Nikabat sa PhP2,027,760.00 nga kantidad sa gidudahang shabu ang nasakmit gikan sa manag-uyab sa buy-bust operation niadtong August 6, 2025 sa Purok 1, Brgy. Central Poblacion, Kalilangan, Bukidnon

Sumala sa report sa Police Regional Office 10, ang operasyon nisangpot sa pagdakop sa lalaking suspek nga si alias “Odak,” 23, high value individual, ug residente sa Purok 5, Poblacion, Nabunturan, Davao de Oro; ug sa giingong babayeng uyab niini nga si alias “Sammy,” 19, ug residente sa Montivesta, Davao de Oro.

Sumala sa report, si “Odak” una nang nadakpan tungod sa illegal nga droga niadtong 2023 ug karon anaa sa ilawom sa probation. Giingong siya nagakuha sa droga gikan sa Lanao del Sur, samtang ang Kalilangan ug kasikbit nga mga munisipyo mao ang iyang lugar sa operasyon.

Bisan tuod gikan siya sa Davao de Oro, giingon nga nagpuyo siya sa Kalilangan uban sa iyang mga paryente. Ang iyang kauban nga si “Sammy,” nga giingong iyang uyab, ang giingong nidawat sa kuwarta sa buy-bust gikan sa poseur buyer.

Sa pagkutlo ning balita, ang mga suspetsado anaa sa kustodiya sa Kalilangan Municipal Police Station (KMPS) alang sa husto nga disposisyon.

Mga kaso batok kanila tungod sa paglapas sa Sec. 5 ug 11, Article II sa R.A. No. 9165 kon Comprehensive Dangerous Drugs Act of 2002 ang ipasaka.

Si Police Brig. Gen. Rolindo M. Suguilon, regional director sa PRO10, nipadayag og pagdayeg sa malampusong operasyon.

Ang maong police operation gipahigayon sa mga myembro sa Kalilangan MPS uban sa mga myembro sa 2nd PB, 10004th Company, RMFB 10, ug Provincial Intelligence Unit. (Omar Rashid Z. Abdullah)