Malampusong gipahigayon ang DAGYAW 2026 Town Hall Meeting niadtong Septiyembre 28 sa
Robinsons Valencia, nga nagtumong sa pagpalig-on sa partisipasyon sa mga Civil Society
Organizations o CSOs sa lokal nga pangagamhanan.

Ang kalihokan kabahin sa Philippine Open Government Partnership o PH-OGP Localization,
ubos sa tema nga “Shared Information, Shared Governance,” nga nagpasiugda sa transparency,
pagpaambit sa impormasyon ug aktibong partisipasyon sa katawhan sa proseso sa
pangagamhanan.
Nanguna isip keynote speaker ug guest of honor si DILG Assistant Regional Director Yvette
Tolentino-Sunga, nga mipasiugda sa kamahinungdanon sa aktibong pakiglambigit sa mga CSO
ug bukas nga komunikasyon tali sa lokal nga pangagamhanan ug komunidad.
Gisuportahan ang kalihokan sa City Government of Valencia ubos sa pagpangulo ni Mayor Amie
Galario, kauban si Vice Mayor Greizl Galario-Fernandez, Committee Chair on Civil Society City
Councilor Annalou Zambrano, ug mga miyembro sa 10th Sangguniang Panlungsod.

Ang Valencia City isa sa napulo ka local government units sa Region 10 nga napili isip OGP
Cohort LGU, tungod sa mga inisyatibo niini sa pagpalig-on sa maayong pangagamhanan ug
partisipasyon sa mga sektor sa komunidad. (melbmadera)

Malaybalay, Japan nagpalig-on sa panagtambayayong alang sa kinaiyahan,
climate action
Gipalig-on sa Malaybalay City Government ang pakigtambayayong niini sa Japan pinaagi sa
pagpirma og Memorandum of Understanding (MOU) uban sa JIZOKU Incorporated alang sa
pagpalambo sa mga proyekto nga may kalabotan sa Agriculture, Forestry and Other Land Use
(AFOLU) carbon credits.
Gipirmahan ang kasabutan sa City Hall sa Casisang, Malaybalay City, niadtong Sept. 21, 2026,
nga nagpunting sa pagpalambo sa mga inisyatiba alang sa environmental protection, watershed
conservation, biodiversity enhancement ug malungtarong pagdumala sa yuta.
Ang mga proyekto ipatuman ubos sa Joint Crediting Mechanism (JCM) tali sa Pilipinas ug
Japan, usa ka mekanismo nga nagtumong sa pagpalig-on sa kooperasyon sa duha ka nasud sa
mga proyekto nga may kalabotan sa pagkunhod sa greenhouse gas emissions ug climate action.
Pinaagi sa maong pakigtambayayong, gilauman nga mas mapalambo ang mga inisyatiba nga
naghiusa sa pagpanalipod sa kinaiyahan ug pagdumala sa natural resources, ilabi na sa mga lugar
nga adunay dakong papel sa watershed, kalasangan ug biodiversity conservation.
Gipasiugda usab sa City Government nga ang mga proyekto dili lamang dapat maghatag og
benepisyo sa kinaiyahan, kondili kinahanglan usab nga makahatag og konkretong kaayohan sa
mga lokal nga komunidad nga mahimong kabahin ug maapektuhan sa maong mga inisyatiba.
Ang pagpalig-on sa maong kooperasyon naghatag usab og oportunidad alang sa Malaybalay City
nga mas mapalapad ang mga pamaagi sa pag-atubang sa mga hagit nga dala sa climate change,
samtang gipalig-on ang pagpanalipod sa natural resources ug malungtarong paggamit sa yuta.
(melbmadera)