Gipasidunggan sa Provincial Government of Bukidnon, pinaagi sa Provincial Economic Enterprise Development & Management Office (PEEDMO), ang walo ka Bukidnon Provincial Hospitals human misobra sa target ang nakolekta niini nga income sa tuig 2024

Ang plaque of recognition gidawat sa mga Chief of Hospitals atol sa gipahigayon nga Monthly Convocation Program kaniadtong Agosto 4, 2025, sa Kaamulan Open Theater, Kaamulan Park, Malaybalay City, Bukidnon.

Sa infirmary hospitals, nakuha sa BPH-Talakag ang 104 percent nga target income; 108 percent sa BPH-Malitbog; 213 percent sa BPH-San Fernando; ug 319 percent sa BPH-Kalilangan.

Samtang, nakuha sa BPH-Manolo Fortich ang 182 percent target income ug 171 percent sa BPH-Kibawe, nga parehong nahisakop sa level I hospitals.

Sa level II hospitals, usab nakuha sa BPMC ang 137 percent target income ug 152 percent ang sa BPH-Maramag.

Sa gipresenta nga accomplishment report ni Atty. Roger L. Ligdo, PG Department Head, PIASO, ug OIC sa PEEDMO, nasayran nga ang nanganlan nga provincial hospitals nakalikom ug ₱810 million nga income collections sa tuig 2024 o 72 percent nga kontribusyon sa ₱1.1 billion nga locally sourced income sa probinsya sa tuig 2024, hinungdan usab nga nag-una ang Bukidnon sa adunay pinakataas nga kolekta niini sa tibuok Mindanao.

Sa maong koleksyon, 69 percent niini ang naggikan sa PhilHealth; 27 percent sa Department of Health; ug pinakaubos ang over-the-counter nga 4 percent.

Gipasalamatan usab ni Atty. Ligdo ang dugang pundo nga gigahin sa probinsya alang sa drugs & medicines ug medical supplies, gikan sa ₱515 million sa tuig 2024 ngadto sa ₱539 million sa tuig 2025, diin maggamit kini basi sa mga panginahanglanon nga giplano sa mga hospitals.

Gipasalig ni Governor Rogelio Neil P. Roque nga lakip sa pagatutukan sa probinsya ug sa health team ang pagpalambo sa maayong panglawas pinaagi sa pagsusi sa mga nag-unang panginahanglanon sa maong mga hospitals. (melbmadera)