Gipasabot sa publiko nga ang mosunod nga mga lagda ipatuman karon sa Atugan Bridge sa Sayre Highway, Impasug-ong, Bukidnon, aron masiguro ang kaluwasan sa mga motorista ug mapanalipdan ang structural integrity sa tulay

Sumala sa Travel Advisory sa Department of Public Works and Highways (DPWH) sa Northern Mindanao kaniadtong Nobyembre 19, 2025, ang mga gaan nga sakyanan nga adunay timbang hangtod sa lima ka tonelada o adunay unom ka ligid ug ubos pa, tugutan nga moagi sa duha ka lane.

Ang mga bug-at nga sakyanan ipaubos sa inspeksyon sa mga traffic personnel alang sa posibleng overloading sa wala pa moagi sa tulay.

Tungod sa bag-ong slip-collapse incident sa usa ka bahin sa Bukidnon–Davao kon BuDa Highway sa Quezon, Bukidnon, istrikto usab nga bantayan ang Atugan Bridge samtang nagpaabut sa pag-release sa pondo para sa retrofitting works niini.

Ang Impasug-ong–Patulangan Bypass Road magpabilin nga agihan lamang sa mga gaan nga sakyanan nga adunay maximum gross weight nga lima ka tonelada ug magsilbi isip alternatibong ruta.

Ang DPWH Bukidnon 1st District Engineering Office nagsiguro sa pagbutang sa mga traffic signages ug mga babag, ingon man sa pag-deploy sa mga personnel sa kaluwasan ug pagdumala sa trapiko, aron matabangan nga maminusan ang kalisud sa publiko atol niining panahona. (melbmadera)