Nagpundok ang National Commission on Indigenous Peoples (NCIP) Bukidnon Provincial
Office ug mga representante sa mga apektadong Indigenous Cultural Communities/Indigenous
Peoples (ICCs/IPs) aron hisgutan ug pangitaan og paagi sa pagsulbad sa nagpadayon nga isyu sa
utlanan sa duha ka ancestral domain claims sa probinsya bag-ohay lang.

Sumala sa press release sa NCIP Bukidnon, gipangunahan ni NCIP Bukidnon Provincial Officer
Ronaldo L. Baya-on, uban sa mga kawani sa Maramag Community Service Center (CSC) nga
gipangulohan ni Fundador Binahon, ang tigom nga nagtutok sa boundary conflict nga may
kalabotan sa mga aplikasyon alang sa Certificate of Ancestral Domain Title (CADT) sa Manobo
Pulangiyon-Dungguanen ug Manobo Adat Vansa Unified Claim, nga naglangkob sa mga bahin
sa mga lungsod sa Damulog ug Kibawe.
Tumong sa panaghisgot ang paghatag og higayon sa mga partido nga ipahayag ang ilang mga
kabalaka, mapatin-aw ang mga isyu kalabot sa utlanan, ug matuki ang posibleng solusyon nga
respetado sa tanang hingtungdan.
Gipasiugda ni Baya-on ang kamahinungdanon sa dayalogo, usag-usag nga pagtahod ug bukas
nga komunikasyon sa pag-atubang sa mga kalainan, ilabi na sa mga isyu nga direktang may
kalabotan sa ancestral domain ug katungod sa mga lumadnong komunidad.
Matod niya, ang malinawon ug patas nga proseso sa paghisgot sa boundary issues makatabang sa
pagpanalipod sa mga katungod ug interes sa mga ICCs/IPs, samtang mapalig-on usab ang
panaghiusa tali sa mga komunidad.

Ang maong panagtigom kabahin sa padayong paningkamot sa NCIP Bukidnon nga matubag
pinaagi sa dayalogo ug tukmang proseso ang mga isyu nga may kalabotan sa ancestral domain
claims ug mga katungod sa Indigenous Peoples. (melbmadera)