Nakit-ang patay ang isa ka 63-anyos nga lalaki sulod sa umahan sa mais sa Purok 7, Sitio
Nabunturan, Barangay Pinamula, Kibawe, Bukidnon, niadtong buntag sa Agosto 21, 2026.

Sumala sa police report, nakit-an sa lawas sa biktima ang grabeng samad nga gituohang
pinusilan sa ubos nga bahin sa tuo nga ilok.

Matud sa anak sa biktima, miadto ang iyang amahan sa ilang umahan pasado alas-6 sa gabii
niadtong Agosto 20 aron magbantay sa ilang mais nga wala pa hingpit maani tungod sa
nangaging mga insidente sa pagpangawat sa ani.
Apan wala na kini makapauli pagkasunod buntag, hinungdan nga nabalaka ang pamilya ug
nangadto sa umahan aron pangitaon siya. Didto na nakaplagan sa iyang anak ang biktima nga
wala nay kinabuhi pasado alas-8 sa buntag.
Samtang, sumala sa usa ka barangay peacekeeping action team (BPAT) chief sa Barangay
Pinamula, iyang nahibaloan gikan sa iyang hipag nga nakadungog kini og upat ka sunod-sunod
nga buto sa armas sa maong barangay pasado alas-8 sa gabii niadtong Agosto 20.
Wala pa mailhi sa kapulisan ang suspek o mga suspek, samtang padayon ang imbestigasyon aron
mahibal-an ang motibo ug eksaktong mga sirkumstansiya sa insidente. (melbmadera)