Patay ang usa ka 47-anyos nga babaye samtang ang iyang 47-anyos usab nga live-in partner gidala sa Bukidnon Provincial Hospital sa San Fernando human sila giatangan sa dalan ug gipanigbas sa wala mailhing suspek

Sumala sa police report, nadiskubre sa usa ka concerned citizen ang duha ka biktima nga naghigda sa dalan sa Purok 2-C, Barangay Namnam, San Fernando, Bukidnon, buntag sa Marso 4, 2026.

Ang babaye nakaangkon og grabeng samad tinigbasan sa tiyan, nga hinungdan sa iyang kamatayon, samtang ang lalaki nakaangkon og mga samad tinigbasan sa mga bukton.

Sa inisyal nga imbestigasyon, nasayran nga samtang sakay sa ilang motorsiklo ang mga biktima pauli sa Purok 3 sa maong barangay, kalit nigawas gikan sa tuo nga bahin sa dalan ang wala mailhing suspek ug gipanigbas sila gamit ang sundang, dayon mikalagiw human sa insidente.

Si Oliver S. Navales, provincial director sa Bukidnon Police Provincial Office, mimando sa San Fernando Municipal Police Station sa pagpahigayon og makuting imbestigasyon aron madakpan ang suspek ug masuta ang motibo sa krimen. (melbmadera)