Isa ka 75-anyos nga babayeng balo ang gipatay ug gisunog pa sa Purok 2, Brgy. Labuagon, Kibawe, Bukidnon buntag sa Hulyo 26, 2025

Sumala sa report sa kapolisan, ang lalaking suspetsado nailhan nga 37-anyos, kinsa residente sab sa dapit.

Siya boluntaryong nitahan pasado alas 11:45 sa buntag pagkasunod adlaw human kini nangayo og tabang sa isa ka Lay Minister nga residente usab sa maong barangay nga ubanan siya ngadto sa buhatan sa kapolisan.

Ang inisyal nga impormasyon nagpadayag nga gipatay sa suspetsado ang biktima pinaagi sa pagbunal sa ulo niini gamit ang isa ka palwa sa lubi ug pagkahuman gisunog ang lawas niini, nga maoy hinungdan sa kamatayon sa naulahi.

Ang mga nagrespondeng personahe gikan sa Kibawe MPS nisugod dayon og adto sa lugar sa krimen aron susihon ang report.

Sa ilang pag-abot sa lokasyon, ilang nasuta nga ang sinunog nga lawas sa biktima nakuha na gikan sa dapit sa insidente ug gidala na sa balay sa iyang suod nga pamilya.

Ang suspetsado kasamtangang anaa sa temporaryong pagdakop sa estasyon samtang nagpadayon ang imbestigasyon ug hustong legal nga mga lakang.

Dugang pa, ang Kibawe MPS pormal nga nangayo og tabang sa Provincial Forensic Unit (PFU) nga base sa Malaybalay City, Bukidnon, aron maghimo og crime scene processing ug pagkuha sa posibleng pisikal nga ebidensiya nga may kalabotan sa kaso. (Omar Rashid Z. Abdullah)