MALAYBALAY CITY, Bukidnon – Gi-inagurahan ug giturn-over kaniadtong Pebrero 24, 2026 ang ₱11,050,000 nga unang Rice Processing System sa Region 10 ubos sa Department of Agriculture – Rice Competitiveness Enhancement Fund (RCEF)

Ang pasilidad nahimutang sa LARC Area, Purok 2, Barangay Linabo, Malaybalay City, Bukidnon.

Sumala sa press release sa City Government of Malaybalay, ang proyekto naglangkob sa usa ka multi-stage rice mill, mini warehouse, ug solar dryer nga nagtumong sa pagpalig-on sa post-harvest operations, pagkunhod sa gasto sa produksyon, ug pagdugang sa kita sa mga mag-uuma pinaagi sa mekanisasyon.

Isip unang pasilidad nga ingon niini sa Region 10, kini nagtimaan og dakong kalampusan alang sa mga kooperatiba sa humay sa Northern Mindanao.

Ang seremonya gitambongan ni Philippine Center for Postharvest Development and Mechanization (PhilMech) Region 10 Cluster Head Engr. Edgar B. Testa; representante sa Department of Agrarian Reform (DAR) nga si Marvin Calleja uban ang upat ka personnel; representante sa Department of Agriculture Regional Field Office 10 Provincial Operations Center nga si Jamaica Docdoc; ug Executive Assistant IV John Valmores nga nagrepresentar kang Mayor Jay Warren R. Pabillaran.

Mitambong usab si ABED Representative Engr. Febelino Rebote; representante sa City Agriculture Office nga si Sherwin Blanco alang kang Engr. Richard B. Leono; AgriCoop Coordinator Chesa B. Bautista; Monitoring and Evaluation Section Personnel/Agribusiness Coordinator Gecel Q. Ocon; Barangay Captain Manuel Evangelista Sr.; ang RMN team; ug ang Board of Directors ug mga miyembro sa Linabo Agrarian Reform Cooperative (LARC).

Sa iyang mensahe, gipasabot ni Engr. Testa nga ang mekanisasyon sa humay makapakunhod sa gasto sa produksiyon og ₱2–₱3 matag kilo ug makaminos sa post-harvest losses og 3–5 porsyento.

Giawhag usab niya ang mga mag-uuma nga pahimuslan pag-ayo ang Rice Processing System ug mangita og high-value industrial linkages aron mas mapadako pa ang ilang kita ug matabangan ang komunidad.

Samtang si Valmores, nga nagrepresentar sa mayor sa dakbayan, mi-awhag sa mga benepisyaryo nga dumalahon pag-ayo ang proyekto ug ipatuman ang transparency ug accountability aron masiguro ang malungtarong operasyon niini.

Ang bag-ong giturn-over nga pasilidad gilauman nga makapaayo sa kahusayan sa pagproseso sa humay, makapausbaw sa kalidad sa bugas, ug makapalig-on sa mga mag-uuma sa Linabo ug kasikbit nga mga komunidad—usa ka ehemplo alang sa umaabot nga mga proyektong suportado sa RCEF sa Region 10. (Gecel Quinquiño-Ocon, City Agri NADA/melbmadera)

Kaniadtong Pebrero 24, 2026, gipahigayon ang inagurasyon ug pagtugyan sa ₱11,050,000 nga unang Rice Processing System sa Region 10 ubos sa Department of Agriculture – Rice Competitiveness Enhancement Fund (RCEF) sa LARC Area, Purok 2, Barangay Linabo, Malaybalay City, Bukidnon. (Hulagway gikan sa opisyal nga Facebook page ni Jay Warren R. Pabillaran