Gipasiugdahan sa Malaybalay City ang 9th Regional Barangay Nutrition Scholars (BNS)
Conference nga nagtigom sa mga Barangay Nutrition Scholars (BNS) sa Northern Mindanao
aron mapalig-on ang paghatag og serbisyo ug mga programa alang sa nutrisyon sa mga
komunidad.

Gipahigayon ang kalihokan niadtong Sept. 23, 2026, sa Kaamulan Open Theater, Kaamulan Park
sa Malaybalay City ubos sa tema nga “Serbisyo, Pagkakaisa at Dedikasyon: Empowering the
Modern BNS.”
Matud ni Malaybalay City Mayor Jay Warren R. Pabillaran, mapasalamaton ang siyudad nga
napili isip host sa maong regional conference nga gipasiugdahan sa National Barangay Nutrition
Scholars Federation (NaBNS), Inc. Northern Mindanao Chapter, sa koordinasyon sa National
Nutrition Council-Northern Mindanao.
Gipasiugda ni Pabillaran ang padayong suporta sa siyudad sa pagpalig-on sa mga programa sa
nutrisyon, ilabi na alang sa mga kabataan.
Matud niya, importante ang papel sa mga BNS sa pagpalapad sa serbisyo sa nutrisyon ug sa
pagpasayon sa pag-abot sa mga programa sa matag komunidad, lakip ang nutrition interventions
ug pag-monitor sa nutritional status sa mga residente.
Gipasalamatan usab sa mayor ang mga BNS tungod sa ilang padayong serbisyo, dedikasyon ug
pakighiusa sa mga programa nga nagtumong sa pagpalambo sa kahimsog ug nutrisyon sa mga
kabataan.
Ang regional conference nagtumong usab sa pagpalig-on sa panaghiusa ug pagpaambit sa mga
kasinatian ug pamaagi sa mga BNS aron mas mapauswag ang pagpatuman sa mga programa sa
nutrisyon sa tibuok Northern Mindanao. (melbmadera)