Usa ka 37-anyos nga maestro sa Balila Integrated School sa Brgy. Balila, Lantapan, Bukidnon, ang gisikop sa niresponding kapolisan human naglasong sulod sa tunghaan nga iyang gitrabahoan

Ang officer in-charge sa Lantapan Municipal Police Station nga si Police Major Anthony O. Townend, sa iyang report, nag-ingon nga sa hitabo, usa ka 45-anyos nga babayeng kauban nga maestra sa suspetsado ang nakaangkon og head injury human gibunalan og electric fan sulod sa buhatan sa principal.

Ang biktima gidala sa RHU Lantapan alang sa dali nga medikal nga atensyon ug sa ulahi gi-refer siya sa Polymedic Hospital sa Malaybalay City para sa dugang nga pagtambal.

Sumala sa report, nahitabo ang kagubot alas 9:30 sa niadtong Nobyembre 12, 2025, ug ang suspek nasikop sa niresponding kapolisan pasado alas 11:30 sa maong adlaw.

Giingon nga naglasong ang public elementary teacher sulod sa buhatan sa principal human mapakyas nga marehistro ang iyang fingerprint sa biometric attendance system sa eskwelahan.

Sa ulahi gikatahong adunay mental illness ang suspek. (melbmadera)