Friday, April 19, 2024

Author: Diego M. Hidalgo

No. 1 MWP sa Bukidnon tingkagol sa selda

Posted on by Diego M. Hidalgo

Nakorner sa hiniusang puwersa sa kapolisan sa Valencia City Police Station ug 2nd Bukidnon Provincial Mobile Force Company ang No. 1 most wanted person sa probinsya sa Bukidnon

Ang sinikop nailang si Junrie Sumile a.k.a. Jhondrie Sumile y Guibahon, 44, widower, laborer ug residente sa Brgy. Lilingayon, Valencia City, Bukidnon.

Sa Police Lt. Col. Mitchel Clemencio, OIC sa Valencia CPS, miingon sa iyang report nga si Sumile nakorner sa Sitio Tandacol, Brgy. Lilingayon pasado alas 3:20 sa buntag niadtong Enero 13, 2024.

Gisikop siya pinasubay sa standing warrant of arrest sa kasong qualified rape ubos sa Par (1A) sa Art. 266-A may kalabotan sa Art. 266-B.

Gi-docket kini ubos sa Criminal Case Number 40212-22 nga pinetsahan og Enero 6, 2023 nga walay girekomendar nga piyansa.

Sa laing bahin, nasikop sab sa mga miyembro sa Libona MPS ug Bukidnon Provincial Intelligence Unit ang No. 5 MWP sa Bukidnon niadtong Enero 13, 2024.

Siya nailang si Romnick Castino Niedo, 35, minyo, jobless ug residente sa Purok 4B,
Laturan, Libona, Bukidnon.

Nasikop niya sa ilang dapit pinasubay sa standing warrant of arrest sa duha ka ihap sa kasong Statutory Rape by Sexual Assault ug Acts of Lasciviousness kalabot sa Sec. 5(b)
sa RA 7610 as amended by RA 11648”.

Nakadokit kini sa kaso kriminal numero 23-12-8316 ug 23-12-8317, 23-12-8318 pinetsahan og Enero 2, 2024 nga adunay piyansa nga girekomendar nga nagkantidad og PhP60,000.00 ug PhP200,000.00. (Diego M. Hidalgo)

3 minors suspek sa pagpangdunggab sa Malaybalay

Posted on by Diego M. Hidalgo

Tulo ka minor de edad nga lalaki ang gitudlong suspek sa pagpangdunggab patay sa isa 43-anyos nga lalaki sa Zone 7, Brgy. 1, Malaybalay City

Sumala kini sa report ni Police Lt. Col. Julius Clark Prisco Macariola IV, OIC sa Malaybalay City Police Station (MCPS).

Bisan pa sa pagdala sa Bukidnon Provincial Medical Center, gideklarar sa nag-atiman nga mananambal nga namatay ang biktima wala madugay sa pag-abot.

Sa imbestigasyon, nasuta nga mga alas 11:30 sa gabii niadtong Enero 12, 2024, ang biktima kinsa gituhuang hubog ang anaa sa gawas sa iyang pinuy-anan.

Giingon nga ang tulo ka mga menor de edad ang miatubang kaniya sa walay igong rason ug gidunggab siya sa tuong bahin sa iyang liog.

Human sa hitabo, daling misibat ang mga suspek paingon sa wala masayring direksiyon, samtang ang biktima nakadagan pa paingon sa iyang balay aron magpatabang.

Ang Malaybalay CPS mihimo dayon og hot pursuit operation aron masikop ang mga suspek apan wala pay kasayoran sa kalamboan niini sa paghimo ning balita.

Padayon pa nga giimbestigahan sa MCPS ang motibo sa maong pagpanunggab. (Diego M. Hidalgo)

P5M budget gisaad sa SPES implementers sa Bukidnon

Posted on by Diego M. Hidalgo

Mikabat sa P5-million nga budget ning tuiga ang gisaad gikan sa Special Program for the Employment of Students (SPES) implementers sa probinsya sa Bukidnon

Ang pasalig naggikan sa nagkalain-laing Local Government Units (LGUs) ug academe sector sa probinsiya sa Bukidnon ngadto sa Department of Labor and Employment (DOLE-X) alang sa SPES nga implementasyon.

Napadangat ang mga pasalig atol sa program pledging ug implementers’s re-orientation kaniadtong Enero 12, 2024 sa The Gardens Party Venue and Suites, Malaybalay City, Bukidnon.

“Ang mga pledges makabenepisyo sa 1,185 ka mga kabus nga mga estudyante sa tibuok probinsya,” giingon kini ni Mr. Raul Valmores, chief sa Bukidnon Provincial Field Office (Buk PFO) sa DOLE 10.

Nagpaabot sab sa pasalamat si Valmores sa partner implementers sa programa sa tuig 2023 sa ilang 100 percent accomplishment.

Mipahinumdum siya nga hatagan ang mga kabatan-onan sa mga trabaho na makapalambo sa ilang critical thinking, problem-solving, ug life-skills alang sa ilang kaugmaon.

Ang maong panagtapok gisuportahan sa Bukidnon Public Employment Service Office (PESO)
Manager’s League, Inc, President ug Manolo Fortich PESO Manager Roger Molina uban sa
laing lima ka partner academe institutions sa probinsiya. (Diego M. Hidalgo)

Mga mag-uuma sa FFS gibansay

Posted on by Diego M. Hidalgo

Gibansay sa Provincial Agriculture Office (PAgrO) ang 30 ka mag-uuma sa Farmers Field School (FFS) kabahin sa Irrigated Lowland Rice Production

Matod sa kasayoran, pagabansayon ang mga partisipante sulod sa 16 ka semana sa matag
adlawng Myerkules.

Ang kalihokan una nang gisugdan niadtong Oktobre 10, 2023 didto sa Barangay Kalabugao,
Impasug-ong, Bukidnon.

Sa ika-13 nga session niadtong Enero 10, 2024, gihisgutan ang kabahin sa Palay Check System Key Check 7, no significant yield loss tungod sa peste ug sakit, hands-on nga pagbuhat sa concoction o organic nga abono ug insecticides.

Lakip sab nila nga gitun-an ang kabahin sa pagdumala sa pagpalambo sa humay. (Diego M. Hidalgo)

2 MWP sa Bukidnon nakorner

Posted on by Diego M. Hidalgo

Nakorner sa kapolisan ang Top 4 ug Top 6 most wanted persons sa Bukidnon sa managlahi nga law enforcement operations

Matod sa report sa kapolisan, niadtong Enero 5, 2024, nasikop sa kapolisan sa Manolo Fortich Municipal Police Station (MFMPS) si Fernando Cabandog y Casas, 56 anyos.

Si Cabandog ang Top 4 MWP sa Bukidnon ug Top 3 sa Municipal level.

Nakorner siya sa Zone 7, Sitio Awol, Brgy. Lunocan, Manolo Fortich sa tulo ka ihap sa kasong Qualified Rape.

Sa laing bahin, niadtong Enero 7, 2024, nasikop ang 28-anyos nga babayeng pinangita sa balaod nga si Lovely Bation Sabuero sa Sitio Bagong Silang, Brgy. Sta Inez, Malitbog, Bukidnon

Ang nakorner nga Top 6 most wanted person sa probinsya, nag-atubang sa kaso nga adunay kalabotan sa druga. (Diego M. Hidalgo)

Lalaki gitigbas sa pag-umangkon sa Quezon

Posted on by Diego M. Hidalgo

Isa ka 58-anyos nga lalaki ang gitigbas sa iyang kainom nga pag-umangkon sulod sa payag sa Purok 6, Brgy. San Roque, Quezon, Bukidnon gabii sa Enero 7, 2024

Sumala sa report sa Quezon Municipal Police Station (QMPS), ang suspek isa ka 42-anyos nga lalaki kinsa residente ra sab sa dapit.

Ang suspek boluntaryong mitahan sa tanod sa barangay.

Pagkahuman, ang suspek ang gitugyan sab ngadto sa buhatan sa kapolisan lakip ang lampas nga gigamit sa krimen.

Sa inisyal nga imbestigasyon, nasayran nga sa wala pa ang insidente, nag-inom ang biktima ug ang suspek sa barongbarong nga nahimutang sa dapit.

Giingon nga human nila mahurot ang botelya sa rum, nag-init ang ilang panaglalis tungod sa kahubog.

Sa wala madugay gitigbas sa suspek ang biktima makaduha ka higayon nga naigo sa nawong ug duha ka mga kamot.

Human sa krimen, midagan palayo ang suspek ug boluntaryong mitahan sa Barangay Tanod, ug gitugyan sab ang gigamit sa krimen.

Ang suspek anaa na karon sa kustodiya sa Quezon MPS alang sa tukmang disposasyon samtang ang biktima gidala sa Quezon Health Center Infirmary aron matambalan. (Diego M. Hidalgo)

75-anyos nga babaye nadasmagan og sakyanan sa Valencia

Posted on by Diego M. Hidalgo

Isa ka 75-anyos nga pedestrian ang nadasmagan sa Suzuki utility vehicle sa National Road, Purok 8, Brgy. Bagontaas, Valencia City, Bukidnon gabii sa Disyembre 30, 2023. Sumala sa report sa Valencia City Police Station, ang sakyanan nagdagan gikan sa Valencia City paingon sa Malaybalay

Sa pag-abot sa dapit nga nahitaboan, aksidenteng nabanggaan niini ang nahisgutang pedestrian kinsa milabang sa maong karsada gikan sa subangan paingon sa kasadpang direksyon.

Naangol ang biktima ug gidala sa Adventist Medical Center, Valencia City, Bukidnon apan gideklarar sa nag-atiman nga mananambal nga patay na sa wala pa mahiabot.

Nakita ang mga kadaot sa atubangan nga bahin, windshield ug accessories sa sakyanan.

Dugang pa, temporaryo nga gikustodiya sa Valencia CPS ang sakyanan uban sa 41-anyos nga lalaking drayber alang sa tukmang disposisyon. (Diego M. Hidalgo)

Estudyante nasamdan sa firecracker sa Maramag

Posted on by Diego M. Hidalgo

Nasamad ang walang ring finger sa isa ka estudyante human mibuto ang whistle bomb nga gisulod sa lata hapon sa Disyembre 30, 2023

Sumala sa report sa Maramag Municipal Police Station, ang biktima isa ka 21-anyos nga lalaki ug anaa na sa stable nga condition.

Matod sa biktima, siya ug ang iyang mga higala nagduwa og pabuto (whistle bomb) sa Purok 3, Brgy. Camp 1, Maramag, Bukidnon.

Iyang gidagkutan ang isa sa mga whistle bomb ug gibutang kini sa isa ka lata. Ug sa dihang nibuto, nabuak ang lata ug naigo sa iyang walang kamot nga nakaingon sa pagkaangol. (Diego M. Hidalgo)

Mga napatay nga NPA sa Malaybalay gilubong na

Posted on by Diego M. Hidalgo

Gilubong na sa Malaybalay City Cemetery sa Sityo Gabunan, Brgy. Casisang ang pito ka mga myembro sa New People’s Army (NPA) buntag sa Disyembre 29, 2023

Ang pito mao sila si Bebot Sulinay, Louie Bada, Penita Singaman, magtiayong NPA Leader nga sila si Alfredo Banawan ug Beverly Sinunda, ilang anak nga si Angely Banawan ug isa ka Analyn.

Sila lakip sa napulo ka mga NPA nga napatay sa militar sa hilit nga bahin sa Sitio Kiito, Brgy. Can-ayan, Malaybalay City kaniadtong Disyembre 25, 2023.

Mahinumduman nga ang militar migamit sa ilang bag-ong napalit nga mga asset sa ilang operasyon batok sa maong grupo kinsa giingon nga nangandam alang sa anibersaryo sa Communist Party of the Philippines (CPP) sa Disyembre 26, 2023. (Diego M. Hidalgo)

Lalaki gipusil sa Don Carlos

Posted on by Diego M. Hidalgo

Isa ka lalaki ang gipusil patay sa Purok 8, Brgy. Calaocalao, Don Carlos, Bukidnon gabii
sa Disyembre 27

Sumala sa report sa kapolisan sa Don Carlos, ang biktima gipusil patay samtang naglingkod sa
ilang balcony.

Ang biktima nakaangkon sa grabing mga samad pinusilan sa lawas hinungdan sa iyang
hinanaling kamatayon.

Saysay sa higala sa biktima, nga samtang nag-estoryahanay sila, isa ka wala mailhing lalaki nga
nagsuot og jacket nga adunay hood, ang misulod sa pinuy-anan sa biktima ug girakrakan kini.

Ang wala mailhing lalaki nga suspek daling misibat human sa insidente.

Narekober sa crime scene ang 20 ka baseyo sa bala sa Armalite rifle ug isa ka kapsola sa
bala sa kalibre .45 pistola.

Padayon pa ang imbestigayon sa kapolisan aron pag-ila sa suspek ug pagsuta sa motibo sa
krimen. (Diego M. Hidalgo)