Dakong kalipay ang gibati sa mga lumulupyo sa Sitio San Vicente, Brgy. Gandingan, ug Sitio Sinasaan, Brgy. Portulin, sa Pangantucan, Bukidnon, sa pagdawat sa Small Water Impounding System (SWIS) Project

Ang turnover gihimo sa mismong duha ka project site niadtong Septembre 16, 2025, diin gipasidunggan ug gipasalamatan sa komunidad ang DENR Region 10, CENRO Valencia City, ug LGU Pangantucan sa maong proyekto.

Sa maong aktibidad, nitambong ang mga representante sa DENR Region 10, ang CENR Officer Sir Morito B. Estifano, RPF, ang PENRO sa Bukidnon, Sir Thomas L. Cardente II, PhD, ug uban pang mga kaubanan.

Sa bahin sa lokal nga pangagamhanan sa Pangantucan, nitambong sa ngalan sa mayor si Municipal Administrator Maam Lynel U. Galleros ug ang LEDIPO/CSO Focal/Private Secretary Maam Joanne G. Tagros.

Kauban usab sa turnover ang mga miembro sa Konseho sa Barangay Gandingan sa buntag ug sa Barangay Portulin sa kahaponon sa susamang adlaw.

Tumong sa programa ang paghatag og igong pondohanan sa tubig alang sa panginadlaw-adlaw nga gamit sa mga nasangpit nga sitio. Nahimo kini pinaagi sa nagkahiusang paningkamot sa mga ka-komunidad pinaagi sa ilang mga POs, sa tabang sa Barangay Council, LGU Pangantucan, PENRO, CENRO, ug labi na ang DENR Region 10.

Sa ceremonial MOA signing, gipakita sa komunidad ang ilang commitment sa pag-amuma, pag-amping, ug pag-suporta sa proyekto uban sa BLGU, LGU, CENRO, ug DENR Region 10. (melbmadera)