QUEZON, Bukidnon – Giablihan na ang bag-ong Central Wet Market sa Munisipyo sa Quezon niadtong Marso 20, 2026, sa Barangay Libertad, isip kabahin sa selebrasyon sa ika-limang anibersaryo sa Quezon Central Market

Sumala sa LGU Quezon, gipangunahan ni Rev. Fr. Mars Bilbao ang pagbendisyon ug pag-ampo sa maong pasilidad, uban ang presensya ni Mayor Pablo “Poling” Lorenzo III, mga stall owners, ug mga kawani sa Municipal Enterprise Management Office.

Matod ni Mayor Lorenzo, ang karaang merkado dili na makatubag sa nagkadaghang panginahanglan sa katawhan, hinungdan nga gitukod ang bag-ong pasilidad aron mapalapdan ang serbisyo, masiguro ang kalidad ug abot-kayang suplay, ug mapalig-on ang lokal nga ekonomiya.

Ang bag-ong merkado adunay 72 ka stalls—doble sa 36 ka pwesto sa karaang pasilidad—nga gilauman makaserbisyo sa mas daghang mamaligya ug konsumidor.

Samtang, gipadayag usab nga pagasugdan ang renovasyon sa daang wet market, diin plano nga ibalhin ang mga vegetable vendors aron mas mapahapsay ug maorganisar ang dagan sa pamaligya. (melbmadera)