Isa ka babaye ug isa ka lalaki, nga kanhi myembro sa New People’s Army (NPA) ug nailhan sa ngalan nga Friends Rescued sa Bukidnon, gisikop sulod sa kampo sa army

Sumala sa report ni Police Major Anthony O. Towend, OIC sa Bukidnon 1st Provincial Mobile Force Company, ang warrant of arrest gipatuman sa buntag sa Setyembre 17, 2025, sa 43MICo sulod sa 403rd Brigade, Philippine Army, sa Impalambong, Brgy. 10, Malaybalay City, Bukidnon.

Ang nadakpan nga babaye, 33-anyos, nailhan sa alyas nga Gina/Giya/Tata/Alex/Reps, kanhi sakop sa Medical Platoon, Guerilla Front 6 (GF-6), North Central Mindanao Regional Committee (NMRC) sa NPA, Top 7 Most Wanted Person sa City Level, ug Top 6 Most Wanted Person sa Provincial Level.

Ang lalaki, 34-anyos, alyas Bobong/Rebo/Rendon/Doding/Tabor, dili PSR listed, kanhi vice commanding officer/squad leader sa Squad 1 sa LOADER, Sub-Regional Committee (SRC) 2, NCMRC sa NPA.

Ang duha gisikop sa parehong kaso: duha ka ihap sa pagpatay ug duha ka ihap sa pagsulay sa pagpatay, nga nakadokumento sa Criminal Case Nos. 41403-23 hangtod 41406-23 nga may petsa Agosto 3, 2023. Wala’y girekomendar nga piyansa alang sa kaso sa pagpatay, samtang P120,000.00 ang girekomendar nga piyansa alang sa matag kaso sa pagsulay sa pagpatay.

Gidala ang mga akusado sa Malaybalay CPS alang sa mugshot, booking, ug husto nga pagproseso. Ang mosyon para sa dayon nga kustodiya gisumite ug gi-aprobahan na sa Opisina sa City Prosecutor.

Ang arresting joint law enforcement unit naglangkob sa BUK 1st PMFC, Malaybalay CPS, 1004th MC, RMFB10, 12th SAC, 1SAB, PNP-SAF, (IG) ISOD, DI-MAPIO, ug gihimo kini sa koordinasyon sa Buk PIU. (melbmadera)