Ang local government unit sa Valencia City, Bukidnon, nihatag og cash aid sa 39 ka kanhi NPA rebels kinsa residente sa maong dakbayan

Sumala sa Facebook page sa LGU Valencia, ang matag-isa kanila nakadawat og tag-P10,000.

Ang kantidad gihatag isip counterpart nga suporta gikan sa LGU-Valencia.

Ang seremonya sa pagtugyan gipahigayon sa Covered Court sa City Hall sa Valencia buntag sa Agosto 11.

Kini nga inisyatibo nagadugang sa mga benepisyo ubos sa Enhanced Comprehensive Local Integration Program (E-CLIP) sa nasudnong gobyerno ug nagtinguha sa pagtabang sa mga nagbalik-loob nga makabarog pag-usab sa ilang kinabuhi ug makapahimutang og malungtarong panginabuhian nga layo sa armado nga pakigbisog.

Nitambong sa kalihokan ang mga kadagkoan sa Valencia City sa pagpanguna ni Mayor Amie Galario, kadagkoan sa 89th Infantry Battalion, kapolisan, ug uban pa.

Sumala sa rekord, 26 sa mga nakadawat gikan sa Barangay Banlag, upat gikan sa Barangay Concepcion, tulo sa Barangay Sinayawan, duha sa Barangay Sinabuagan, ug tag-isa gikan sa Barangay Dagatkidavao, Lumbo, Lumbayao, ug Mabuhay. (melbmadera)