Sunday, December 22, 2024

Author: Diego M. Hidalgo

SLM-SALT gisugyot nga sundon sa mga mag-uuma

Posted on by Diego M. Hidalgo

Gisugyot sa Provincial Agriculture’s Office ngadto sa mga mag-uuma sa mais ang Sloping Land Management (SLM)- Sloping Agricultural Land Technology (SALT) alang sa nagkalain-laing conservation practices sama sa contour farming, cover cropping ug inter-cropping

Ning kasamtangang tuig, unang gipatuman ang pagbansay niini ngadto sa upat ka LGU nga gilangkuban sa Barangay Palabucan, Libona niadtong Pebrero 27, 2024; Barangay Iba, Cabanglasan niadtong Pebrero 28, 2024; Barangay Kipilas, Kitaotao niadtong Pebrero 29, 2024; ug sa Barangay Lagandang, Damulog sa Marso 1, 2024.

 

Sumala sa kasayoran sa Provincial Government of Bukidnon, ang programa gipondohan sa PGO- Provincial Disaster Risk Reduction and Management Office.

 

Labing gitinguha nga ma-minusan ang epekto sa pagdahili sa yuta og nutrient depletion sa mga vulnerable sloping agricultural areas.

 

Sa ingon, mapalambo ug ma-konserba ang yuta, makadugang sa soil organic matter, makapadayon sa pagpananom ug maka-income ang mga mag-uuma. (Diego M. Hidalgo)

WCCC, BVRC buildings gisugdan na sa pagtukod

Posted on by Diego M. Hidalgo

Gisugdan sa pagtukod sa Provincial Government of Bukidnon (PGB) ang Women and Children Crisis Center (WCCC) ug Bukidnon Vocational Resource Center (BVRC)

Gpatuman ang proyekto sa pinaagi sa Provincial Engineering Office (PEO).

Sumala sa kasayoran, ang duha ka mga gambalay ipabarug diha sa Grandstand, Sumpong, Malaybalay City, Bukidnon.

Ang Women and Children Crisis Center gitagan-an sa probinsya og pondo nga sobra ₱12.8-M.

Samtang sobra ₱7.3-M usab ang sa Bukidnon Vocational Resource Center.

Kini base sa naaprubahan nga contract of agreement tali DevDrex Construction Services ug Mamawag Construction.

Mahinumduman nga una nang gipondohan sa PGB ang 392.48 meters nga katas-on sa perimeter fence sa maong dapit, nga naka-kontrata sa Shabe Enterprises, sa contract cost ₱4,090,904.33. (Diego M. Hidalgo)

P9.9-M View Deck, Board Walk gipabarug  

Posted on by Diego M. Hidalgo

Gisugdan na ang pagpabarog sa View Deck ug Board Walk project sa Kaamulan complex. Sumala sa kasayoran, ang proyekto nga nagsugod na niadtong Enero 12, 2024, iya sa Provincial Government of Bukidnon (PGB).

Mikabat sa ₱9,979,458.28 ang pondo sa proyekto nga nagsumikad sa 20 percent Development Fund sa PGB.

Kini ipahimutang sa likod sa Capitol Main Building sa Capitol Compound, Malaybalay City, Bukidnon.

Ang proyekto ipatuman pinaagi sa pagdumala sa Provincial Engineering Office (PEO).

Ang SPEC Construction Services and Supplies ang nakontrata sa sa proyekto. (Diego M. Hidalgo)

Programa sa clean and green sa kabarangayan gisusi sa LGU-Malaybalay

Posted on by Diego M. Hidalgo

Gilantaw na sa City Clean and Green Evaluators ang nahimo sa mga kabarangayan pinaagi sa pagpahigayon sa tinuig nga Search for the Cleanest and Greenest Barangay

Nunot kini sa makanunayon nga paningkamot sa lokal nga Pangagamhanan sa Malaybalay nga masiguro ang kalimpyo ug kahapsay sa kalikopan.

Sumala sa kasayoran sa kagamhanang lokalsa Malaybalay, ang evaluation napatuman subay sa direktiba ni Mayor Jay Warren R. Pabillaran.

Gisuta sa evaluating team nga gibahin sa duha ka grupo niadtong Pebrero 1-23, 2024 ang 46 ka barangay kabahin sa kinatibuk-ang kalimpyo sa palibot pinaagi sa ilang lakang ug stratehiya nga nahimo.

Gilantaw sab sa evaluating team ang pagpakita sa pinasahi nga inisyatiba sa kabarangayan sa pagprotekta sa kinaiyahan.

Lakip na gitan-aw ang pagpatuman sa mga lakang nga gimando diha sa ordinansa numero 962 mahitungod sa ecological solid waste management (ESWM).

Gisusi usab ang kamahinungdanon nga palisiya sama sa paggahin og pundo sa programa ug kalihokan sa clean and green.

Nagpasalamat ang mga opisyales sa barangay nga sila nagiyahan sa mga gingbuhaton labi na nga matutokan ang komitiba sa clean and green, ESWM, ug green brigade.

Dugang pa, nahatagan usab og importansya ang pagmugna sa communal garden basi sa ordinansa 1016 s. 2023 ug ingon man ang ordinansa 668 mahitungod sa responsable nga pagpanagiya sa kahayopan.

Gisuta usab ang aktibo nga partisipasyon sa komunidad labi sa pag-atiman sa palibot, gulayan sa barangay ug panimalay, pagpatukod sa material recovery facility ug nursery, recycling activities, landscaping, tree planting, pag-amuma sa tree park ug paglikay sa galatagaw nga kahayopan sa publikong lugar.

Gilangkuban sa duha ka kategorya ang 46 ka barangay.

Sa category A, mao ang Poblacion Barangays 1, 9, 10, 11, Aglayan, Apo Macote, Bangcud, Cabangahan, Can-ayan, Casisang, Dalwangan, Kalasungay, Laguitas, Linabo, Magsaysay, Managok, Miglamin, Patpat, Silae, San Jose, San Martin, Simaya, ug Sumpong.

Sa category B, mao ang barangays 2, 3, 4, 5, 6, 7, 8, Busdi, Caburacanan, Capitan Anghel, Imbayao, Indalasa, Kibalabag, Kulaman, Maligaya, Manalog, Mapayag, Mapulo, Sinanglanan, Sto. Niño, Violeta, St. Peter, ug Zamboagita. (Diego M. Hidalgo)

Babaye gisikop gumikan sa multiple charges

Posted on by Diego M. Hidalgo

Isa ka babayeng wanted ang nasikop sa mga miyembro sa Kadingilan Municipal Police Station (KMPS) gumikan sa daghang mga kaso

Sumala sa report sa Kadingilan MPS, ang sinikop nailang si Jenevie Geniston Coritico, dalaga, 37 anyos.

Nasikop siya pinasubay sa outstanding warrant of arrest didto sa nagkadaiyang mga kaso sa Purok 2, Rizal Street, Brgy. Don Carlos Sur, Don Carlos, Bukidnon pasado alas 2:27 sa buntag niadtong Enero 25, 2024.

Giatubang sa akusado ang isa ka ihap sa kasong Qualified theft nga nakadokit sa criminal case NO. CR. ORD. 2017-1387, pinetsahan Enero 30, 2017 nga adunay girekomindang bail bond nga Php80,000.00.

Samtang akusado sab siya 65 ka mga kaso sa Falsification of Commercial Document nga nakadokit sa upat ka managlahing kaso kriminal.

Ang maong mga kaso adunay kinatibuk-ang girekomindang bail bond nga P780,000.00.

Ang dinakpan anaa sa kustodiya sa Kadingilan MPS sa pagkutlo ning balita alang sa dokumentasyon ug tukmang disposasyon. (Diego M. Hidalgo)

RTMI bus gitulis sa Kitaotao

Posted on by Diego M. Hidalgo

Gitulis sa duha ka mga lalaki ang RTMI bus didto sa Sitio Pamulaan, Purok 10, Brgy. Sinuda, Kitaotao, Bukidnon pasado alas 11:40 sa gabii niadtong Enero 29, 2024

Sumala sa report ni Police Captain Christopher P. Tuzara, OIC sa Kitaotao Municipal Police Station (KMPS), ang mga wala mailang lalaking suspek nakasol-ob og red hooded ug dirty white hooded jackets.

Ang gitulis nga RTMI passenger bus adunay body no. 2795 ug plate no. NDD 4025.

Gimanehoan kini sa 53 anyos nga lalaki, holder sa PDL samtang ang konduktor isa ka 36 anyos nga nga lalaki.

Sumala pa, ang isa sa mga suspek mition sa wala masayring kalibre sa pistola sa konduktor ug gilimas ang mikabat sa P10,000 nga fare collection.

Sa imbestigasyon, nasayran nga gikan sa Davao City ang bus paingon sa Cagayan de Oro City.

Sa pag-abot sa lugar sa insidente, ang duha ka wala mailhing suspek ang mipara ug misakay sa bus.

Ang suspek nga nagsul-ob og pula nga jacket midiretso sa konduktor sa bus nga naglingkod tapad sa drayber dayon gikasa ang pistola ug gitionan ang konduktor.

Niingon ang suspek nga “Walay palag ha, kwarta ra amoa tuyo” ug gikuha ang fare collection gikan sa konduktor.

Pagkahuman, nga wala pay isa ka kilometro ang duha ka mga suspek mikanaog sa bus ug miikyas nga nagbaktas paingon sa wala matinong direksyon.

Padayon pa nga nagpahigayon og hot pursuit operation ang mga sakop sa Lorega PCP sa Kitaotao MPS kauban ang force multiplier sa maong barangay alang sa posibleng pagsikop sa mga suspek. (Diego M. Hidalgo)

3 gipanigbas sa Manolo Fortich

Posted on by Diego M. Hidalgo

Gidala sa hospital ang tulo ka mga lalaking gipanigbas sa Purok 2, Brgy. Dicklum, Manolo Fortich, Bukidnon

Sumala sa report ni Police Major Virgilio D. Cruz, OIC Manolo Fortich MPS ang insidente nahigayon sayong buntag sa Enero 22, 2024.

Ang unang biktima giila nga isa ka 29-anyos kinsa nakaangkon og samad tinigbasan sa dapit tuo nga kilid nga bahin sa iyang bukton; ikaduha ang 48-anyos nga nakaangkon og samad tinigbasan sa walang bahin sa iyang bukton; ug ang ikatulo mao ang 27-anyos kinsa nakaangkon og samad tinigbasan sa iyang tuo nga nawong ug likod nga bahin sa abaga.

Sila daling gidala sa Bukidnon Provincial Hospital sa Brgy. San Miguel, Manolo Fortich ug anaa na sa luwas nga kahimtang sa pagsuwat ning balita.

Samtang ang 42-anyos nga lalaking suspek ang daling misibat human sa hitabo padulong sa wala masayring direksyon.

Nasayran sa imbestigasyon sa kapolisan nga mga ala 1:00 sa buntag niadtong Enero 22, 2024, ang mga biktima ug ang suspek ang naghusay sa ilang kanhi init nga panaglalis sa nasampit nga lugar.

Apan giingon nga sa wala madugay gitigbas sa suspek ang mga biktima gamit ang sundang.

Nagpadayon pa ang imbestigasyon sa kapolisan kabahin sa hitabo samtang nagpabilin nga at large ang suspek. (Diego M. Hidalgo)

No. 1 MWP sa Bukidnon tingkagol sa selda

Posted on by Diego M. Hidalgo

Nakorner sa hiniusang puwersa sa kapolisan sa Valencia City Police Station ug 2nd Bukidnon Provincial Mobile Force Company ang No. 1 most wanted person sa probinsya sa Bukidnon

Ang sinikop nailang si Junrie Sumile a.k.a. Jhondrie Sumile y Guibahon, 44, widower, laborer ug residente sa Brgy. Lilingayon, Valencia City, Bukidnon.

Sa Police Lt. Col. Mitchel Clemencio, OIC sa Valencia CPS, miingon sa iyang report nga si Sumile nakorner sa Sitio Tandacol, Brgy. Lilingayon pasado alas 3:20 sa buntag niadtong Enero 13, 2024.

Gisikop siya pinasubay sa standing warrant of arrest sa kasong qualified rape ubos sa Par (1A) sa Art. 266-A may kalabotan sa Art. 266-B.

Gi-docket kini ubos sa Criminal Case Number 40212-22 nga pinetsahan og Enero 6, 2023 nga walay girekomendar nga piyansa.

Sa laing bahin, nasikop sab sa mga miyembro sa Libona MPS ug Bukidnon Provincial Intelligence Unit ang No. 5 MWP sa Bukidnon niadtong Enero 13, 2024.

Siya nailang si Romnick Castino Niedo, 35, minyo, jobless ug residente sa Purok 4B,
Laturan, Libona, Bukidnon.

Nasikop niya sa ilang dapit pinasubay sa standing warrant of arrest sa duha ka ihap sa kasong Statutory Rape by Sexual Assault ug Acts of Lasciviousness kalabot sa Sec. 5(b)
sa RA 7610 as amended by RA 11648”.

Nakadokit kini sa kaso kriminal numero 23-12-8316 ug 23-12-8317, 23-12-8318 pinetsahan og Enero 2, 2024 nga adunay piyansa nga girekomendar nga nagkantidad og PhP60,000.00 ug PhP200,000.00. (Diego M. Hidalgo)

3 minors suspek sa pagpangdunggab sa Malaybalay

Posted on by Diego M. Hidalgo

Tulo ka minor de edad nga lalaki ang gitudlong suspek sa pagpangdunggab patay sa isa 43-anyos nga lalaki sa Zone 7, Brgy. 1, Malaybalay City

Sumala kini sa report ni Police Lt. Col. Julius Clark Prisco Macariola IV, OIC sa Malaybalay City Police Station (MCPS).

Bisan pa sa pagdala sa Bukidnon Provincial Medical Center, gideklarar sa nag-atiman nga mananambal nga namatay ang biktima wala madugay sa pag-abot.

Sa imbestigasyon, nasuta nga mga alas 11:30 sa gabii niadtong Enero 12, 2024, ang biktima kinsa gituhuang hubog ang anaa sa gawas sa iyang pinuy-anan.

Giingon nga ang tulo ka mga menor de edad ang miatubang kaniya sa walay igong rason ug gidunggab siya sa tuong bahin sa iyang liog.

Human sa hitabo, daling misibat ang mga suspek paingon sa wala masayring direksiyon, samtang ang biktima nakadagan pa paingon sa iyang balay aron magpatabang.

Ang Malaybalay CPS mihimo dayon og hot pursuit operation aron masikop ang mga suspek apan wala pay kasayoran sa kalamboan niini sa paghimo ning balita.

Padayon pa nga giimbestigahan sa MCPS ang motibo sa maong pagpanunggab. (Diego M. Hidalgo)

P5M budget gisaad sa SPES implementers sa Bukidnon

Posted on by Diego M. Hidalgo

Mikabat sa P5-million nga budget ning tuiga ang gisaad gikan sa Special Program for the Employment of Students (SPES) implementers sa probinsya sa Bukidnon

Ang pasalig naggikan sa nagkalain-laing Local Government Units (LGUs) ug academe sector sa probinsiya sa Bukidnon ngadto sa Department of Labor and Employment (DOLE-X) alang sa SPES nga implementasyon.

Napadangat ang mga pasalig atol sa program pledging ug implementers’s re-orientation kaniadtong Enero 12, 2024 sa The Gardens Party Venue and Suites, Malaybalay City, Bukidnon.

“Ang mga pledges makabenepisyo sa 1,185 ka mga kabus nga mga estudyante sa tibuok probinsya,” giingon kini ni Mr. Raul Valmores, chief sa Bukidnon Provincial Field Office (Buk PFO) sa DOLE 10.

Nagpaabot sab sa pasalamat si Valmores sa partner implementers sa programa sa tuig 2023 sa ilang 100 percent accomplishment.

Mipahinumdum siya nga hatagan ang mga kabatan-onan sa mga trabaho na makapalambo sa ilang critical thinking, problem-solving, ug life-skills alang sa ilang kaugmaon.

Ang maong panagtapok gisuportahan sa Bukidnon Public Employment Service Office (PESO)
Manager’s League, Inc, President ug Manolo Fortich PESO Manager Roger Molina uban sa
laing lima ka partner academe institutions sa probinsiya. (Diego M. Hidalgo)