Malampusong gipahigayon ang Diskwento Caravan on Wheels niadtong Agosto 16 sa Damulog
Covered Court sa Munisipyo sa Damulog, Bukidnon, nga nagtumong sa paghatag og mas barato
nga presyo sa mga batakang panginahanglanon sa mga konsumante.

Gipangunahan ang kalihokan pinaagi sa pakigtambayayong sa Department of Trade and Industry
(DTI) Bukidnon Provincial Office, Local Government Unit (LGU) sa Damulog, ug Provincial
Agriculture Office.
Sumala sa DTI Bukidnon, kapin sa 1,000 ka mga konsumante ang nakabenepisyo sa maong one-
day activity, diin nakapalit sila og nagkalain-laing Basic Necessities and Prime Commodities
(BNPCs) ug uban pang importanteng produkto sa mas ubos nga presyo kumpara sa naandang
presyo sa merkado.
Gipasiugda sa mga nag-organisar nga ang Diskwento Caravan isa ka paagi aron mapagaan ang
gasto sa mga pamilya, ilabina sa mga konsumanteng nag-atubang sa pagsaka sa presyo sa pipila
ka mga produkto.
Dugang pa, ang maong kalihokan naghatag usab og oportunidad sa mga residente sa Damulog
nga makapalit og kalidad nga mga produkto sa mas barato nga presyo, samtang gisuportahan ang
mga programa sa gobyerno alang sa consumer protection ug price stabilization.
Human sa malampusong pagpatuman sa Diskwento Caravan sa Damulog, sunod nga dad-on ang
maong serbisyo sa Munisipyo sa Impasugong sa Septiyembre 6 ug 7, diin gilauman usab nga
makabenepisyo ang mga lokal nga konsumante.
Gidasig sa mga ahensya ug lokal nga pangagamhanan ang publiko nga mamahimong alerto sa
mga umaabot nga Diskwento Caravan ug uban pang mga programa nga nagtumong sa paghatag
og mas barato ug accessible nga mga batakang produkto. (melbmadera)