QUEZON, Bukidnon – Gisaulog kaniadtong Pebrero 23, 2026, ang ikaupat nga anibersaryo sa Quezon Health Center Infirmary (QHCI), nga giila karon isip usa sa mahinungdanong haligi sa serbisyo pangkahimsog sa munisipyo

Sumala sa press release sa lokal nga kagamhanan, si Mayor Pablo Lorenzo III ang nanguna sa kasaulogan uban sa mga miyembro sa Sangguniang Bayan.

Sukad sa pagkatukod niini niadtong 2022 hangtod karon, libre nang nakaalagad ang QHCI og 128,602 ka kaso pinaagi sa admissions, outpatient consultations, ug emergency services.

Niadtong 2023, nadugangan ang serbisyo sa pag-abli sa Animal Bite Center, nga nakatabang na sa 11,089 ka pasyente.

Gawas pa niini, nakahatag usab ang infirmary og 181,196 ka libreng laboratory services ug 25,486 ka radiology services alang sa katawhan.

Sumala ni Mayor Lorenzo, ang himsog nga katawhan maoy lig-on nga pundasyon sa usa ka malambuon ug mauswagon nga komunidad.

Usa sa labing makahuluganon nga higayon sa kasaulogan mao ang dungan nga pagsaulog sa adlawng natawhan ni Marianne Magdasal Magsayo, ang unang bata nga gipanganak sa infirmary. (melbmadera)