Gidunggab patay ang 54-anyos nga babaye sa iyang 43-anyos nga lalaking silingan sa Purok 5, Brgy. Bagontaas, Valencia City, Bukidnon, gabii sa Agosto 9, 2025

Sa report ni Police Lt. Col. Bryan M. Panganiban, chief of police sa Valencia City Police Station (VCPS), ang biktima nakadawat og lima ka samad pinaagi sa pagsaksak sa tunga nga bahin sa iyang lawas.

Siya gideklarang patay sa pag-abot sa ospital mga alas-9:04 sa gabii sa mao gihapong petsa sa iyang nag-atiman nga doktor.

Nasuta sa pasiunang imbestigasyon sa kapolisan nga, sa wala pa ang insidente, ang biktima ug ang asawa sa suspetsado naglalis og grabe.

Sa pagkahibalo sa suspetsado sa maong panaglalis, giingong nawad-an siya’g pagpugong sa kaugalingon, nikuha og kutsilyo, ug niduol sa biktima nga nag-inom sa balkonahe, dayon gidunggab kini sa makadaghang beses.

Ang mga personahe sa Valencia CPS nagpadayon sa mainit nga paggukod aron posibleng masikop ang suspetsado. (Diego M. Hidalgo)