Upat ka mga lalaki ang nadakpan sa managlahing drug buy-bust operations sa mga otoridad sa
Kitaotao ug Kalilangan, Bukidnon, diin nakumpiska ang gituohang shabu nga mokabat sa kapin
₱500,000 ang gibana-banang kantidad.

Sa Kitaotao, tulo ka mga lalaki ang nadakpan sa buy-bust operation sa Purok 4, Barangay Tawas,
gabii niadtong Sept. 20, 2026.
Sumala sa Kitaotao Municipal Police Station, walo ka sachet sa gituohang shabu nga gibana-
banang nagkantidad og ₱26,248 ang nakumpiska sa operasyon, lakip ang mga cellphone ug drug
paraphernalia.
Giandam na sa mga otoridad ang dokumento alang sa pagsang-at og kaso batok sa tulo ka suspek
tungod sa giingong paglapas sa Sections 5 ug 11, Article II sa Republic Act No. 9165, o
Comprehensive Dangerous Drugs Act of 2002, as amended.
Samtang sa Kalilangan, isa ka 29-anyos nga lalaki nga giila lamang sa alyas nga “Berto” ang
nadakpan sa hiniusang drug buy-bust operation sa Barangay Poblacion sayong buntag niadtong
Sept. 19.
Gi-classify sa kapulisan ang suspek isip street-level individual, samtang wala pa gipagawas ang
iyang tinuod nga ngalan.
Gawas sa gituohang shabu nga mokabat og duolan sa ₱500,000 ang gibana-banang kantidad,
nakumpiska usab sa mga operatiba ang isa ka cellphone, motorsiklo, helmet, backpack ug ₱1,000
nga cash.
Giandam usab ang kasong paglapas sa Sections 5 ug 11, Article II sa RA 9165 batok sa maong
suspek.
Ang mga nadakpan nga suspek anaa na sa kustodiya sa tagsa-tagsa nilang police station alang sa
dokumentasyon ug hustong disposisyon. (melbmadera)