Isa ka drug personality kinsa kanhi napriso apan nakagawas gumikan sa plea bargaining agreement ang gipatay sa Purok 14, Sitio Gabunan, Brgy. Casisang, Malaybalay City buntag sa enero 31.

Sumala sa taho sa kapolisan, ang biktima nailang si Noel Jhon Tangis, 21, ulitawo, residente sa Purok 8, Brgy. Sumpong Malaybalay City. Siya nakaangkon sa duha ka grabing samad pinusilan sa ulo, isa sa nawong ug isa sa liog.

Napalgan ang iyang patay’ng lawas nga nagkadugo diin ang mga kamot parehong gihiktan sa liston sa sapatos.

Matud sa mga residente sa dapit, nabati nila ang sunodsunod nga buto sa armas diin napalgan ang biktima.

Saysay sa silingan sa biktma, nga ang gipatay human sa panihapon uban sa pamilya ang misibat sakay sa motorsiklo.

Nakuha sa dapit sa krimen ang tulo ka kapsola sa bala sa kalibre .45 pistola, motorsiklo ug mga dokumento.
Ang kapolisan nanawagan sa mga adunay kasayoran sa krimen nga makig-alayon aron sa kasulbaran sa maong krimen. (Mel B. Madera)