga bahin sa ilang establisemento ug giguba ang ilang plywood wall.

Human sa insidente, temporaryo lang kining gitabunan sa isa ka piraso sa hardy flex board.

Dugang pa, ang pag-abli sa maong bungbong nagpadulong sa ilawom sa kitchen sink cabinet sa ilang tindahan, ug sa dihang nakasulod na, ang suspek nakahigayon sa pagkawat sa mga halin nga gibutang sa ilang cashier’s cabinet.

Sa pagtan-aw sa CCTV footage sa nasangpit nga establisemento, nasayran nga isa ka lalaki nga suspek ang nakit-an nga misulod sa nasangpit nga edipisyo ug gikuha ang maong cash ug sinsilyo.

Human sa hitabo, nakaikyas ang suspek gamit ang samang lungag ilawom sa lababo nga iyang gihimo, diin siya nisulod kaniadto.

Dugang pa, ang Valencia CPS nagpahigayon og hot pursuit operation alang sa pagkasikop sa suspek alang sa posibleng pagpasaka og kaso. (melbmadera)

Armas, gidudahang shabu nasakmit sa buy bust sa Kalilangan

Posted on by Omar Rashid Z. Abdullah

Isa ka revolver ug gidudahang shabu ang nasakmit sa hiniusang puwersa sa kapolisan sa buy bust operation nga nahigayon sa Purok 3, Macatol, Macaopao, Kalilangan, Bukidnon hapon sa Disyembre 3

Sumala sa report ni Police Major Christian D. Serdeña, hepe sa Kalilangan Municipal Police Station, nasikop sab nila ang duha ka mga lalaking suspek nga nag-edad 30 ug 31 anyos.
Lakip sa mga nasakmit sa kapolisan gikan sa mga suspek ang isa ka Smith and Wesson Cal .38 revolver without serial number nga kargado sa tulo ka mga bala, ug gidudahang shabu nga mitimbang sa 51.5 gramos nga adunay street value nga Php 350,200.
Ang nga nasikop ug mga ebidensya ang gidala ngadto sa Kalilangan MPS. Samtang ang mga drug pieces ang itugyan ngadto sa Bukidnon Forensic Unit alang sa qualitative ug quantitative
examinations.
Sa pagkutlo ning balita, gihikay na sa kapolisan ang kasong violation sa Sections 5 ug 11 sa Article II sa R.A. 9165 kon Comprehensive Dangerous Drug Act of 2002 ug violation sa R.A. 10591 kon “Comprehensive Firearms and Ammunition Regulation Act”.
Kauban sa buy bust operation sa Kalilangan MPS ang Bukidnon Provincial Intelligence Unit (BUK PIU). (Omar Rashid Z. Abdullah)

3 suspek sa pagpangawat nakorner

Posted on by Omar Rashid Z. Abdullah

Tingkagol sa selda sa kapolisan sa dakbayan sa Malaybalay ang tulo ka mga suspek sa pagpangawat sa Bides residence sa San Isidro St. Ext., Purok 2, Brgy. 9, Malaybalay City, Bukidnon

Sila giingon nga nasapon sa biktima uban sa mga silingan pasado alas 8:00 sa gabii niadtong Nobyembre 16.

Sumala sa report sa kapolisan, ang mga nasikop tanan mga lalaki. Sila kasamtangan ubos sa kustodya sa kapolisan sa Malaybalay.

Apan ang duha ka mga kauban sa nasikop ang hingpit nga nakasibat ug gipangita pa sila sa kapolisan.

Nasayran nga namatikdan sa mga silingan nga milayat ang mga suspek sa sementong kural sa Bides Residence. Gumikan niini, nirespondi ang biktima kinsa nagpuyo kilid lang sa ilang ancestral house uban sa pipila ka mga silingan ug nasikop ang tulo ka mga suspek. (Omar Rashid Z. Abdullah)