Kaniadtong Setyembre 24, 2025, natigayon ang seremonya sa blessing ug ribbon-cutting alang sa natapos na nga multi-million-peso road concreting project sa junction sa Brgy. Mabuhay padulong sa Brgy. Banlag Proper ngadto sa Sityo Pantaron sa Valencia City, Bukidnon

Ang maong farm-to-market road napondohan ubos sa Philippine Rural Development Project (PRDP) sa Regional Office 10 sa Department of Agriculture (DA).

Nanguna sa kalihokan sila Mayor Amie G. Galario ug DA-10 Regional Director Jose Apollo Pacamalan, kinsa regional project director sa PRDP-Project Support Office Mindanao.

Mapasalamaton sila Punong Barangay Robert Boje sa Banlag ug Punong Barangay Melchor de la Cruz Garcia sa Mabuhay sa katumanan sa proyekto.

Sumala sa Facebook post sa City Government of Valencia, ang maong proyekto nagkantidad og ₱238,931,539.85.

Nagpahayag usab sa ilang pagpasalamat sila Mayor Galario, City Vice Mayor Greizl Galario-Fernandez, City Councilor Ryan Rosal, ug ang IP community, ug giila nga ang proyekto makahatag og kaayohan sa komunidad ug makatampo sa mas lapad nga kalamboan sa dakbayan.

Sa pagkonkreto sa maong dalan, gilauman usab sa lokal nga pangagamhanan nga mahimong mas hapsay ang transportasyon sa mga produkto sa mga mag-uuma, mapalambo ang turismo, ug mosaka ang kalihokan sa lokal nga ekonomiya sa nasangpit nga mga barangay.(melbmadera)