Friday, April 04, 2025

Author: Omar Rashid Z. Abdullah

Covid-19 Bivalent Vaccination gipahigayon sa Malaybalay

Posted on by Omar Rashid Z. Abdullah

Nagmalampuson nga napahigayon ang Covid-19 Bivalent Vaccination (Pfizer) Vaccination sa dakbayan sa Malaybalay

Ang Provincial Government of Bukidnon nitaho nga ang maong aktibidad nahigayon niadtong Hulyo 6, 2023 sa BPMC, Casisang, Malaybalay City, Bukidnon.

Tinguha sa Department of Health (DOH) nga mahatagan og dugang proteksyon batok sa COVID-19 virus ang mga healthcare workers sa Bukidnon Provincial Medical Center (BMPC) ug senior citizens.

Gihatagan ug prioridad niini ang mga health care workers ug senior citizens nga nakahuman na og dawat sa ilang 2nd booster shot sa milabay nga upat ka bulan.

Sa data gikan sa Provincial Health Office (PHO), miihap sa 114 ang kinatibuk-ang nabakunahan niini.

Samtang, padayon nga naglibot ang DOH ngadto sa mga LGU aron sa pagpamakuna sa nasangpit nga mga priority groups, aron makuha ang target nga 4,630 ka indibidwal sa dili pa matapos ang Hulyo 24, 2023. (Omar Rashid Z. Abdullah)

Resolusyon alang sa paggahin og pundo sa eye screening sa indigent senior citizens, gisugyot

Posted on by Omar Rashid Z. Abdullah

Gisugyot ang isa ka resolusyon nga naghangyo ngadto sa mga Local Government Unit (LGUs) sa probinsya sa Bukidnon nga maggahin og pundo alang sa eye screening and examination sa mga angayan ug indigent nga mga senior citizens

Base sa pahibalo sa Province of Bukidnon, gisugyot kini niadtong Hulyo 4, 2023 sa Sangguniang Panlalawigan Session Hall sa dakbayan sa Malaybalay.

Ang maong resolusyon nahisubay ubos sa Republic Acct No. 9994, ang Expanded Senior Citizens Act of 2010, diin nakalatid ang angayang suporta ug serbisyo nga ihatag ngadto sa mga senior citizens, lakip na dinhi ang alang sa ilang maayong panglawas. (Omar Rashid Z. Abdullah)

20 ka baka gitugyan ngadto sa FRs sa Lumintao

Posted on by Omar Rashid Z. Abdullah

Gitugyan sa Provincial Government of Bukidnon (PGB) ang 20 ka mga baka ngadto sa 36 ka mga former rebels (FRs) sa Lumintao

Base sa pahibalo sa Provincial Government of Bukidnon, gitugyan kini atol sa Turnover Ceremony sa Barangay Lumintao, Quezon, Bukidnon, niadtong Hunyo 30, 2023.

Sa mensahe ni Board Member Casinabe, kinsa mao usab ang 27th Sangguniang Panlalawigan Committee Chair on Poverty Alleviation nga tungod sa makanunayon nga pakiglambigit ug pagpangumusta ngadto sa mga opisyales sa barangay, nahimo kining tulay nga makaabot sa IP community sa Sitio Sto. Domingo sa Barangay Lumintao ug nakahimamat ang mga FRs ug masayran ang ilang panginahanglanon.

Anaa sa maong tigum ang mga veterinarian gikan sa lungsod sa Quezon ug sa probinsya sa Bukidnon aron sa pagsiguro nga himsog ug anaa sa kondisyon ang mga baka nga nauna nang gihatagan sa bitamina, purga ug ingon man nga tips unsaon maatiman pag-ayo ang baka aron mapalambo ang maong programa alang sa komunidad sa tribung Manobo. (Omar Rashid Z. Abdullah)

Unang Paragames sa Bukidnon, ipahigayon

Posted on by Omar Rashid Z. Abdullah

Masaksihan na sa dili madugay ang pinaka-una nga paragames dinhi sa Probinsya sa Bukidnon alang sa mga tawo nga adunay mga kakulangon

Base sa pahibalo sa Provincial Government of Bukidnon, ang para-games ipahigayon karong Hulyo 19-21, 2023 sa dakbayan sa Malaybalay.

Tumong niini nga makab-ot ang social change sa probinsya alang sa mga tawo nga adunay kakulangon nga mapagawas ug mapasundayag ang ilang kahanas ug kapabilidad.

Gidasig ang mga talentadong PWDs nga interesado niini sa pagpakisayud sa opisina sa disability affairs sa ilang munisipyo aron sa pagpangutana sa mga kinahanglanon aron maka apil sa maong paragames.

Pipila sa mga dula nga masaksihan mao ang flag raising, sitting volleyball, basketball wheel chair, table tennis, chess, athletics wheelchair race, javelin throw, ug shotput. (Omar Rashid Z. Abdullah)

Tigwahanon Tribe mipasiugda sa 1st Padiuros sa Pulangi Festival 2023

Posted on by Omar Rashid Z. Abdullah

Gipasiugdahan sa tribung Tigwahanon ang 1st Padiuros sa Pulangi Festival 2023

Dungan kini nga gilusad sa Panuluwuhig sa Sabangan sa mga suba sa Pulangui ug Tigwa, niadtong Hunyo 24, 2023.
Ang Provincial Government of Bukidnon nipahibalo nga nahigayon kini didto sa Barangay Tugop, San Fernando, Bukidnon.
Adunay pito ka mga sumasalmot ang miparehistro alang sa puno sa kulbahinam nga kalihukan nga pinaka-una kini nga pagpasiugda sa matag tuig nga selebrasyon sa pagtamud sa kulturanhong pagkinabuhi sa Sabangan.
Nahimong mananaug ang gakit nga gidumala sa Tribal, ikaduha ang Barangay Luwan-luwan; ikatulo ang Purok Leaders, ug ikaupat ang BPATS.
Gipangunahan ni Valerie Lastino Datu Imbagtu Gintumuwan ang Panuluwuhig uban sa tribal elders, bae ug datu kung aha masaksihan usab ang presensya sa kabataan sa tribu, kinsa nagtimbayayong sa matag buluhaton sa ilang katigulangan.
Ang “Panuluwuhig” gikan sa termino nga “panulu” o kahayag/iwag ug “wahig” nagpasabot nga tubig, diin ang ilang katigulangan kaniadto namolong nga ang suba sa sabangan mamahimong tinubdan sa kahayag ug tubig, sanglit kini man karon ang gikuhaan sa kuryenti ug tubig sa atong kagamhanan. (Omar Rashid Z. Abdullah)

Sawaga River gideklarang priority conservation area sa Malaybalay

Posted on by Omar Rashid Z. Abdullah

Gi-aprobahan sa Sangguniang Panlungsod sa Malaybalay kaniadtong Hunyo 13, 2023 ang Ordinance No. 1018 Series of 2023

Ang Sawaga River Conservation and Management Ordinance of 2023 nagdeklara sa Sawaga River ug sa mga kasikbit nga dapit sulod sa hurisdiksyon sa dakbayan sa Malaybalay isip isa ka priority conservation area.
Base sa pahibalo sa Malaybalay City Government, ang giaprobahan nga ordinansa naglangkob sa lain-laing mga lakang aron mapanalipdan ug mapreserbar ang Sawaga River, ug ang legal nga easement niini.
Ubos sa ordinansa, ang mga Local Government Units (LGUs) gimanduan sa pagsiguro sa pagpatuman sa makatarunganon ug praktikal nga mga lakang sa pagpanalipod, pag-restore, ug pagpauswag sa kalidad sa kinaiyahan, subay sa mga prinsipyo sa ecologically sustainable development. (Omar Rashid Z. Abdullah)

Top 3 MWP sa Bukidnon, nakorner

Posted on by Omar Rashid Z. Abdullah

Nakorner sa hiniusang pwersa sa kapolisan ang Top 3 Most Wanted Person sa Bukidnon sa P-1, Barangay 7, Malaybalay City, Bukidnon niadtong Hunyo 19, 2023

Ang suspek naila nga si Kyle Warren Ebin y Dumaque, 25, ulitawo, ug residente sa maong dapit.
Siya gisikop subay sa warrant of arrest sa kasong paglapas sa Comprehensive Dangerous Drugs Act of 2002 (RA 9165).
Base sa report nga nahipos sa Bukidnon Police Provincial Office, ang arestado anaa ubos sa kustodiya sa PIU Bukidnon alang sa hustong disposasyon. (Omar Rashid Z. Abdullah)

Top 4 PNP-PDEA HVI nasikop sa Malaybalay

Posted on by Omar Rashid Z. Abdullah

Nasikop sa kapolisan ang Top 4 HVI PNP-PDEA Target Listed sa Bukidnon sa gipahigayon nga drug buy-bust operation nga gipahigayon niadtong Hunyo 17, 2023

Ang suspek giila nga si Abel Naybe y Palasan Jr., 30, Backhoe operator, minyo, ug residente sa Purok -1, Barangay
Kalasungay, Malaybalay City, Bukidnon.
Base kini sa taho ni Police Lt. Col. Julius Clark Prisco M. Macariola IV, OIC sa Malaybalay City Police Station.
Nasakmit gikan sa suspek ang gibana-bana nga 2 gramo sa gidudahang shabu nga adunay estimated market value nga Php 13,600.00.
Ang suspek gidala na sa Malaybalay CPS para sa hustong disposasyon.
Kasong paglapas sa Article II, Sections 05 ug 11 of R.A. 9165 ang giandam na batok sa suspek. (Omar Rashid Z. Abdullah)

U4U Training of Trainers and Roll Out gipahigayon sa Valencia

Posted on by Omar Rashid Z. Abdullah

Pipila ka mga estudyante sa Valencia National High School ang gibansay sa lokal nga pangagamhanan sa Valencia sa gipahigayon nga You-for-You (U4U) Training of Trainers and Roll Out

Ang City Government of Valencia nipahibalo nga ang pagbansay nahigayon niadtong Hunyo 1-2, 2023.

Gipahigayon kini pinaagi sa Population Development Division sa City Social Welfare and Development Office (CSWDO) sa pakigtambayayong sa Provincial Population Office.

Sentro sa maong pagbansay ang pag-edukar sa mga kabatan-onan kalabot sa teenage pregnancy ug paglikay sa paglambigit niini ingon man nga mahimo sila nga ehemplo sa pagtabang sa pagkampanya batok sa sayo nga pakighilawas. (Omar Rashid Z. Abdullah)

Workshop sa Muleta Watershed Convergence Area Development Plan, gipahigayon sa Malaybalay

Posted on by Omar Rashid Z. Abdullah

Isa ka workshop alang sa pagpalambo sa Muleta Watershed Convergence Area Development Plan (CADP) ang gipahigayon sa Dalwangan, Malaybalay City, Bukidnon niadtong Mayo 16-19, 2023

Base sa pahibalo sa Department of Agriculture Regional Field Office X, tumong sa workshop nga madugangan ang kahibalo sa partisipante sa NCI-SRD ug ang Manual of Operations niini, paghimo og inisyal nga draft sa gikinahanglan nga mga seksyon sa CADP, ug pagtakda og mga timeline alang sa pagpalambo sa CADP.

Gipasiugda ni DA-10 Regional Technical Director for Operations Carlota S. Madriaga nga gikinahanglan ang pakigtambayayong sa Regional Convergence Initiative – Technical Working Group (RCI-TWG) ug sa Local Government Units aron makab-ot ang gitinguhang resulta sa sugyot. (Omar Rashid Z. Abdullah)