Sunday, March 30, 2025

Author: Diego M. Hidalgo

PhP168K fake money nasakmit sa Pangantucan

Posted on by Diego M. Hidalgo

Mikabat sa PhP168,600.00 nga fake money ang nasakmit gikan sa isa ka lalaki didto sa Public Market sa Pangantucan, Bukidnon kaniadtong Hulyo 7, 2024

Sumala sa report ni Police Captain Edgar M. Apog, OIC sa Pangantucan Municipal Police Station (PMPS), ang counterfeit paper bills nasakmit gikan sa 36-anyos nga lalaki.

Ang nasikop nga suspek residente sa Dungo-an, M’lang, Cotabato.

Ang laing lalaki ug isa ka babaye nga mga kauban sa nasikop nga suspek ang nakasibat.

Nasikop ang suspek sa mga myembro sa Pangantucan MPS human nireklamo ang duha ka sari-sari store owners sa Brgy. Lantay, Pangantucan nga nabiktima sa peke nga sapi.

Ang mga suspek sakay sa pulang multicab gikan sa Lantay ug niadto sa merkado publiko diin nasikop ang isa kanila.

Ang narekober nga pekeng sapi naglangkob sa 312 ka P500 fake paper bills, 12 sa P1,000 ug tulo sa P200. (Diego M. Hidalgo)

Ceremonial turn-over sa corn production support livelihood project gikan NEDA, gipahigayon

Posted on by Diego M. Hidalgo

Niadtong Mayo 22, 2024, ang Corn Production Livelihood Project nga nagkantidad og PhP 500,000.00 pormal nga giturn-over sa Silae Corn Growers Association (CGA)

Ang proyekto nga gitunol gikan sa National Economic Development Authority (NEDA-10).

Ang dakbayan sa Malaybalay giila sa NEDA-10 nga isa sa mga Local Government Unit (LGU) nga maka-avail sa ER 1-94 Funds aron suportahan ang mga livelihood projects nga makatabang sa pagsulbad sa taas nga poverty rate sa nasud.

Sumala sa social media post sa LGU Malaybalay, sa 46 ka barangay sa dakbayan, ang Barangay Silae ang prayoridad tungod kay isa kini sa mga barangay nga adunay taas nga poverty incidence.

Ang mga nakadawat miyembro usab sa asosasyon sa sub-cluster sa CGA.

Sa ngalan ni City Mayor Atty. Jay Warren R. Pabillaran, si Mr. Anthony James Mondia, executive assistant II, mipadayag nga kini nga proyekto makatabang dili lamang sa pagpataas sa kita sa mag-uuma, kon dili sa pagpasiugda usab sa pagpataas sa ilang abot nga mao ang nag-unang tumong sa programa.

Samtang si Konsehal Alan Ryan O. Legaspi, chairperson sa committee on agriculture, nipahinumdoman sa mga nakadawat nga ampingan ang ilang nadawat nga panginabuhian. (Diego M. Hidalgo)

Negosyante, investor sa Bukidnon, gidasig magkuha sa certificate of registration

Posted on by Diego M. Hidalgo

Gidasig ang mga negosyante ug investors sa Bukidnon, nga magkuha sa Certificate of Registration sa ilang mga negosyo sa Provincial Government of Bukidnon (PGB)

Tumong aron makapahimulos sila sa fiscal ug non-fiscal incentives pinaagi sa PGO-Local Economic Development and Investment Promotions Office (LEDIPO) subay sa Bukidnon Investment Code of 2021.

Sumala sa pahibalo sa PGB, lakip sa listahan nga anaa sa Investment Priority Areas sama sa agri-business, forestry-based industries, service-related industries, tourism related establishments, support services, ug waste management and waste disposal projects.

Kini alang niadtong mga proyekto, sama sa new projects, expansion projects, modernization projects, ug diversification projects, diin adunay gitakda nga filing fee nga nagkantidad sa nagkadaiyang klasipikasyon : large enterprises – ₱50,000; medium – ₱20,000; small- ₱5,000, ug micro – ₱1,000.

Alang sa dugang detalye ang mga hingtundan mamahimong magbisita sa opisina sa PGO-LEDIPO nga nahimutang sa National and Provincial Building, Capitol Compound, syudad sa Malaybalay, o mag message sa Ledipo Bukidnon Facebook page. (Diego M. Hidalgo)

6 barangay sa Valencia nakadawat og SGLGB award

Posted on by Diego M. Hidalgo

Unom ka barangay sa dakbayan sa Valencia ang napasidunggan sa Seal of Good Local Governance for Barangay (SGLGB) Award alang sa tuig 2023

Sumala sa social media post sa LGU Valencia, ang seremonya gipahigayon sa Gymnasium sa Brgy. Lumbo kaniadtong Mayo 22, 2024.

Ang mga awardee sa SGLGB mao ang Barangay Barobo, Batangan, Catumbalon, Mailag, Laligan, ug San Isidro.

Gitunol ang maong mga pasidungog sa presensiya nila CLGOO Jan Eric Manasan, City Mayor Azucena Huervas, mga membro sa Sangguniang Panlungsod sa pagpanguna ni Vice Mayor Atty. Ted Pepito ug Liga ng mga Barangay President Louie John Naiz.

Sa maong seremonya, giila usab ang ubang barangay mahitungod sa ilang partisipasyon ug pagsuporta sa SGLGB.

Ang SGLGB isa ka progresibong sistema sa pag-ebalwar sa perpormans ug pagdasig nga mapalambo ang pagserbisyo sa mga kabarangayan sa siyudad. (Diego M. Hidalgo)

Public hearing sa proposed provincial revenue code of 2024 gipahigayon

Posted on by Diego M. Hidalgo

Gipahigayon ang serye sa public hearing sa Proposed Provincial Revenue Code of 2024 sa Bukidnon

Sumala sa kasayoran sa provincial government sa Bukidnon, ang unang serye gipahigayon sa Kaamulan Open Theater, Malaybalay City, Bukidnon kaniadtong Mayo 27, 2024.

Ang maong schedule alang sa ikaduhang distrito sa Bukidnon nga gilangkuban sa syudad sa Malaybalay ug mga munisipyo sa Lantapan, Cabanglasan, San Fernando, ug Impasugong.

Ang sa 3rd District gipahigayon sa Mayo 29, 2024 sa Municipal Amphitheater (likod sa Municipal Hall), Anahawon, Maramag, Bukidnon; Mayo 30, 2024 ang sa 1st District nga gihimo didto sa Barangay Tankulan Covered Court, Tankulan, Manolo Fortich, Bukidnon; ug sa Mayo 31, 2024 ang sa 4th District nga gihimo sa Lumbo Covered Court, Lumbo, Valencia City, Bukidnon.

Gidapit ang tanang stakeholders aron makapaabot sa ilang mga suhestyon o komento kabahin sa ipahamtang nga taxes, fees, and charges sa PGB. (Diego M. Hidalgo)

Fire Insp. Salga gipasidunggan

Posted on by Diego M. Hidalgo

Gitunol ang pasidungog ngadto kang Fire Inspector Mary Ranilie Ladrillo Salga

Nahigayon ang pagtunol niadtong Mayo 21, 2024 didto sa Sangguniang Panlunsod (SP) Session Hall sa Old City Hall building sa Malaybalay City atol sa 92nd regular session sa SP.

Kaniadtong Abril 16 atol sa 87th regular session sa SP, giduso ni Konsehal Zoltan Dindo D. Dinlayan nga hatagan og Recognition si Salga isip Top six nga nag-graduate sa Philippine National Police Academy (PNPA) LAYAG-DIWA Class of 2024.

Si Fire Inspector Salga gikan sa Barangay 10 sa Malaybalay City.

Siya kinamagulangang anak sa kanhing empleyado sa City Government of Malaybalay nga si late Ramon Salga ug Nelly L. Salga.

Produkto siya sa Malaybalay City Central School (MCCS), Bukidnon National High School (BNHS) ug Cagayan de Oro College (COC) sa wala pa siya nisulod sa PNPA. (Diego M. Hidalgo)

One Bukidnon overall champion sa NMRAA 2024

Posted on by Diego M. Hidalgo

Nahimong overall champion sa gipahigayon nga 2024 Palarong Pampook Northern Mindanao Regional Athletic Association (NMRAA) ang One Bukidnon

Sumala sa kasayoran sa kagamhanag probinsyal sa Bukidnon ang NMRAA gidula niadtong Mayo 9-17, 2024 didto sa munisipyo sa Mambajao, Camiguin Island.

Ang One Bukidnon overall champion sa secondary ug elementary level batok sa contingents gikan sa Cagayan De Oro, Misamis Oriental, Iligan, Lanao Del Norte, Misamis Occidental ug Camiguin.

Sa maong kalihukan mihatag og suporta ang Provincial Government of Bukidnon (PGB), ug nagpadangat kini sa dakong pasalamat sa tanang batan-ong atleta nga midula, dala ang pangalan sa probinsya.

Ang One Bukidnon girepresentahan sa DepEd-Province of Bukidnon, DepEd-Malaybalay City ug DepEd-Valencia City. (Diego M. Hidalgo)

6 LGUs misumite og SB resolutions sa pagdeklarar sa State of Calamity

Posted on by Diego M. Hidalgo

Nakasumite ngadto sa PGO-PDRRMD ang unom ka mga LGUs sa Bukidnon sa ilang SB Resolutions nga nagdeklara sa ilang area of responsibility ubos sa state of calamity, gumikan sa nasinati nga taas nga panahon sa ting-init o dry spell

Sumala sa social media page sa provincial government sa Bukidnon, ang unom ka mga munisipyo mao ang Kibawe, Kitaotao, Quezon, Cabanglasan, Pangantucan, ug Impasugong.

Nakasumite usab sa ilang report sa kadaot sa hulaw ang Kadingilan, Damulog ug Valencia City apan wala magdeklara sa state of calamity.

Sa punto sa Valencia, ang City Disaster Risk Reduction Managemernt Council (CDRRMC) nagpalabang og resolution nga nagrekominda sa konseho sa maong dakbayan alang sa deklarasyon sa State of Calamity.

Nasayran ang kasayoran sa report ni Mr. Israel Johan M. Damasco, Jr., head sa PGO-PDRRMD atol sa radio program sa PGB – “ang Kalihukan sa Probinsya” kaniadtong Mayo 17, 2024.

Iyang gibatbat ang Revised Guidelines alang sa Declaration of a State of Calamity sa NDRRMC.

Pipila nini mao nga at least 15 percent sa forecasted affected population basi sa science-based projection nga nanginahanglan sa dinalian nga tabang; at least 30 percent sa nag-unang panginabuhian sa sektor sa agrikultura, negosyo ug industriya ang naapektuhan; lapad nga kadaut sa mga fishpond, pananom, manok ug kahayupan, ug uban pang suplay sa agrikultura; ug uban pa. (Diego M. Hidalgo)

Isa ka tunghaan sa Lantapan nasunog

Posted on by Diego M. Hidalgo

Isa ka sunog ang miigo sa Capitan Juan Integrated School sa Purok 1, Brgy. Capitan Juan, Lantapan, Bukidnon hapon sa Mayo 18, 2024

Upat ka mga lawak ang nasunog ug isa ka lawak ang partially burned.

Sumala kini sa report ni Police Major Jessie James M. Lasdoce, OIC sa Lanatapn Municipal Police Station.

Gipahigayon ang pasiunang imbestigasyon sa sa dapit ang gihimo sa Fire Arson Investigator sa Bureau of Fire Protection (BFP) Lantapan.

Subay niini, ang hinungdan sa sunog mao ang isa ka mibuto nga electric grid.

Ang sunog sa ulahi midako tungod sa gaan nga mga materyales ug pagkauga sa giingon nga mga materyales nga gitaod sa edipisyo.

Walay kaswalti o nasamdan sa hitabo.

Ang gibanabana nga structural damage, lakip na ang mga butang, kapin o kulang PhP1,000,000.00. (Diego M. Hidalgo)

Tawo giduggab sa igsoon sa Kibawe

Posted on by Diego M. Hidalgo

Isa ka lalaki ang gidunggab patay sa iyang manghod didto sa Purok 9, Romagook, Kibawe, Bukidnon

Ang insidente nahitabo gabii sa Marso 26, 2024, sumala kini sa report ni Police
Major Jayvee G. Babaan, OIC sa Kibawe Municipal Police Station.

Ang 31-anyos nga biktima nakaangkon sa grabing samad dinunggaban sa tuong dughan ug tiyan.

Gidala siya sa Bukidnon Provincial Hospital (BPH) sa Kibawe, Bukidnon apan gideklarar siyang patay sa niatiman nga doktor.

Sumala pa, sayong gabii sa maong petsa, samtang tua sa Barangay Pay-as, Kadingilan, Bukidnon, ang duha samtang nagka-inom sa ilimnong makahubog ang nagkalalis nga niresulta sa pagsinumbagay.

Pagkahuman, ang suspek niadto sa panimalay sa ilang ginikanan sa Romagook aron magkuha sa iyang mga sinina.

Ang duha nagkakita didto pag-usab diin gihapak sa biktima ang walang bukton sa suspek gamit ang palwa sa lubi.

Gumikan niini gihublot sa 26-anyos nga suspek ang iyang dalang kutsilyo ug gidunggab ang iyang magulang makaduha ka higayon.

Ang suspek nasikop sa niresponding kapolisan.

Walay pagsinabtanay sa managsoon ang nakitang motibo sa krimen. (Diego M. Hidalgo)