MALAYBALAY CITY, Bukidnon Gipamatuod sa delegasyon sa “One Asenso Misamis Occidental” ang ilang kalig-on human masungkit ang overall championship sa Northern Mindanao Regional Athletic Association Meet 2026 nga gipahigayon sulod sa pito ka adlaw sa probinsya sa Bukidnon

Base sa opisyal nga medal tally, nakuha sa Misamis Occidental ang 91 ka bulawan, 86 ka pilak, ug 89 ka bronse. Ang delegasyon gilangkuban sa probinsya sa Misamis Occidental ug sa mga dakbayan sa Ozamiz, Tangub, ug Oroquieta.

Bisan pa niini, mitumaw nga kon nahiusa unta ang delegasyon sa Bukidnon, Malaybalay, ug Valencia—sama sa porma sa MisOcc—posible unta nga sila ang nagkampeon, tungod kay sa kinatibuk-an makatigom sila og 132 ka bulawan, 121 ka pilak, ug 159 ka bronse.

Nakuha sa Bukidnon ang first runner-up nga adunay 67 ka gold, 43 ka silver, ug 61 ka bronze, gisundan sa Misamis Oriental nga adunay 60 ka gold, 80 ka silver, ug 79 ka bronze. Midangat sa third runner-up ang Iligan City (59-34-65), samtang fourth runner-up ang Cagayan de Oro City (57-70-81).

Mitapos sa ikaunom ang Valencia City (47-58-62), gisundan sa Lanao del Norte sa ikapito (38-34-48), Malaybalay City sa ikawalo (18-20-36), El Salvador City sa ikasiyam (7-6-16), Gingoog City sa ikanapulo (6-12-16), ug Camiguin sa ika-onse (2-5-8).

Natigayon ang closing ceremony niadtong Marso 24 sa Bukidnon Sports and Cultural Complex sa Barangay Laguitas, Malaybalay City.

Gipasalamatan ni Arturo B. Bayucot, regional director sa DepEd Region 10, sila Senador Juan Miguel F. Zubiri ug Bukidnon Governor Rogelio Neil P. Roque, uban sa tanang opisyal sa probinsya, mga mayor, lokal nga lider, school heads, ug working committees alang sa ilang suporta ug kontribusyon sa kalampusan sa NMRAA 2026. (melbmadera)