Nagpadayag si former Valencia City Mayor Jun Galario Jr. nga mas pilion niya nga maka-alyansa si last-termer Bukidnon Second District Representative Atty. John T. Flores kaysa kay incumbent Governor Rogelio Neil P. Roque alang sa pagka-gobernador sa 2028 elections

Gibase kini sa posibilidad nga magbulag ang duha sa ilang political alliance nga One Bukidnon, nga gipangulohan ni Senador Juan Miguel F. Zubiri, sa umaabot nga eleksyon.

Nasulti kini ni Galario, nga spokesperson sa iyang asawa nga si City Mayor Amie Galario, atol sa usa ka media engagement kaniadtong Marso 5, 2026.

Apan kung si Senador Zubiri mobatok kang Roque sa pagka-gobernador, giingon ni Galario nga kini hisgotanan pa.

Sa paghimo niini nga balita, wala pa makuha ang komento nila Flores, Roque, ug Zubiri.

Sa laing bahin, gipadayag ni Galario nga dili na siya interesado nga modagan sa bisan unsang posisyon sa pulitika sa umaabot nga mga eleksyon. Gisulti usab niya nga wala na niya gilihok ang pagwagtang sa iyang perpetual disqualification, kay dili na siya magpapili.

Kabahin sa Valencia, giingon niya nga ang iyang asawa nga si Mayor Amie Galario ug ilang anak nga si Vice Mayor Cecil Galario-Fernandez gihapon ang iendorso sa 2028 elections.

Nasulti usab niya nga adunay balita nga mag-uban sila former Vice Mayor Atty. Ted Pepito nga modagan isip mayor ug si former Mayor Azucena Huervas isip bise mayor, apan wala pay kumpirmasyon kabahin niini. (melbmadera)